ފިރިހެނުންނަށް ލިބޭ ގެވެށި އަނިޔާގެ ވާހަކަވެސް އަހަރުމެން ދައްކަން ޖެހޭ

ގެވެށި އަނިޔާގެ ވާހަކަތައް އަހަރެމެން ވަރަށް ގިނައިން ދައްކަމެވެ. ގެވެށި އަނިޔާ ލިބޭ މީހުންނާއި އެމީހުންނަށް ލިބެންޖެހޭ އިންސާފުގެ ވާހަކައެވެ. ގެވެށި އަނިޔާގެ ވާހަކަ ދައްކާއިރު ގިނައިން ދެކެވެނީ އަންހެނުންނަށް ލިބޭ އަނިޔާތަކުގެ ވާހަކައެވެ. ނަމަވެސް ފިރެހެނުންނަށްވެސް ގެވެށި އަނިޔާ ލިބެއެވެ. މިއީވެސް ދައްކަންޖެހޭ ވާހަކަތަކެކެވެ. އަންހެނުންނެކޭ އެއްފަދައިން ފިރެހެނުންނަށް ލިބޭ ގެވެށި އަނިޔާތަކުން އެމީހުންނަށް އިންސާފު ހޯދައިދިނުމަށްވެސް މުޖްތަމައު އަޑުއުފުލަނ ޖެހެއެވެ.

މޯލްޑިވްސް ސްޓެސިސްޓިކް ބިއުރޯއިން އާންމުކޮށްފައިވާ ތަފާސްހިސާބުތައް ދައްކާގޮތުން ފިރެހެނުންނަށް ލިބޭ ގެވެށި އަނިޔާތަކުގެ ތެރޭގައި ގިނައީ ޖިސްމާނީގޮތުންދޭ އަނިޔާތައް ނުވަތަ “ފިޒިކަލް އެބިއުސް” އެވެ. ފިރެހެނުންނަށް ލިބޭ ގެވެށި އަނިޔާތަކުގެ %22.01 އަކީ ޖިސްމާނީ އަނިޔާތަކެވެ. އަންހެނުންނަށް ލިބޭ މިބާވަތުގެ އަނިޔާތައް އުޅެނީ %20.83 ގައެވެ. އެހެންކަމުން މިއީ އަންހެނުންނަށް ލިބޭ އަނިޔާއަށްވުރެ އިތުރު އަދަދެކެވެ.

advertisement

ސެކްސުއަލީ ފިރެހެނުންނަށް ލިބޭ އަނިޔާތަކުގެ އަދަދަކީ %13.24 އެވެ. ސައިކޮލޮޖިކަލީ ލިބޭ އަނިޔާތަކުގެ އަދަދު %10.79 ގައި އުޅޭއިރު ފައިނޭންސިއަލީ ލިބޭ އަނިޔާތަކުގެ އަދަދަކީ %7.50 އެވެ.

ފިރެހެނުންނަށް ފޮށިގެން ހުށައަޅާފައިވާ މައްސަލަތަކުގެ އަދަދަކީ %13.07 އެވެ. ފާރަލައިގެން ހުށައަޅާފައިވަނީ %1.77 މައްސަލައެވެ. މުދަލައް ގެއްލުން ދިނުމުގެ %2.70 މައްސަލަ ހުށައަޅާފައިވެއެވެ.

އަންހެނުންނެކޭ އެއްފަދައިން ގެވެށި އަނިޔާތަކުގެ މައްސަލައަކީ ފިރެހެނުންނަށްވެސް ކުރިމަތިލާންޖެހޭ މައްސަލަތަކެވެ. ނަމަވެސް ފިރެހެނުންނަށް ދިމާވާ މައްސަލަތައް އަންހެނުންނަށްވުރެ މަދުކަމަށް ދައްކަނީ މިފަދަ މައްސަލަތައް ފިރެހެނުން ހުށައަޅާ މިންވަރު ދައްވުމުގެ ސަބަބުންކަމަށްވެދާނެއެވެ.

މިފަދަ މައްސަލަތައް ހުށައަޅާ ފިރެހެނުންނާއި މެދު މުޖްތަމައު ދެކޭގޮތަކީވެސް މައްސަލަތައް ހުށައެޅުމަށް ފިރެހެނުން ފަސްޖެހޭ ސަބަބަކަށް ވެދާނެއެވެ. ނަމަވެސް މުޖްތަމައު ގަބޫލުކުރަންވީ އަންހެނުންނެކޭ އެއްފަދައިން ފިރެހެނުންނަށްވެސް ގެވެށި އަނިޔާގެ މައްސަލަތައް ދިމާވާކަމެވެ. އަދި އެކަމާއި މެދު އަޑުއުފުލައި އެމީހުންނަށްވެސް އެކަންކަމުން އަރައިގަތުމަށް އެހީތެރިކަން ބޭނުންވާކަމެވެ.