ރާއްޖޭގައި ކޮންމެ ޓީޗަރަކަށް 9 ދަރިވަރުން

ރާއްޖޭގައި ކޮންމެ 9 ދަރިވަރަކަށް ޓީޗަރަކު ހުންނަކަމަށް ތަފާސްހިސާބުތައް ދައްކައިފިއެވެ. މިއަހަރުގެ ޓީޗަރުންގެ ދުވަހާއި ދިމާކޮށް ނެރެފައިވާ ތަފާސްހިސާބުތައް ދައްކާގޮތުން ރާއްޖޭގައި މުޅި ޖުމްލަ 10،615 ޓީޗަރުން އެބަތިއްބެވެ. މީގެތެރެއިން %72 އަކީ އަންހެނުންނެވެ. އަދި %28 އަކީ ފިރެހެނުންނެވެ.

މި ތަފާސްހިސާބުތަކަށް ބަލާއިރު ކޮންމެ 9 ކުއްޖަކަށް ރާއްޖޭގައި ޓީޗަރެއް އެބަހުރެއެވެ. މިއީ އަތޮޅުތަކުގެ ސްކޫލްތަކުގައި ކޮންމެ 7 ދަރިވަރަކަށް ޓީޗަރެކެވެ. އަދި މާލޭގެ ސްކޫލްތަކުގައި ކޮންމެ 12 ދަރިވަރަކަށް ޓީޗަރެކެވެ.

advertisement

ރާއްޖޭގައި އުޅޭ ޓީޗަރުންގެ ތެރެއިން %80 ޓީޗަރުންނަކީ ޓްރެއިން ވެފައިވާ ޓީޗަރުންނެވެ. އަތޮޅުތަކުގައި މަސައްކަތްކުރާ ޓީޗަރުންގެ ތެރެއިން 5965 ޓީޗަރުންނަކީ ދިވެހިންނެވެ. އަދި 1737 ޓީޗަރުންނަކީ ބިދޭސީންނެވެ. މާލޭގެ ސްކޫލްތަކުގައި މަސައްކަތްކުރާ ޓީޗަރުންގެ ތެރެއިން ދިވެހިންގެ އަދަދަކީ 2536 އެވެ. އަދި ބިދޭސީ ޓީޗަރުންގެ އަދަދަކީ 377 އެވެ. މި ތަފާސްހިސާބުތަކަށް ބަލާއިރު ރާއްޖޭގައި މަސައްކަތްކުރާ ޓީޗަރުންގެ ތެރެއިން %20 އަކީ ބިދޭސީ ޓީޗަރުންނެވެ.

ރާއްޖޭގައި ކޮންމެ 10 ޓީޗަރަކުން 7 ޓީޗަރަކީ އަންހެނުންނެވެ. މީގެތެރޭގައި ދިވެހިންގެ އަދަދަކީ %72.3 އެވެ. އަދި މާލޭގައި މަސައްކަތްކުރާ އަންހެން ޓީޗަރުންގެ އަދަދަކީ %82.1 އެވެ. އަދި އަތޮޅުތަކުގައި މަސައްކަތްކުރާ އަންހެން ޓީޗަރުންގެ އަދަދަކީ %68.6 ކަމަށް ތަފާސްހިސާބުތަކުން ދައްކައެވެ.