ގެވެށި އަނިޔާގެ ތެރެއިން އެންމެ ގިނައީ ބަހުގެ ހަމަލާއާއި ނަފްސާނީ އަނިޔާ

ގެވެށި އަނިޔާތަކުގެ ތެރޭގައި އެންމެ ގިނައީ ބަހުގެ ހަމަލާދިނުމާއި ނަފްސާނީގޮތުން ކުރާ އަނިޔާތައްކަމަށް ފެމިލީ ޕްރޮޓެކްޝަން އޮޓޯރިޓީގެ ތަފާސްހިސާބުތަކުން ދައްކައިފިއެވެ.

އެ އިދާރާގެ މިއަހަރުގެ 2 ވަނަ ކުއާޓަރުގެ ތަފާސްހިސާބު ރިޕޯޓުން ދައްކާގޮތުން މިއަހަރުގެ 2 ވަނަ ކުއާޓަރުގައި ގެވެށި އަނިޔާގެ 154 މައްސަލައެއް ވަނީ ހުށައެޅިފައެވެ. މީގެތެރެއިން އެންމެ ގިނަ މައްސަލަތައް ރިޕޯޓްކޮށްފައިވަނީ މޯލްޑިވްސް ޕޮލިސް ސަރވިސްއަށެވެ. އެއީ 77 މައްސަލައެކެވެ. 2 ވަނައަށް އެންމެ ގިނަ މައްސަލަ ރިޕޯޓްކޮށްފައިވަނީ ޖެންޑަރ މިނިސްޓްރީއަށެވެ. އެއީ 58 މައްސަލައެކެވެ.

advertisement

ގެވެށި އަނިޔާގެ މައްސަލަތަކުގެ ބާވަތްތަކަށް ބަލާއިރު އެންމެ ގިނަ މައްސަލަ ހުށައަޅާފައިވަނީ ބަހުގެ އަނިޔާކުރުމާއި ނަފްސާނީގޮތުން އަނިޔާކުރުމުގެ މައްސަލަތަކެވެ. އެއީ ޖުމްލަ 106 މައްސަލައެވެ. މީގެތެރޭގައި 18 އަހަރުން ދަށުގެ 27 ކުއްޖަކަށާއި އަދި 18 އަހަރުން މަތީގެ 77 މީހަކަށް އަނިޔާ ލިބިގެން ވަނީ ރިޕޯޓްކޮށްފައެވެ. 2 ވަނައަށް އެންމެ ގިނައިން ރިޕޯޓްކޮށްފައިވަނީ ޖިސްމާނީ އަނިޔާ ލިބިގެންނެވެ. މިބާވަތުގެ ޖުމްލަ 94 މައްސަލައެއް ވަނީ ހުށައަޅާފައެވެ. ބިރުދެއްކުމުގެ 67 މައްސަލައެއް ހުށައަޅާފައިވާއިރު، ގޯނާކުރުމުގެ 37 މައްސަލައެއް އަދި ގެވެށި އަނިޔާގެ އަމަލެއް ހިންގަމުންދާ މަންޒަރު ކަނޑައެޅިގެން ކުޑަކުއްޖަކަށް ދެއްކުމުގެ ނުވަތަ އަޑިއިއްވުން، ނުވަތަ އެފަދަ އަމަލެއް ފެންނާނެ ނުވަތަ އަޑިއިވޭނެހާލަތަކަށް ކުއްޖަކު ގެންދިއުން ނުވަތަ ހުށައެޅުމުގެ 32 މައްސަލައެއްވެސް ވަނީ ހުށައަޅާފައެވެ.