ރިސޯޓް މުވައްޒަފުން ރިސޯޓު ތަކުގައި ބަންދުވެފައި

ރިސޯޓްތަކުގައި މަސައްކަތްކުރާ މުވައްޒަފުންނަށް އޮފް ދުވަހު ރަށައް ނުދެވުމުގެ ޝަކުވާ ޓޫރިޒަމް އެންޕްލޯއީސް އެސޯސިއޭޝަން އޮފް މޯލްޑިވްސް، ޓީމްއިން ކޮށްފިއެވެ.

ކޯވިޑް19 އާއިއެކު އެންމެ ބޮޑަށް އަސަރުކުރީ ފަތުރުވެރިކަމުގެ ސިނާއަތަށެވެ. އަދި މި ސިނާއަތުގައި މަސައްކަތްކުރާ މުވައްޒަފުން ގިނަ ދުވަސްތަކެއް ވަންދެން ރަށައް އާއިލާ ކައިރިއަށް ނުދެވިފައިވެސް ތިބެންވެސް ޖެހުނެވެ. މިހާރުވެސް ބައެއް ރިސޯޓްތަކުން މުވައްޒަފުން އޮފް ދުވަހަށް ރިސޯޓުން ބޭރަށް ނުފޮނުވާކަމުގެ ޝަކުވާ އަންނަނީ ލިބެމުންނެވެ.

advertisement

ޓީމްއިން ކޮށްފައިވާ ޓްވިޓެއްގައި ބުނެފައިވަނީ ރިސޯޓް މުވައްޒަފުންގެ އޮފް ދުވަހު އަދި އޮފް ޑިއުޓީގައި ރަށައް ނުދެވޭގޮތައް ހެދުމަކީ ގަވައިދާ ހިލާފު އަމަލެއްކަމަށެވެ. ސެޕްޓެމްބަރ މަހުގެ 26 ވަނަ ދުވަހު ވެކްސިން ޖަހާފައިވާ ރިސޯޓް މުވައްޒަފުންނަށް ރަށްރަށައް ދަތުރުކުރުމުގެ ހުއްދަ ދީފައިވާއިރު ފުވައްޒަފުން މިކަމުން މަހުރޫމް ކުރުމަކީ ބަލައިގަނެވޭނެ ކަމެއްނޫންކަމަށް ޓީމްއިން ވަނީ ބުނެފައެވެ.

މިކަމާއި ގުޅިގެން ގިނަ ރިސޯޓް މުވައްޒަފުންވެސް އަންނަނީ ކަންބޮޑުވުން ފާޅުކުރަމުންނެވެ. ސަބަބަކީ އޮފް ފުވަހު އެމީހުންގެ އާއިލާތައް ކައިރިއަށް ދިއުމަކީ އެމީހުންނަށް ލިބިގެންވާ ހައްގެއްކަމަށް ރިސޯޓް މުވައްޒަފުން ބުނެއެވެ. ވެކްސިން ފުރިހަމަ ކޮށްފައިވާ ރިސޯޓް މުވައްޒަފުންނަށް ދަތުރުކުރެވޭނެ މަގު ފަހިކޮށްދިނުމަކީ ޓޫރިޒަމް މިނިސްޓްރީންވެސް ރިސޯޓް މުވައްޒަފުންގެ ހައްގުގައި ކޮށްދޭންޖެހޭ ކަމެކެވެ.