ނަފްސާނީ ދުޅަހެޔޮކަމަށް ރާއްޖޭގައި އެތައް ގޮންޖެހުންތަކެއް

މިއަދަކީ ބައިނަލްއަޤްވާމީ ނަފްސާނީ ދުޅަހެޔޮކަމުގެ ދުވަހެވެ. ނަފްސާނީ ދުޅަހެޔޮކަމުގެ ދުވަހެއް ފާހަގަކުރާއިރު ރާއްޖޭގައިވެސް ނަފްސާނީ އެތައް މައްސަލަތަކާއި ކުރިމަތިލާންޖެހިފައިވާ މީހުން އެބަތިއްބެވެ. ތަފާތު އެކިއެކި ކަންކަމާއިހުރެ ނަފްސާނީ ދުޅަހެޔޮކަމަށް އަސަރުކުރެއެވެ. އޭގެތެރޭގައި އާއިލީ މައްސަލަތަކާއި، ރަހުމަތްތެރިންގެ ގުޅުމާއި، ވަޒީފާގެ މާހައުލުގައި ދިމާވާ އެކިއެކި ކަންކަމުގެ ސަބަބުންވެސް ގިނަ ބައެއްގެ ނަފްސާނީ ދުޅަހެޔޮކަމަށް އަސަރުކުރެއެވެ.

ނަފްސާނީ ދުޅަހެޔޮކަމަށް ރާއްޖޭގައި އެތައް ގޮންޖެހުންތަކެއް އެބަހުއްޓެވެ. ދިރިއުޅުމުގެ ހާލަތު ހުންނަ ގޮތުގެ ސަބަބުންވެސް ބައެއް މީހުންގެ ނަފްސާނީ ދުޅަހެޔޮކަމަށް އަސަރުކުރެއެވެ. އެގޮތުން އާމްދަނީއާއި ދިރިއުޅުމުގެ ފެންވަރު ހުންނަ ގޮތުގެ ސަބަބުންވެސް ނަފްސާނީ ދުޅަހެޔޮކަމަށް އަސަރުކުރެއެވެ. މީގެއިތުރުންވެސް ރާއްޖޭގެ އެކި ސަރަހައްދުތަކުގައި ޙިދުމަތްތައް ލިބެންހުރި ފެންވަރާއި މިންވަރުގެ ސަބަބުންވެސް މިކަމަށް އަސަރުކުރެއެވެ. އޭގެތެރޭގައި ސިއްހީ ހިދުމަތްތަކުގެ ފެންވަރާއި، ތައުލީމާއި، ވަޒީފާގެ ފުރުސަތުތައްވެސް ހިމެނެއެވެ.

މީގެއިތުރުންވެސް މުޖްތަމައުގެ ތެރޭގައި ހުންނަ ތަފާތުކުރުންތަކުގެ ސަބަބުންވެސް ނަފްސާނީ ދުޅަހެޔޮކަމަށް އަސަރުކުރެއެވެ. އުމުރުގެ ގޮތުންނާއި، ޖިންސުގެ ގޮތުންނާއި އަދި މުޖްތަމައުގައި އެމީހެއްގެ މަގާމާއި ނަފްސާނީ ނުކުޅެދުންތެރިކަމަށްވެސް މުޖްތަމައުގައި އަންނަނީ ތަފާތުކުރުންތައް ގެންގުޅެމުންނެވެ. މިއީވެސް ގިނަބައެއްގެ ނަފްސާނީ ދުޅަހެޔޮކަމަށް އަސަރުކުރާ ކަންކަމެވެ.

ރާއްޖޭގެ އާބާދީގެ ކޮންމެ 10 މީހަކުން އެކަކަކީ ކޮންމެވެސް ކަހަލަ ނުކުޅެދުންތެރިކަމެއް ހުންނަ މީހެކެވެ. ނުކުޅެދުންތެރިކަން ހުންނަ މީހުން އެހެންމީހުންނާއި އަޅާބަލާއިރު 3 ނުވަތަ 4 ފަހަރު މުޖްތަމައުގެ ފަރާތުން ކޮންމެވެސް ގެއްލުމާއި ކުރިމަތިލާންޖެހެއެވެ.