ޕީ.ޓީ.އެސް.ޑީ: ވިކްޓިމް އަކަށް ވުމުން ލިބޭ ނަފްސާނީ އަދަބެއްތަ؟

ޕޯސްޓް ޓްރޮމެޓިކް ޑިސްއޯޑަރ އަކީ ބައެއް މީހުންނަށް ދިމާވާ ސިއްހީ މައްސަލައެކެވެ. އާންމުގޮތެއްގައި މި މައްސަލަ ދިމާވަނީ ދިރިއުޅުމުގައި ދިމާވާ ކަމެއްގެ ނުވަތަ ކަންތައްތަކެއްގެ ސަބަބުންނެވެ. ބިރުވެރިކަމެއްގެ ސަބަބުންނާއި، ކަމެއްގެ ސަބަބުން މީހާއަށް ލިބޭ ޝޮކެއްގެ ސަބަބުން ނުވަތަ އަމިއްލަ ނަފްސަށް ހެލްޕްލެސް އިހްސާސްތައް ކުރެވެން ފެށުމުގެ ސަބަބުންވެސް މި މައްސަލަ ކުރިމަތިވެދާނެއެވެ. މިސާލަކަށް ބުނާނަމަ ކްރައިމް، އަލިފާނުގެ ހާދިސާ، ލޯބިވާ މީހަކު މަރުވުން، ޖިންސީ ފުރައްސާރައިގެ ޝިކާރައަކަށްވުމުގެ ސަބަބުންވެސް މިކަމާއި ކުރިމަތިލާންޖެހިދާނެއެވެ.

ޕޯސްޓް ޓްރޮމެޓިކް ޑިސްއޯޑަރގެ އަލާމާތްތައް އާންމުގޮތެއްގައި ފެންނަން ފަށަނީ އެ ހާދިސާއެއް ދިމާވާތާ 3 މަސް ފަހުންނެވެ. އެމެރިކަން ސައިކޮލޮޖިކަލް އެސޯސިއޭޝަންއިން ވަނީ މީގެ ބައެއް އަލާމާތްތައް ހިއްސާކޮށްފައެވެ. އެގޮތުން ބިރިވެރި ހުވަފެން ފެނުމާއި، ކުރީގެ ބައެއް ހަނދާންތައް އާވުމާއި، ބިރިވެރި ހިޔާލުތައް އައުން ހިމެނެއެވެ.

advertisement

މީގެއިތުރުންވެސް ނިދަން އުނދަގޫވުމާއި، މާއަވަހަށް ރުޅިއައުމާއި، ޓެންޝަންގައި ހުރުމާއި އެންޒައިޓީ ހިމެނެއެވެ.

މީހާގެ މޫޑަށް ބަދަލުއައިސް ވިސްނުމަށް އަންނަ ބައެއް އަލާމާތްތަކުގެ ތެރޭގައި:

އެ ހާދިސާގެ ބައެއް ކަންކަން ހަނދާންނުވުމާއި، އަމިއްލަ ނަފްސު ކުއްވެރިކުރުމާއި، ދިރިއުޅުމާއިމެދު އެއްވެސް ޝައުގުވެރިކަމެއް ނެތުމުގެ އިތުރުން ކަންކަމަށް ސަމާލުކަން ދިނުމަށް އުނދަގޫވުން ހިމެނެއެވެ.

ޕޯސްޓް ޓްރޮމެޓިކް ޑިސްއޯޑަރގެ ސަބަބުން ފިޒިކަލީ މީހާއަށް އައިސްދާނެ ބަދަލުތަކުގެ ތެރޭގައި ދާހިތްލުމާއި، ތުރުތުރު އެޅުމާއި، ބޮލުގައި ރިއްސުމާއި، ބަނޑަށް ތަދުވުން، އެކި ތަންތަނަށް ތަދުވުން ހިމެނެއެވެ.

ޕޯސްޓް ޓްރޮމެޓިކް ޑިސްއޯޑަރ ދިމާވާ މީހުންނަށް 2 ގޮތަކަށް ފަރުވާ ހޯދިދާނެއެވެ. އެއީ ބޭސްބޭނުންކޮށްގެން ނުވަތަ ކައުންސިލިންގ ނަގައިގެންނެވެ. ނުވަތަ ބައެއް މީހުންނަށް ބޭސްބޭނުކުރުމަށްފަހު ކައުންސިލިންވެސް ނަގަންޖެހިދާނެއެވެ.