މިޔަހެލި: އިޖްތިމާއީ މައްސަލަތަކަށް އީޖާދުތަކެއް އުފެއްދުމަށް ފުރުސަތެއް

“މިޔަހެލި 2021” ކޭމްޕްގައި ބައިވެރިވުމުގެ ފުރުސަތު ހުޅުވާލައިފިއެވެ. މިޔަހެލި ކޭންޕަކީ ޒުވާނުންނަށް އަމާޒުކޮށްގެން ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމް، ޔޫއެންޑީޕީއާއި އުރީދޫ މޯލްޑިވްސްއިން ކުރިއަށްގެންދާ ހަރަކާތެކެވެ.

މިއަހަރުގެ ކޭންޕްގައި ބައިވެރިވުމުގެ ފުރުސަތު މިމަހުގެ 7 ވަނަ ދުވަހުގެ ނިޔަލަށް ވަނީ ހުޅުވާލާފައެވެ. ކޯވިޑް19 ގެ ސަބަބުން މިއަހަރުގެ ކޭންޕްގައި ބައިވެރިވެވޭނީ އުމުރުން 18 އަހަރާއި 30 އަހަރާއި ދެމެދުގެ އއ. އދ. ވ. އަދި ކ. އަތޮޅުގެ ޒުވާނުންނަށެވެ.

“މިޔަހެލި” ކޭމްޕަކީ މުޖުތަމަޢުގާ ހިނގާ އެކިއެކި ކަންތައްތަކަށް ޒުވާނުން ހޭލުންތެރިކޮށް، އެމައްސަލަތަކަށް ހައްލު ހޯދާ، އަމިއްލައަށް ތަފާތު އުފެއްދުންތެރި މަސައްކަތްކުރާ ބަޔަކަށް ހެދުމަށް ކުރިއަށްދިޔަ ޕްރޮގްރާމެކެވެ. މި ކޭންޕް ކުރިއަށްދާނީ ޓީމްތަކަކަށް ބަހާލައިގެންނެވެ. އެގޮތުން އެންމެ މޮޅު 5 ޓީމެއް ހޮވުމަށް ވަނީ ހަމަޖެހިފައެވެ. މިޔަހެލި ކޭންޕް އެންމެ ފުރަތަމަ ބާއްވާފައިވަނީ 2016 ވަނަ އަހަރުއެވެ.