ބާރު އަޅުވަންވީ ދިވެހިންގެ އަމިއްލަ އުފެއްދުންތައް ގިނަ ކުރުމަށް

ދިވެހިންނަކީ ކޮންމެ ކަމެއްގައިވެސް އަމިއްލަ ގޮތްތަކެއް ގެންގުޅޭ ބައެކެވެ. އީޖާދީ އައު އުފެއްދުންތައް އަބަދުވެސް ތައާރަފްކުރާ ބައެކެވެ. އަމިއްލައަށް ކަމެއް ކުރެވޭނެ މަގު އަމިއްލައަށް ފަހިކޮށް އެކަމެއް ކުރާބައެކެވެ. އެގޮތުން އެކިއެކި ކަންކަން ކުރެވޭނެ މެޝިނަރީއާއި އާލަތްތައް ދިވެހިން އަބަދުވެސް ދަނީ އަމިއްލަ ހިޔާލުގެ މައްޗަށް ބިނާކޮށް އުފައްދަމުންނެވެ.

މީގެތެރޭގެ ބައެއް އުފެއްދުންތަކަށް ބަލާއިރު ރ. ވާދޫ މީހަކު ވަނީ އަމިއްލައަށް ކުނި ނައްތާލަން އެއްޗެއް އުފައްދާފައެވެ. ރާއްޖޭގެ ގިނަ ރަށްރަށުގައި މިހާރު މިފަދަ ކުނި ނިއްތާލާ ތަކެތި އަންނަނީ ތައްޔާރުކުރަމުންނެވެ.

މީގެއިތުރުން ވެލިން ކުނޑި ސާފުކުރާ މެޝިނެއްވެސް ދިވެއްސަކު މިހާރު ވަނީ އުފައްދާފައެވެ. ޒުވާން ދަނޑުވެރިޔާގެ ނަމުގައި ޓްވިޓަރ އެކައުންޓުން ވަނީ މި މެޝިންގެ ވީޑިއޯ ހިއްސާކޮށްފައެވެ. ވީޑިއޯއިން ފެންނަ ގޮތުން އެ މެޝިނަށް ވެލި އެޅުމުން ވެލިތައް އަދި ވެލީގައި ހުންނަ އެހެނިހެން ފުނޑު ކުނި ވަކިވެގެން އާދެއެވެ. ހަމަ އެ އެކައުންޓުން ކޮށްފައިވާ ޓްވިޓެއްގައި ވަނީ އަމިއްލައަށް ގަސްތަކަށް ފެންދެވޭ ޕަންޕެއްވެސް ތައްޔާރުކޮށް އެ ވީޑިއޯ ހިއްސާކޮށްފައެވެ. މި ވީޑިއޯއިން ފެންނަގޮތުން ޕަންޕުގެ އެއްބައި ވަޅުތެރޭގައި ވާއިރު އަނެއްބައި ގުޅުވާފައިވަނީ ގަސްތަކަށެވެ. އެހެންކަމުން އޮޓޮމެޓިކުން ގަސްތަކަށް ފެން ލިބިގެންދެއެވެ.

މީގެއިތުރުންވެސް މި ރަމަޞާންމަހުގެ ތެރޭގައި މާރުކޭޓުގައި މީހަކު ބޭނުންކުރި ކުރުނބާ ފެން ނަގާ މެޝިނަކަށްވެސް ވަނީ އާންމުންގެ މަޤްބޫލުކަން ލިބިގެންގޮސްފައެވެ. މިއީ ދ.މާއެނބޫދޫ އަޙުމަދު ނާޒިމް އަމިއްލައަށް ތައްޔާރުކޮށްފައިވާ މެޝިނެކެވެ.

މީގެއިތުރުން ބައެއް އެހެން މަސައްކަތްތައް ފަސޭހަކުރުމަށްވެސް ދިވެހިން ވަނީ މެޝިންތައް ހަދާފައެވެ. އޭގެތެރޭގައި ބަނބުކެޔޮ ކޮށާ މެޝިން ފަދަ މެޝިންތައް ފާހަގަކޮށްލެވެއެވެ.