ބިދޭސީ މަސައްކަތްތެރިންގެ މުސާރަވެސް މިނިމަމް ވޭޖްގައި ކަނޑައަޅަން ޖެހޭ

މިނިމަމް ވޭޖްގެ ތެރޭގައި ބިދޭސީ މަސައްކަތްތެރިންވެސް ހިމަނަން ޖެހޭކަމަށް މިޝަން ފޯރ މައިގްރެންޓް ވޯކާރސް މޯލްޑިވްސްއިން ބުނެފިއެވެ.

މިޝަން ފޯރ މައިގްރެންޓް ވޯކާރސް މޯލްޑިވްސްއިން ބުނީ ރާއްޖޭގެ އެންމެ ފަހުގެ ބޯހިމެނުމުގައި ރާއްޖޭގައި 97،774 ބިދޭސީން މަސައްކަތްކުރަމުންދާކަމަށެވެ. މިއީ ރާއްޖޭގެ އާބާދީގެ %22 އެވެ.

advertisement

ރާއްޖޭގައި މަސައްކަތްކުރާ ބިދޭސީންގެ އާބާދީގެ %58 އަކީ ބިދޭސީ މަސައްކަތްތެރިންނެވެ. އަދި %21 އަކީ އިންޑިއާގެ މަސައްކަތްތެރިންނެވެ. 2014 ވަނަ އަހަރުން 2021 ވަނަ އަހަރަށް އަހަރެއްގެ މައްޗަށް ބިދޭސީ މަސައްކަތްތެރިންގެ އަދަދު %10 އަށް އިތުރުވާނެކަމަށް ބޯހިމެނުމުގައި ލަފާކޮށްފައިވާކަމަށްވެސް ވަނީ ބުނެފައެވެ.

ބިދޭސީ މަސައްކަތްތެރިންގެ އަދަދު އިތުރުވެ ދިވެހިންނަށްވުރެ ކުޑަ އުޖޫރައެއްގައި ބިދޭސީ މަސައްކަތްތެރިން ލައްވައި މަސައްކަތް ކުރުވޭނަމަ ކުންދުނިތަކުން ދިވެހިންގެ ބަދަލުގައި ވަޒީފާތަކަށް ނަގާނީ ބިދޭސީންކަމަށް މިޝަން ފޯރ މައިގްރެންޓް ވޯކާރސް މޯލްޑިވްސްއިން ވަނީ ބުނެފައެވެ. މިއީ ދިވެހިންނަށް ވަޒީފާތައް ލިބުމަށް ފަތި ވެގެންދާނެކަމެކެވެ.

ރާއްޖޭގައި ދެވޭ އެންމެ ކުޑަ އުޖޫރައިގެ ގޮތުގައި 5،700 ރުފިޔާ ކަނޑައެޅުމަށް މިނިމަމް ވޭޖް އެޑްވައިޒަރީ ބޯޑުން މިމަހު ވަނީ ފާސްކޮށްފައެވެ.

މިނިމަމް ވޭޖް ބޯޑުން މިހާތަނަށް ފާސްކޮށްފައިވަނީ ކުދި ފަންތިއާ މެދު ފަންތީގެ އިތުރުން ބޮޑެތި ވިޔަފާރިތަކަށް އެކަށީގެންވާގޮތަށް ފާސްކޮށްފައިވާ ވޭޖު މިންވަރުތަކާއި، ސިވިލް ސަރވިސް މުވައްޒަފުންނަށްދޭ އެންމެ ކުޑަ އުޖޫރައެވެ.

އެގޮތުން އެންމެ ކުޑަ އުޖޫރަ ނުވަތަ މިނިމަމް ވޭޖުގެ ގޮތުގައި ކަނޑައަޅާފައިވާ 5،700 ރުފިޔާއަކީ ކުދި ވިޔާފާރިތަކުގައި ދުވާލަކު 8 ގަޑިއިރު މުވައްޒަފަކު މަސައްކަތް ކުރުމުން މަހެއްގެމައްޗަސް ދޭންޖެހޭނެ މިންވަރެވެ. މިނިމަމް ވޭޖް އެޑްވައިޒަރީ ބޯޑުން ފާސްކޮށްފައިވާ ގޮތުން މެދު ފަންތީގެ ވިޔަފާރިތަކުގައި ދުވާލަކު 8 ގަޑިއިރު މަސައްކަތްކުރުމުން މަހެއްގެ މައްޗަށް މުވައްޒަފުންނަށް 7،000 ރުފޔާ މުސާރައިގެ ގޮތުގައި ދޭންވާނެއެވެ.

މީގެ އިތުރުން ބޮޑެތި ވިޔަފާރިތަކުގައި މަސައްކަތްކުރާ މުވައްޒަފުންނަށް ދުވާލަކު 8 ގަޑިއިރު މަސައްކަތްކުރުމުން، މަހަކު 8900 ރުފިޔާ ދިނުމަށްވެސް ވަނީ ކަނޑައަޅާފައެވެ. ސަރުކާރުގެ އެންމެ މުވައްޒަފުން ގިނަ ސިވިލް ސަރވިސްގެ މުވައްޒަފުންނަށް ލިބޭނެ އެންމެ ކުޑަ އުޖޫރަ ނުވަތަ މުސާރައިގެ ގޮތުގައި މިނިމަމް ވޭޖް އެޑްވައިޒަރީ ބޯޑުން ކަނޑައަޅާފައިވަނީ، 7000 ރުފިޔާއެވެ.