މަސްދަރު ހާމަކުރަން މަޖުބޫރު ކުރުމަކީ ނޫސްވެރިކަމަށް އޮތް ބިރެއް

“ނޫސްވެރިންގެ މަސްދަރުތައް ހާމަކުރަން މަޖުބޫރުކުރުމަކީ މީޑިއާ އެތިކްސް އާއި، ނޫސްވެރިންގެ ހައްގުތަކާއި ނޫސްވެރިންގެ ރައްކާތެރިކަން ކަށަވަރުކޮށްދިނުމަށް ބައިނަލް އަގުވާމީ އިންސާނީ ހައްގުތަކާ ބެހޭ  ގާނޫނުގައި އަދި ބައިނަލް އަގުވާމީ މިންގަނޑުތަކުގައި ބަޔާންކޮށްފައިވާ އުސޫލުތަކާ ހިލާފު ކަމެއް،” އެމްނެސްޓީ އިންޓަނޭޝަނަލްގެ އޭޝިއާ ޕެސިފިކް ޑިރެކްޓަރު ޔާމިނީ މިޝްރާ ވިދާޅުވި އެވެ.

ރައްޔިތުންގެ މަޖިލީހަށް މިދިޔަ މަހުގެ 30 ވަނަ ދުވަހު ހުށަހެޅި ހެއްކާ ބެހޭ ބިލް އަނބުރާ ގެންދިޔުމަށް މިހާރުވެސް އެމްނެސްޓީ އިންޓަނޭޝަނަލްގެ އިތުރުން ހަތަރު ޖަމިއްޔާއެއް ގުޅިގެން ނެރުނު ބަޔާނެއްގައި ވިދާޅުވެފައި އޮތީ އެ ބިލު ގާނޫނަކަށް ވެގެން ހިނގައްޖެ ނަމަ ކޯޓުގައި މަސްދަރު ހާމަކޮށްފާނެ ކަމުގެ ބިރަށް މަސްދަރުތަކުން މައުލޫމާތު ނުދިނުން ފަދަ މައްސަލަތައް ދިމާވެ، ނޫސްވެރިންގެ މަސައްކަތަށް ވަރަށް ބޮޑު ނޭދެވޭ އަސަރެއް ކުރާނެ ކަމަށެވެ.

އްކާ ބެހޭ ބިލުގެ 136 ވަނަ މާއްދާގެ (ހ) ގައި ނޫސްވެރިންނަށް ލިބޭ މަސްދަރު ހިމާޔަތްކުރުމުގެ ހައްގު ކަށަވަރުކޮށްދިން ނަމަވެސް އެ މާއްދާގެ (ށ) ގައި ނޫސްވެރިންނަށް މަސްދަރު ހާމަކުރަން މަޖުބޫރުކުރެވިދާނެ ދެ ހާލަތެއް ބަޔާންކޮށްފައި ވެ އެވެ. ބިލު މިހާރު އޮތްގޮތުން އެ ދެ ހާލަތުގައި ކޯޓަކަށް ފެނިއްޖެ ނަމަ ނޫސްވެރިއެއް ބޭނުންކުރި މަސްދަރު ހާމަކުރަން މަޖުބޫރުކުރެވޭނެ އެވެ.

ބިލުގައި ހާމަކޮށްފައިވާ ދެ ހާލަތަކީ މަސްދަރު ހާމަކުރުމުގެ ސަބަބުން މަސްދަރަށް ނުވަތަ އެނޫން ވެސް ފަރާތަކަށް ލިބިދާނެ ގެއްލުން ކުޑަކަމަށް ކޯޓަށް ފެނިއްޖެ ނަމަ ނުވަތަ މަސްދަރު ހާމަކުރުމުގެ ސަބަބުން ނޫސްވެރިންގެ މަސައްކަތުގައި އިތުރު މަސްދަރު ހޯދާ، އެފަދަ މަސްދަރުތަކުގެ ފަރާތުން އިތުބާރު ހުރި މައުލޫމާތު ހޯދުމަށް ނޫސްވެރިންނަށް ހުރަސް އެޅޭނެ މިންވަރު ކުޑަކަމަށް ކޯޓަށް ފެނުމެވެ.

“މިކަމުގެ ސަބަބުން ނޫސްވެރިކަމުގެ މިނިވަންކަމަށް ކުރާނެ ނޭދެވޭ އަސަރު ވަރަށް ސާފު،” މޯލްޑިވްސް ޖާނަލިސްޓްސް އެސޯސިއޭޝަންގެ ރައީސް މުހައްމަދު ހަމްދޫން ވިދާޅުވިއެވެ. “އަދި މިއާއެކު މިވޭތުވެދިޔަ އަހަރުތަކުގެ ތެރޭގައި ނޫސްވެރިކަމުގެ މިނިވަންކަން ހަރުދަނާ ކުރަން ހޯދުނު ކުރިއެރުންތައް ވެސް ގެއްލިގެންދާނެ.”

ނޫސްވެރިކަމަކީ ޑިމޮކްރަޓިކް ގައުމެއްގައި މުހިންމު ބައެއް އަދާކުރާ ކަމެކެވެ. އެގޮތުން ނޫސްވެރިކަމަކީ ޑިމޮކްރަސީގެ ހަތަރު ވަނަ ބާރުކަމުގައި ކިޔައެވެ. މައްސަލަ ހައްލުކުރުމަށްޓަކައި ސަރުކާރުގެ ނުވަތަ ދައުލަތުގެ ބާރު މީޑިއާގެ މައްޗަށް ހިންގިޔަނުދީ ހިފަހެއްޓުމަކީ ޑިމޮކްރެޓިކް ޤައުމެއްގައި ރައްޔިތުންނަށް ލިބޭ ބޮޑު ބާރެކެވެ. ނޫސްވެރިންގެ މަސައްކަތަށް ސަރުކާރުން، ނުވަތަ އެހެނިހެން މުއަސަސާތަކުން ހުރަސް އަޅަނީނަމަ ރައްޔިތުންނާ ހިސާބަށް ފޯރުކުރާ ހަބަރު ތަކަކީ އިތުބާރު ހިފޭ ހަބަރުތަކަކަށް ނުވާނެއެވެ.