އަނިޔާ ލިބޭ ބައެއް މީހުން ފަހުން އެހެންމީހުންނަށް އަނިޔާ ކުރަނީ ކީއްވެ؟

ކުޑައިރުގައި އެކިއެކި އަނިޔާ ލިބޭ ކުދިން ބޮޑުވުމަށްފަހުގައިވެސް އެހެންމީހުނަށް އެކިއެކި އަނިޔާ ކުރާކަމަށް ދިރާސާތަކުން ދައްކައެވެ. ހޯދުންތަކުން ދައްކާގޮތުން ކުޑައިރު އަނިޔާ ލިބޭ ކުދިންގެ ތެރެއިން %30 ނުވަތަ %40 ކުދިން ބޮޑުވުމަށްފަހު އެހެން މީހުންނަށް އަނިޔާ ލިބެއެވެ. އެހެންކަމުން މިފަދަ ކަންކަމާއި މެދު އާއިލާތަކުން ޙާއްސަ ސަމާލުކަމެއް ދޭންޖެހެއެވެ.

އާންމުގޮތެއްގައި ކުޑައިރު އަނިޔާލިބޭ ކުދިންނަށް ނަފްސާނީ ބޮޑެތި ގެއްލުންތަކާއި ކުރިމަތިލާންޖެހެއެވެ. މީގެ ސަބަބުން ބައެއް ކުދިންނަށް ނުރުހުމާއި ނަފްރަތު އަށަގަނެއެވެ. ކުޑައިރު އެކުދިން ކުރިމަތިލާންޖެހޭ އަނިޔާގެ ސަބަބުންނެވެ. އެހެންކަމުން ބޮޑުވުމުން ބައެއްފަހަރު ބަދަލު ހިފަން ބޭނުންވެއެވެ.

advertisement

އާއިލާގެ ތެރޭގައި ބައެއްފަހަރު ކަންކަން ހުންނަގޮތާއި ކަންތައްތައް ދިމާވާ ގޮތުގެ ސަބަބުންވެސް ބައެއް ކުދިން ބޮޑުވުމަށްފަހު އެހެން މީހުންނަށް އަނިޔާދެއެވެ. ޙާއްސަކޮށް ކުޑައިރު އަނިޔާ ލިބިފައިހުންނަ ކުދިން ބޮޑުވަމުންއަންނައިރު އާއިލާގެ ތެރެއިން އެކުދިންނަށް ޙާއްސަ ސަމާލުކަމެއްދީ ރަނގަޅުގޮތުގައި ބަލަހައްޓަން ޖެހެއެވެ. އަދި މިފަދަ އާއިލާތަކަށް މުޅި ޖުމްތަމައުންވެސް އެހީތެރިކަން ފޯރުކޮށްދޭން ޖެހެއެވެ. އެއީ ބޮޑުވެގެން އަންނައިރު މިކުދިންގެ ސަބަބުން އެހެން ކުދިންނަށް އަނިޔާލިބުން ކުޑަކުރުމަށެވެ.

ސްކޫލްގެ މާހައުލުގައި ދިމާވާ ކަންކަމުގެ ސަބަބުންވެސް ބައެއް ކުދިން ބޮޑުވެގެން އެހެން ކުދިނަށް ގެއްލުން ދިނުމުގެ އަމަލުތައް ހިންގާކަމަށް ދިރާސާތަކުން ދައްކައެވެ. ބައެއް ފަހަރު ސްކޫލްގެ މާހައުލަކީ ބައެއް ކުދިންނަށް އެހާ އުފާވެރި މާހައުލެއް ނޫނެވެ. ބްލީކުރުމާއި، އަނިޔާކުރުމާއި ފުރައްސާރައިގެ އެކިއެކި ކަންކަމާއި ކުދިން ސްކޫލްގެ މާހައުލުގައި ކުރިމަތިލާންޖެހެއެވެ.

ކުއްޖަކަށް ބްލީކުރުން އަނިޔާ ދިނުމަކީ ކުޑަކަމެއްނޫނެވެ. މިފަދަ މައްސަލަތައް ކަމާގުޅުންހުރި އިދާރާތަކުން ބަލައި އެކަށީގެންވާ ފިޔަވަޅުތައްވެސް އަޅަންޖެހެއެވެ. އަދި އެކުދިންނަށް ބޭނުންވާ ފަރުވާއަކީވެސް ފަސޭހަކަމާއިއެކު ލިބޭނެ އިންތިޒާމް ހަމަޖެހިފައިވާ ފަރުވާއަކަށް ވާންޖެހެއެވެ.