ކްލައިމެޓް ކްރައިސިސްގެ ސަބަބުން ކުޑަކުދިންނަށް އެތަށް ގެއްލުންތަކެއް

މޫސުމަށް އަންނަ ބަދަލުތަކުގެ ސަބަބުން އިންސާނުންގެ ދިރިއުޅުމަށް އަސަރުކުރެއެވެ. ބޮޑެތިމީހުންނެކޭ އެއްފަދައިން މި ބަދަލުތަކުގެ ސަބަބުން ކުޑަކުދިންނަށްވެސް ގިނަ އަސަރުތަކެއް ކުރާކަމަށް ދިރާސާތަކުން ދައްކައެވެ.

މޫސުމީ ބަދަލުތަކުގެ ސަބަބުން ދުނިޔޭގެ އިކޯސިސްޓަމްއަށް ބަދަލުތަކެއް އާދެއެވެ. މީގެ ސަބަބުން ދުނިޔޭގެ ބައެއް ދިރުންތައް ނެތިގެންވެސް ގޮސްފައި އެބަހުއްޓެވެ. މޫސުމީ ބަދަލުތަކުގެ ސަބަބުން ކުޑަކުދިންނަށް ލިބޭ ބައެއް ގެއްލުންތަކުގެ ތެރޭގައި ކާނާގެ ބައެއް ބާވަތްތައް ނެތިދިއުމުގެ ސަބަބުން ނުވަތަ ނުލިބުމުގެ ސަބަބުން ދިރިއުޅުމަށް އަސަރުތަކެއް ކުރެއެވެ. މިހާރުވެސް ދުނިޔޭގައި ބައެއް ބާވަތްތަކުގެ ކާނާ ލިބުން ވަނީ ދަތުވެފައެވެ. ދުނިޔެހޫނުވުމާއި ކަނޑުގެ ލޮނުގަނޑު އުފުލުން ނުވަތަ އުދައެރުން ފަދަ ކަންކަމުގެ ސަބަބުން ގަސްގަހާގެއްސަށްވެސް އޭގެ ނޭދެވޭ އަސަރުކުރެއެވެ.

advertisement

މޫސުމީ ބައެއް ބަދަލުތަކުގެ ސަބަބުން އާއިލާތަކަށް ލިބޭ އާމްދަނީގެ މިންވަރު ދަށްވެގެންދެއެވެ. މިއީވެސް ކުޑަކުދިންނަށް އަސަރުކުރުވާނެ ކަމެއްކަމަށް ދިރާސާއިން ވަނީ ދައްކާފައެވެ.

މޫސުމީ ބަދަލުތަކުގެ ސަބަބުން ކުއްލިއަކަށް ބޮޑެތި ކާރިސާތައް ދިމާވުން މިހާރު ވަނީ އިތުރުވެފައެވެ. މީގެ ބައެއް މިސާލުތަކަށް ބަލާއިރު އަލިފާންރޯވުމާއި، ފެންބޮޑުވުމާއި، އުދައެރުންފަދަ ކާރިސާތައް ހިމެނެއެވެ. މިކަންކަމުގެ ސަބަބުން ގިނަ އަދަދެއްގެ މީހުންނަށް އަންނަނީ އަސަރުކުރަމުންނެވެ. ބައެއް މީހުންނަށް ޖިސްމާނީ ބޮޑެތި ގެއްލުންތަކެއްވެސް މިފަދަ ކާރިސާތަކުގެ ސަބަބުން ލިބިފައި އެބަހުއްޓެވެ. އަދި ބައެއް ބަލިތައް ފެތުރުންވެސް އާންމުވެގެންދެއެވެ. އޭގެތެރޭގައި މެލޭރިއާ، ޑެންގޫ، ހުންއައުން، ތަގައްޔަރުވެފައިވާ ފެނުގެ ސަބަބުން ޖެހޭ އެކި ބަލިތަކުގެ އިތުރުން ޑައިރިއާ ފަދަ ބަލިތައް އަންނަނީ އާންމުވަމުންނެވެ.

މީގެ އިތުރުން މިފަދަ ކާރިސާތަކުގެ ސަބަބުން ގިނަ ބައެއްގެ ގެދޮރު ގެއްލި އެހެންތަންތަނަށް ހިޖުރަކުރަންވެސް ޖެހެއެވެ. މިއީވެސް ކުޑަކުދިންނަށް އޭގެ ސަބަބުން އަސަރުކުރުވާކަމެކެވެ.