ގިނަ މީހުން އަދިވެސް ބޭނުންވަނީ ރިޔާސީ ނިޒާމް: ދިރާސާ

ރާއްޖޭގައި އޮންނަން ފެންނަނީ ރިޔާސީ ނިޒާމެއްކަމަށް ޕޯލްއަކުން ދައްކައިފިއެވެ. ފަހަކަށްއައިސް ރާއްޖޭގެ ވެރިކަން ބަރުލަމާނީ ނިޒާމަކަށް ބަދަލުކުރުމަށް ގިނަ ބަޔަކު ދަނީ މަޝްވަރާކޮށް މަސައްކަތްކުރަމުންނެވެ. މިކަމުގައި އާންމުންގެ ހިޔާލު ހޯދުމަށް އެމްވީ ޕްލަސްއިން ވަނީ ދާދިފަހުން ޕޯލްއެއް ނަގާފައެވެ.

އެމްވީ ޕްލަސް ޕަބްލިކް އޮޕީނިއަންއިން ހަދާފައިވާ ޕޯލްއިން ދައްކާގޮތުން %74.79 މީހުން ބޭނުންވަނީ ރާއްޖޭގައި ރިޔާސީ ނިޒާމެއް ބޭއްވުމަށެވެ. ބަރުލަމާނީ ނިޒާމެއް ބޭއްވުމަށް ބޭނުންވަނީ %25.21 މީހުންނެވެ.

advertisement

ބަރުލަމާނީ ނިޒާމެއް ރާއްޖެއަށް ގެނައުމަށް ބައެއް މީހުން ވާހަކަދައްކަމުންދާއިރު ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.

ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.