ޓީޗަރުންގެ ދުވަހުގައި ޓީޗަރުންނަށް ހަދިޔާ ދިނުން ހުއްޓާލަން ޖެހޭ

މިއަދަކީ ބައިނަލްއަޤްވާމީ މުދަރިއްސުންގެ ދުވަހެވެ. މިއީ ދަރިވަރުންނާއި މުދަރިއްސުންނަށްވެސް އަންނަ މުހިންމު ދުވަހެކެވެ. މިދުވަހުގެ މުނާސަބަތުގައި ސްކޫލްތަކުގައި އަންނަނީ އެކިއެކި ހަރަކާތްތައް ބާއްވަމުންނެވެ. އަދި ދުވަހަށް ތައްޔާރުވުމުގެ މަސައްކަތް ދަރިވަރުންނާއި ބެލެނިވެރިންވެސް ކުރެއެވެ. އެގޮތުން މުދަރިއްސުންނަށް ދުވަހާއި ގުޅުވައިގެން ހަދިޔާ ދިނުމަކީ ޒަމާނުއްސުރެން އޮންނަ އާދައެކެވެ.

ގިނަކުދިން ދުވަހާއި ގުޅުވައިގެން މުދަރިއްސުންނަށް ހަދިޔާދެނީ އެއީ މުދަރިއްސުންނަކީ އެކުދިންގެ ދިރިއުޅުމުގައި މުހިންމު ހިއްސާއެއް އަދާކުރާ ބަޔަކަށްވާތީއެވެ. ދިރިއުޅުމުގެ ގިނަ ކަންކަން ދަރިވަރުންނަށް ދަސްކޮށްދޭ ބަޔަކީ މުދަރިއްސުންނެވެ. އެހެންކަމުން މިދުވަސް ކުލަގަދަކޮށް ފާހަގަކުރުމަކީ މުހިންމު ކަމެކެވެ. މުދަރިއްސުން އެކުރާ ބުރަ މަސައްކަތް ބަލައިގަތުމުގެ ގޮތުންވެސްމެއެވެ.

advertisement

ނަމަވެސް ދުވަހާއި ގުޅުވައިގެން ހަދިޔާ ދޭއިރު ވިސްނާލަންޖެހޭ ކަންތައްތަކެއް އޮވެއެވެ. ބައެއް ކުދިން އަގުބޮޑެތި ހަދިޔާ މުދަރިއްސުންނަށް ދެއެވެ. ނަމަވެސް އަނެއްބައި ކުދިންނަކީ ދިރިއުޅުމުގެ ހާލަތު ހުންނަގޮތުން ކިތަންމެ ދޭންބޭނުންވިއަސް މިފަދަ އަގުބޮޑެތި ހަދިޔާ ދެވޭނެ ފެންވަރު ހުންނަ ކުދިންނެއްނޫނެވެ. އެހެންކަމުން ބައެއްކުދިން އަގުބޮޑެތި ހަދިޔާ ދީފައި އަނެއްބައި ކުދިންނަށް މިފަދަ ހަދިޔާ ދޭން ނުލިބުމަކީ އެކުދިންނަށް މީގެސަބަބުން އަސަރުތަކެއް ކުރުވާނެކަމެކެވެ.

މިކަމާއި ގުޅޭގޮތުން ޓްވިޓަރގައި މަރިޔަމް ނަދުރަތު ކިޔާމީހަކު މީހަކު ކޮށްފައިވާ ޓްވިޓެއްގައި ބުނެފައިވަނީ ބައެއް ބެލެނިވެރިންނަށް ނޭންގުނުނަމަވެސް ޓީޗަރުންގެ ދުވަހުގެ ހަދިޔާ ދިނުމަކީ ބައެއް ކުދިންނަށް މީގެ ސަބަބުން ދެރައެއް ލިބިގެންދާނެކަމެއްކަމަށެވެ. ކާޑު ދިނުން ރަނގަޅުކަމަށާއި އަދި އެހެން އެއްޗެހި ދިނުމަކީ އެންމެ އެދެވިގެންވާ ގޮތެއްނޫންކަމަށެވެ. ހަދިޔާ ހިފައިގެން އަންނަ ކުދިން ތިބެނީ އެކަމަށް ވަރަށް އުފާވެފައިކަމަށާއި އެކަމަކު ހަދިޔާ ނެތް ކުދިންނާއި ދޭތެރޭ ވެސް ވިސްނާލަންޖެހޭކަމަށެވެ.

އޭނާ ބުނެފައިވަނީ ހަދިޔާދޭން ނުލިބޭ ކުދިންދެކެ ޓީޗަރުން ލައިކް ނުވާނެކަމުގެ އިހްސާސްވެސް މީގެ ސަބަބުން ކުދިންނަށް އިހްސާސްކުރެވޭނެކަމަށެވެ. އެހެންކަމުން ކުދިންގެ މެދުގައި މިފަދަ އިހްސާސްތައް ނައްތާލުމަށްވެސް ހަދިޔާ ދެވުމުގެ ގާބިލްކަން ހުރި ބެލެނިވެރިންވެސް މިކަން ހުއްޓާލަންޖެހޭކަމަށެވެ.

މިކަމާއި ގުޅޭގޮތުން އެހެންމީހުން ކޮށްފައިވާ ކޮމެންޓްތަކުގައިވެސް ގިނަ ބަޔަކު ވަނީ މިކަމަށް ތާއީދުކޮށްފައެވެ. އެގޮތުން މީހުން ބުނެފައިވަނީ ދަރިވަރުން އަމިއްލަ އަތުން ތައްޔާރުކުރާ ކާޑު ނޫން އެއްޗެއް ދިނުން މިނިސްޓްރީން މަނާކުރަންޖެހޭކަމަށެވެ. އެއީ ކާޑަކީ ކޮންމެ ކުއްޖަކަށްވެސް އެފޯޑް ކުރެވޭނެ އެއްޗަކަށް ވާނެކަމަށް ވަނީ ބުނެފައެވެ.

އަދި ބައެއް މީހުން ބުނެފައިވަނީ އެމީހުންގެ ދަރިން ޓީޗަރުންގެ ދުވަހު ޓީޗަރުންނަށް އަގުބޮޑެތި ހަދިޔާ ނުދޭކަމަށެވެ. ސަބަބަކީ އެފަދަ ހަދިޔާ ނުދެވޭ ކުދިން ސްކޫލްގައި އުޅޭތީ އެއީ އެންމެ ފެއަރ ގޮތްކަމަށް ނުދެކޭތީކަމަށެވެ.

ކޮމެންޓްކޮށްފައިވާ މީހަކު ބުނެފައިވަނީ އޭނާ ސްކޫލްގައި އުޅޭއިރު ބައެއް ކުދިން އަގުބޮޑެތި ހަދިޔާދޭކަމަށެވެ. ނަމަވެސް އެފަދަ ހަދިޔާ ދިނުމުގެ ތަނަވަސްކަން އެމީހުންނަށް ނުލިބޭކަމަށާއި ޓީޗަރުންގެ އެންމެ ފޭވަރިޓް ކުދިންނަކީ އަބަދުވެސް ހަދިޔާދޭ ކުދިންކަމަށެވެ.

ކޮންމެއަކަސް މިއަދު ޓީޗަރުންގެ ދުވަސް ފާހަގަކުރާއިރު މިއީ ބެލެނިވެރިންވެސް ވިސްނާލަންޖެހޭ ކަމެކެވެ. ކޮންމެ ކޮންމެ ކުއްޖަކަށް ހަދިޔާދޭން ނުލިބޭއިރު އަމިއްލަ ދަރިފުޅަށް އަގުބޮޑެތި ހަދިޔާ ދިނުމަކީ މީގެ ސަބަބުން އެހެން ކުދިންނަށް އަސަރުތަކެއް ކުރުވާނެ ކަމެއްކަން ބެލެނިވެރިން ހަނދާންކުރަންޖެހެއެވެ.