އަހަރެމެންގެ ދަރިން ކްލައިމެޓް ރެފިއުޖީންނަށް ވާން ޖެހޭނެތީ ކަންބޮޑުވުން

މޫސުމަށް އަންނަ ބަދަލުތަކުގެ ސަބަބުން އެންމެ ބޮޑު އަސަރެއް ކުރާ ގައުމަކަށް ރާއްޖެ ވާނެކަން މިއީ އާވާހަކައެއް ނޫނެވެ. މިއީ އަހަރެމެންނަށް އިނގޭ ހަގީގަތެކެވެ. ނަމަވެސް މިކަމަށް އަހަރެމެންނަށް އެޅޭ ފިޔަވަޅުތަކަކީ ކޮބައިތޯ ވިސްނާލަންޖެހެއެވެ. އެންމެ އެކަށީގެންވާ ފިޔަވަޅުތައް އެޅިގެންދޭ ބާވައެވެ؟

މޫސުމީ ބަދަލުތަކަށް މިހާރު އެންމެ އެކަށީގެންވާ ފިޔަވަޅުތައް ނޭޅިއްޖެނަމަ މުސްތަޤްބަލުގައި މީގެ ނޭދެވޭ އަސަރުތައް ރާއްޖެއަށް ކުރާނެއެވެ. އެންމެ ބޮޑު ގެއްލުމަކާއި ހަމަ ގައިމުވެސް ކުރިމަތިލާންޖެހޭނީ އަހަރެމެންގެ ދަރިންނަށެވެ. މޫސުމީ ބަދަލުތަކަށް މިހާރު އަމަލީ ސިފައެއްގައި މަސައްކަތް ނުކުރެވިއްޖެ ނަމަ 2050 ވަނަ އަހަރު އަންނަން ވާއިރަށް ރާއްޖެ އޮންނާނެ ކަމުގެ ބިރު ވަނީ ހީވެފައެވެ. އެހެންކަމުން އަހަރެމެންގެ ދަރިންނަކީ ކްލައިމެޓް ރެފިއުޖީންނަށް ހަދަން އަހަރެމެން ބޭނުންހެއްޔެވެ؟ މިއީ މިއަދު ކޮށްލަންޖެހޭ ސުވާލެކެވެ.

 ތުއްތު ކުދިންނަކީ މޫސުމީ ބަދަލުތަކަށް އެންމެ ކުޑަކޮށް ޒިންމާ ނަގަންޖެހޭ އެހެނަސް މިކަމުގެ އަސަރު އެންމެ ބޮޑަށް ކުރާނެ އެއް ބައެވެ. ޔުނިސެފް ސައުތު އޭޝިއާއިން ވަނީ ރާއްޖޭގައި އުޅޭ ތުއްތު ކުދިން މޫސުމީ ބަދަލުތަކުގެ ސަބަބުން ކުރެވޭ އިހްސާސް ބެލުމަށް އެކުދިންނަށް މިކަމުން ކުރެވޭ އިހްސާސްތައް ކުރެހުމެއްގެ ޒަރިއްޔާއިން ފޯރުކޮށްދިނުމަށް އެދިފައެވެ. ލިބިފައިވާ ކުރެހުންތަކަށް ބަލާއިރު ކުރެހުންތަކުން ދައްކައިދެނީ ވަރަށް ހިތާމަވެރި މަންޒަރެކެވެ. އެކުދިންނަށް މުސްތަގްބަލް ފެންނަނީ ވަރަށް ހިތްދަތިކޮށްކަން މި ކުރެހުންތަކުން ހާމަވެއެވެ.

އެހެންކަމުން މިއަދުގެ ކުޑަކުދިން މާދަމާގެ ޒުވާނުންނަށް ރާއްޖެ އެކުދިންނަށް އުފާވެރިކަމާއިއެކު އުޅެވޭނެ ތަނެއްގެ ގޮތުގައި ވާސިލްކޮށްދިނުމަށް މިއަދު އަހަރެމެން ކުރަންޖެހޭ މަސައްކަތް ގިނަގުނައެވެ. ޙާއްސަކޮށް މަތީ މަގާމުތަކުގައި ތިބި މީހުން މޫސުމީ ބަދަލުތަކުގެ ސަބަބުން ރާއްޖެއަށް ލިބެމުންދާ ގެއްލުންތަކާއި މިކަންކަމާއި މެދު މުޅި ދުނިޔެ ހޭލުންތެރިކޮށް މިހާރުން މިހާރަށް ފިޔަވަޅުތައް އެޅުމަށް މަސައްކަތް ކުރަންޖެހެއެވެ.