ދައްޕަރު މައްސަލަ އޮއްބާލަން މަޖިލީހުން މަސައްކަތްކުރުމަކީ ބަލައިގަނެވޭނެ ކަމެއްނޫން! : ޓްރާންސްޕޭރެންސީ

ރައްޔިތުންގެ މަޝްވަރާއަކާ ނުލާ ފިއްލަދޫ އިހްތިސާސުން ދައްޕަރު ވަކިކުރި މައްސަލައިގައި ފިއްލަދޫ ރައްޔިތުން މަޖިލީހުގެ ރިޔާސަތުގެ އެއްބާރުލުމާއެކު ހުށަހެޅި ޕެޓިޝަން އޮއްބާލަން މަޖިލީހުން މަސައްކަތްކުރުމަކީ ބަލައިގަނެވޭނެ ކަމެއްނޫންކަމަށް ޓްރާންސްޕޭރެންސީ މޯލްޑިވްސްއިން ބުނެފިއެވެ.

މެންބަރުންނަކީ ރައްޔިތުންގެ ހައްގުތައް ރައްކާތެރިކޮށް، ވެރިކަމުގެ ނިޒާމު ހަރުދަނާކުރުމަށް ރައްޔިތުންގެ ހިޔާލާއި އަޑު ސަރުކާރުގެ ވެރިންނާއި ހަމައަށް ފޯރުކޮށްދިނުމުގެ ޒިންމާ އުފުލަން ޖެހޭ ބަޔަކަށް ވާހިނދު ސަރުކާރުގެ މަސްލަހަތު އިސްކުރުމަކީ ހިތާމަކުރާކަމެއްކަމަށް ޓްރާންސްޕޭރަންސީ މޯލްޑިވްސްއިން ވަނީ ބުނެފައެވެ. ރައްޔިތުންނާއި ސީދާ ގުޅިފައިވާ މުހިއްމު މައްސަލަ ތަކުގައި، ރައްޔިތުން ތަމްސީލުކުރުމަށް ހޮވާފައިވާ މެންބަރުންގެ ޒިންމާއަކަށްވާނީ ސަރުކާރު ޖަވާބުދާރީކޮށް، ރައްޔިތުންގެ އަޑު އުފުލުން ކަމުގައިވެސް ޓްރާންސްޕޭރަންސީ މޯލްޑިވްސްއިން ވަނީ ބުނެފައެވެ.

ފިއްލަދޫއާ އެއްކޮށް އޮންނަ ދައްޕަރު އެ ރަށުގެ އިހުތިސޯސުން ވަކިކޮށްފައިވަނީ މިދިޔަ މަހުގެ 29 ގަ އެވެ. ފިއްލަދޫގެ އިހުތިސޯސުން ދައްޕަރު ވަކިކޮށް ސަރުކާރުން އާންމުކުރި ގަރާރުގައި ދައްޕަރު ހިމަނާފައިވަނީ ރިސޯޓު ތަރައްގީ ކުރާ ރަށެއްގެ ގޮތުގަ އެވެ.

ފިއްލަދޫ ރައްޔިތުންގެ ޕެޓިޝަން މަޖިލީހަށް ހުށައަޅާފައިވަނީ މިދިޔަ އާދިއްތަ ދުވަހުއެވެ. ޕެޓިޝަނާއި ގުޅޭގޮތުން ރައްޔިތުންގެ މަޖިލީހުގެ ބައެއް މެންބަރުން ވަނީ މައްސަލަ އޮއްބާލަން ވާހަކަދައްކަވާފައެވެ. މިކަން އޮއްބާލަން ވާހަކަދެއްކި މެންބަރުންގެ ސަބަބަކަށްވީ ސަރުކާރު ހިންގާ އިގްތިސާދީ މަޝްރޫއުއަކާއި ގުޅުންހުރި ޕެޓިޝަނަކަށްވުމާއި، މަޖިލީހަށް ޕެޓިޝަނެއް ލުމުގެ ކުރިން މެންބަރާއި އަދި ރައީސާވެސް މަޝްވަރާކޮށްފައި ނުވުމާއި، ސަރުކާރަށް އެއްބާރުލުން ދިނުމުގެ ގޮތުންކަމަށެވެ. ޓްރާންސްޕޭރަންސީ މޯލްޑިވްސްއިން ބުނީ ފިއްލަދޫ ރައްޔިތުންގެ ޕެޓިޝަން އޮށްބާލަން ކުރާ މަސައްކަތް މިހާރުން މިހާރަށް ހުއްޓާލުމަށް ރައްޔިތުންގެ މަޖިލީހުގެ މެންބަރުންނަށް ގޮވާލާކަމަށެވެ.