ކައިވެނި ކުރުމުގެ ކުރިން ޕްރީ މެރިޓަލް ކައުންސެލިން މުހިއްމު

“ޕްރިމެރިޓަލް ކައުންސިލިންގ” ނުވަތަ ކައިވެނީގެ ކުރިން އެކަމާއި ގުޅޭގޮތުން ކައުންސިލިން ހޯދުމަކީ ވަރަށް މުހިންމު ކަމެކެވެ. ޕްރިމެރިޓަލް ކައުންސިލިންގ ގެ ސަބަބުން ކައިވެނީގެ ފަހުން ދިމާވެދާނެ ކަންކަމަށް ކުރިއާލާ ކައިވެނިކުރާ 2 މީހުންނަށް ތައްޔާރުވެ އެކަންކަމާއިމެދު ވިސްނުމަށް ފުރުސަތު ލިބިގެންދާނެއެވެ.

ކައިވެންޏަކީ ދިރިއުޅުން ވަރަށް ގިނަ ގޮތްގޮތުން ބަދަލުވެގެންދާނެކަމެކެވެ. ކޮންމެ މީހަކުވެސް ކައިވެނި ކުރާނީ އެކުގައި މުޅި އުމުރު ހޭދަކުރުމަށެވެ. ނަމަވެސް ކައިވެނީގެ ފަހުން ދިމާވާ ކޮންމެވެސް ކަންތައްތަކަކާއިހެދި ގިނަފަހަރު ކައިވެނިތައް ރޫޅިގެންދެއެވެ. ނަމަވެސް ކައިވެނީގެ ކުރިން ޕްރިމެރިޓަލް ކައުންސިލިންގ ނަގާނަމަ ކައިވެނީގެ ފަހުން ދިމާވެދާނެ އެންމެހައި ކަންކަމަށް 2 މީހުން ތައްޔާރުވުމަށް އެހީތެރިވެދޭނެއެވެ.

advertisement

ޕްރިމެރިޓަލް ކައުންސިލިންގ ދެނީ މިކަމުގެ ލައިސަންސް ލިބިފައިވާ ގާބިލް މެރިއޭޖް އެންޑް ފެމިލީ ތެރަޕިސްޓުންނެވެ. މި މީހުންނަކީ އާއިލާއެއް ބިނާކުރުމަށްފަހު އަންނާނެ މައްސަލަތަކާއި އެކަންކަމަށް 2 މީހުން އެއްކޮށް ހައްލު ހޯދޭނެ ގޮތްތައް އިނގޭނެ މީހުންނެވެ.

ޕްރިމެރިޓަލް ކައުންސިލިންގ ގެ ސަބަބުން ކައިވެނީގެ ކުރިން 2 މީހުންގެ ގުޅުން ބަދަހިވުމަށް އެހީއަކަށްވާނެއެވެ. މި ކައުންސިލިންގެ ތެރެއިން ތަފާތު އެކިއެކި މައުސޫތަކަށް ވާހަކަދައްކާނެއެވެ. އޭގެތެރޭގައި:

• ފައިސާގެ އެކިއެކި ކަންކަމާއި ގުޅޭގޮތުން
• ވާހަކަދެއްކުން
• އަގުވަޒަންކުރުން، ގަބޫލުކުރާ ގޮތްތައް
• ކައިވެނީގެ ރޯލު
• ދަރިން ހޯދުން
• އާއިލާއާއިމެދު އޮންނަ ގުޅުން
• ރުޅިއާއި ކުރިމަތިލާނެގޮތް
• ކަންކަމުގައި ގޮތް ނިންމުން
• ދެމީހުންނަށް އެކަކު އަނެކަކު ދަސްވެފައިވާ މިންވަރު

ޕްރިމެރިޓަލް ކައުންސިލިންގ ގެ ސަބަބުން ކައިވެނި ބާއްޖަވެރިވެ މިކަމަށް 2 މީހުން ތައްޔާރުވެގެންދާނެއެވެ. ރާއްޖޭއަކީ ދުނިޔޭގެ ނިސްބަތުންވެސް އެންމެ ވަރި ގިނަ ގައުމެވެ. މިކަން މިހެން ދިމާވުމުގެ ސަބަބެއްގެ ގޮތުގައި ކައިވެންޏަށް ރަނގަޅަށް ތައްޔާރު ނުވެވުމަކީވެސް އެކަށީގެންވާ ގޮތެކެވެ. ނަމަވެސް ކައިވެނީގެ ކުރިން ޕްރިމެރިޓަލް ކައުންސިލިންގ ނަގާ މީހުންގެ އަދަދު އިތުރުވެއްޖެނަމަ ކައިވެންޏަށް ގިނަ މީހުން ތައްޔާރުވެ ވަރިވާ މީހުންގެ ނިސްބަތް މަދުވުމަކީވެސް އެކަށީގެންވާކަމެކެވެ.