ބިރުދެއްކުމުގެ މައްސަލަތަކުގައި ގިނައީ މަރުގެ އިންޒާރު

ކޮންމެ އަހަރަކުވެސް ބިރު ދެއްކުމުގެ ގިނަ މައްސަލަތަކެއް ފުލުހަށް ހުށައަޅާކަމަށް ތަފާސްހިސާބުތަކުން ދައްކައެވެ. ފުލުހުންގެ 2020 ވަނަ އަހަރުގެ 3 ވަނަ ކުއާޓަރުގެ ކުއްތަކުގެ ތަފާސްހިސާބުތައް ދައްކާގޮތުން މި މުއްދަތުގެ ތެރޭގައި ފުލުހަށް ބިރުދެއްކުމުގެ 155 މައްސަލައެއް ވަނީ ހުށައަޅާފައެވެ.

މި މައްސަލަތަކުގެ ތެރޭގައި އެންމެ ގިނައީ މަރުގެ އިންޒާރުދީގެން ހުށައަޅާފައިވާ މައްސަލަތަކެވެ. މަރުގެ އިންޒާރު ދީގެން ފުލުހަށް މުޅި ޖުމްލަ 37 މައްސަލައެއް ވަނީ ހުށައަޅާފައެވެ.

advertisement

2 ވަނައަށް އެންމެ ގިނައިން ހުށައަޅާފައިވަނީ ބްލެކްމެއިލްކޮށްގެން ހުށައަޅާފައިވާ މައްސަލަތަކެވެ. 2020 ވަނަ އަހަރުގެ 3 ވަނަ ކުއާޓަރުގައި މިފަދަ 25 މައްސަލައެއް ފުލުހަށް ވަނީ ހުށައަޅާފައެވެ.

އިންޓަނެޓް މެދުވެރިކޮށް ބިރުދެއްކުމުގެ މައްސަލަތައްވެސް ގިނައެވެ. ޙާއްސަކޮށް މިހާރު ސޯސަލް މީޑިއާގެ ވަސީލަތްތައް އާންމުވެފައިވާތީ މިގޮތައް މީހުންނަށް ބިރުދެއްކުމުގެ މައްސަލަތައް އަންނަނީ އިތުރުވަމުންނެވެ. އެގޮތުން އިންޓަނެޓް މެދުވެރިކޮށް ބިރުދެއްކުމުގެ 13 މައްސަލައެއް ވަނީ ފުލުހަށް ހުށައަޅާފައެވެ.

މުދަލަށް ގެއްލުން ދިނުމުގެ 6 މައްސަލައެއް ހުށައަޅާފައިވާއިރު، ހަތިޔާރު ބޭނުންކޮށްގެން ބިރުދެއްކުމުގެ 2 މައްސަލައެއް ފުލުހަށް ހުށައަޅާފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.