ގަސްތައް ކަނޑަނީ، އީޕީއޭ ހުއްދައާ އެކު؟

ރަށްރަށުގައި ހުރި ގިނަދުވަސްވީ ގަސްތައް ކަނޑާތީ ސޭވް މޯލްޑިވްސް ކެންޕެއިނުން ކަންބޮޑުވުން ފާޅުކޮށްފިއެވެ. މި ކަންބޮޑުވުންތައް ފާޅުކޮށްފައި މިވަނީ ވ. ކެޔޮދޫ ސްކޫލުގައި ކްލާސްރޫމް ބަރިއެއް އަޅަން، އެ ރަށުގެ 100 އަހަރަށް ވުރެ ގިނަ ދުވަސްވީ ބޮޑު ނިކަގަހެއް ކަނޑާލާފައިވާ ދަނޑިވަޅެއްގައެވެ.

ކެޔޮދޫ ކައުންސިލުން ވިދާޅުވެފައިވަނީ ގަސް ކަނޑާލީ އީޕީއޭގެ ހުއްދައާއި އެކުގައިކަމަށެވެ. ކްލާސްރޫމް ބަރިއެއް އަޅަން އެގަސް ކަނޑާލުމުގެ ހުއްދަ އީޕީއޭއިންދިނީ އެ ގަހުގެ އެއްވެސް ބައެއް ރަށުން ބޭރުކުރުން މަނާކުރުމަށްފަހުގައި އެ ބައިތައް ރަށުގެ އެހެން ސަރަހައްދުތަކުގައި އިންދުމަށް ޝަރުތުކޮށްފައިކަމަށެވެ. އަދި ސްކޫލުންވެސް މިހާރު ވަނީ މި ގަސް ކަނޑާލުމާއިއެކު ރަށުގެ އެކި ސަރަހައްދުތަކުގައި ވަރަށް ގިނަ ގަސް ޖަހާފައިކަމަށެވެ.

advertisement

މިކަމާއި ގުޅިގެން ސޭވް މޯލްޑިވްސް ކެންޕެއިނުން ބުނީ 100 އަހަރުވީ ގަހެއް ކަނޑާފަ 200 ގަސް އިންދިޔަސް އެ 100 އަހަރުން ރަށުގެ ވެށްޓަށް ލިބިފައިވާ ގުދުރަތީ މުއްސަނދިކަން އަނބުރާނުލިބޭނެކަމަށެވެ. އަދި މިކަމުގެ ކަންބޮޑުވުން ވަނީ ފާޅުކޮށްފައެވެ.

ރާއްޖޭގެ ރަށްރަށުން މިގޮތައް ގަސްތައް ކަނޑާ މައްސަލައަކީ ވަރަށް ގިނައިން ފެންމަތިވާ މައްސަލަތަކެކެވެ. އަދި ގަސްތައް ކަނޑައިގެން އެހެން ތަންތަނަށް ގެންދާ މައްސަލަވެސް ވަރަށް ގިނައިން އަޑުއިވެއެވެ. މިކަންކަމާއި ގުޅިގެން ސޯސަލް މީޑިއާގަވެސް ގިނަބަޔަކު ކަންބޮޑުވުން ފަޅުކުރެއެވެ.

އީޕީއޭ މިނިވަން ތަނަކަށް ހައްދަވާނެކަމަށް ރައީސްވެސް ވަނީ ވިދާޅުވެފައެވެ. ނަމަވެސް މިއަދާއި ހަމައަށް އައިއިރުވެސް މިނިވަން ތަނެއްގެ ގޮތުގައި އީޕީއޭ މަސައްކަތްކުރާ ތަނެއް ނުފެނެއެވެ.