އާއިލާއާއި ރައްޓެހިން ފަރާތުން ޑިޕްރެޝަންގެ އަލާމާތްތައް ދެނެގަންނާނީ ކިހިނެއް؟

ޑިޕްރެޝަން އަކީ އާންމުވަމުން އަންނަ ނަފްސާނީ ބައްޔެކެވެ. މި ބައްޔަކީ ދިގުދެމިގެންދާ ކަމަކަށްވެދާނެ އެވެ. ނޫނީ އައިސް، ގޮސްވާ ކަމަކަށް ވެސް ވެދާނެ އެވެ. މިއީ ބައެއް ފަހަރު އޭގެ ސަބަބުން ދިރިއުޅުމަށް ނޭދެވޭ އަސަރު ފޯރާ ބައްޔެކެވެ. އާދައިގެ ވަރަކަށް މިބަލި ކުރިމަތިވުމުން ބޭހާއި ނުލައި ހަމައެކަނި ކައުންސިލިންގ ނަގައިގެން ފަރުވާ ކުރެވިދާނެ އެވެ.

ނަމަވެސް މެދު މިންވަރަކަށް ނޫނީ މާބޮޑަށް ކުރިމަތިވެއްޖެނަމަ، ބޭހުގެ ފަރުވާ ނެގުމާއެކު ކައުންސިލިންގ ވެސް ނަގަންޖެހޭނެ އެވެ. ޑިޕްރެޝަން އަކީ ނަފްސާނީ ނުކުޅެދުންތެރިކަމެކޭ ބުނެވިދާނެ އެވެ.

advertisement

ތިމާއާއި ގާތުގައިވާ އެތައްބަޔަކު ޑިޕްރެޝަން ތަހައްމަލް ކުރަމުންވެސް ހިނގައިދާނެއެވެ. އާއިލާ ނުވަތަ ރަހުމަތްތެރިއަކު ޑިޕްރެޝަންގައި އުޅޭނަމަ ދެނެގަންނާނީ ކިހިނެތްހެއްޔެވެ؟ މިއީ ޑިޕްރެޝަންގެ ބައެއް އަލާމާތްތަކެވެ.

އުންމީދު ގެއްލުން

މީހާގެ މޫނުމަތިން އުޖާލާކަން ގެއްލި މާޔޫސްވެފައި ހުންނަނަމަ އެއީ ޑިޕްރެޝަންގެ އަލާމާތެކެވެ. އަދި އަމިއްލަ މީހާއަކީ އެއްވެސް އަގެއްނެތް މީހެއްކަމުގެ އިހްސާސްވެ އަމިއްލަ ނަފްސުދެކެ ރުޅިއައުމަކީވެސް ޑިޕްރެޝަންގެ އަލާމާތެކެވެ.

ޝައުގުވެރިކަން ގެއްލުން

ކުރިން ޝައުގުވެރިވާ ކަންކަމާއި އަދި ކުރާހިތްވާ ކަންކަމަށް އޮންނަ ޝައުގުވެރިކަން ގެއްލުމަކީ ޑިޕްރެޝަންގެ އަލާމާތެކެވެ. އަދި ރަހުމަތްތެރިންނާއިއެކު ކުރިން ބޭރަށްގޮސް މަޖާކޮށް އުޅޭމީހަކުވެސް ކުއްލިއަކަށް މިކަންކަން ހުއްޓާލައިފިނަމަ އެއީ ޑިޕްރެޝަންގެ އަލާމާތެކެވެ.

ވަރުބަލިވެ ނިދަން އުނދަގޫވުން

އާންމުކޮށް ތިމާ ކުރަން ބޭނުންވާ ކަންކަން ކުރުމަށް ޝައުގު ގެއްލި ވަރުބަލިވުމުގެ އިހްސާސްވުމަކީވެސް ޑިޕްރެޝަންގެ އަލާމާތެކެވެ. އަދި ނިދަން އުނދަގޫވުމާއި ނިދިން މަހުރޫމްވުމުގެ ކަންކަމާއިވެސް ކުރިމަތިލާންޖެހެއެވެ.

ބަރުދަނަށް ބަދަލުއައުން

ޑިޕްރެޝަންގެ ސަބަބުން އެކި މީހުންގެ ބަރުދަނަށް ބަދަލު އަންނަނީ އެކި ގޮތްގޮތަށެވެ. ބައެއް މީހުން ބަރުވާއިރު އަނެއްބައިމީހުން ބަރުދަން ލުއިވެސްވެއެވެ.

އަމިއްލަ ނަފްސަށް ގެއްލުން ދިނުން

ޑިޕްރެޝަންއަށް ގޮސްފައިވާ މީހަކު އަމިއްލަ ނަފްސަށް ގެއްލުން ދިނުމުގެ ކަންކަން ކުރާނެއެވެ. އޭގެތެރޭގައި އަމިއްލައަށް މަރުވުމުގެ ހިޔާލުތައްވެސް އަންނަނާނެއެވެ.

މިފަދަ އަލާމާތްތައް ފެންނަ މީހަކު އާއިލާތެރޭގައި ނުވަތަ ރަހުމަތްތެރިންގެ ތެރޭގައި އުޅޭނަމަ އެމީހަކަށް އެހީތެރިވެދިނުމަކީ ތިމާގެ އަމިއްލަ ޒިންމާއެއްކަމުގައި ދެކި އެމީހަކަށް އެހީތެރިވެދޭންޖެހެއެވެ.

މިބައްޔަށް ފަރުވާކުރުމުގައި ބަލި ކުރިމަތިވީ ކީއްވެގެންކަން އެނގުމާއި، ނަފްސާނީގޮތުން އައިސްފައިވާ ބަދަލުތަކަށް ސަމާލުކަން ދިނުން މުހިއްމެވެ. ފަރުވާހޯދާއިރު ވިސްނަންޖެހޭ އަނެއްކަމަކީ މިއީ ކުއްލިއަކަށް ރަނގަޅުވާނެ ބައްޔެއް ނޫންކަމާއި، އެހެން ބަލިތަކެކޭ އެއްފަދައިން ފަރުވާ އާއެކު މަޑުމަޑުން ރަނގަޅުވާނެ ބައްޔެއް ކަމެވެ.