ކައިވެންޏަށް ފަހު ވެސް ރައްޓެހިން ގެންގުޅުން މުހިއްމު

ބައެއްފަހަރު ކައިވެނި ކުރުމުން މީހާއަށް ގިނަ ބަދަލުތަކެއް އާދެއެވެ. ކައިވެނިކުރުމަށްފަހު ފިރިމީހާއާއި އެކު ވަގުތުހޭދަކުރަން ފެށުމުގެ ސަބަބުން ބައެއް މީހުންނަށް ރަހުމަތްތެރިންނަށް ދެވޭ ވަގުތު މަދުވެ އެކުގައި އެންމެ ގާތްކޮށް އުޅޭ ރަހުމަތްތެރިންގެ މަތިން ހަނދާންނެތޭ ފަހަރުވެސް އާދެއެވެ. ނަމަވެސް ކައިވެންޏަށް ފަހުގައިވެސް ރަހުމްތްތެރިންނާއި ގާތް ގުޅުމެއް ބޭއްވުމަކީ އޭގެ ސަބަބުން މީހާއަށްވެސް ގިނަ ފައިދާތަކެއް ލިބިގެންދާ ކަމެއްކަމަށް ހޯދުންތަކުން ދައްކައެވެ. މި ފައިދާތަކުގެ ތެރޭގައި:

މީހާގެ އުމުރު ދިގުވުމަށް އެހީތެރިވެދޭ

advertisement

ހޯދުންތަކުން ދައްކާގޮތުގައި މީހާގެ އުމުރު އެމީހާ ގެންގުޅޭ ދިރިއުޅުމުގެ ވައްޓަފާޅިއާއި ވަނީ ގުޅި ލާމެހިފައެވެ. އެގޮތުން ދިގު އުމުރެއްގައި ހުރުމަށް އެހީތެރިވެދޭ ކަންތައްތަކުގެ ތެރޭގައި ކަސްރަތުކުރުމާއި، ރަނގަޅު ކާނާކެއުމާއި އަދި ދުންފަތުގެ އިސްތިއުމާލު ކުރުމުން ދުރުވުން ހިމެނެއެވެ.

ނަމަވެސް މީގެއިތުރުންވެސް ހޯދުންތަކުން ދައްކާގޮތުގައި ގުޅުންތައް ވަރުގަދަ ވުމަކީވެސް މީހާގެ އުމުރު ދިގުކޮށްދޭ ކަމެކެވެ. އެގޮތުން ރަހުމަތްތެރިންނާއި ރަނގަޅު ގުޅުމެއް އޮންނަނަމަ މީހާގެ އުމުރު %22 އިތުރުކޮށްދޭކަމަށް ހޯދުންތަކުން ދައްކައެވެ. ހަމައެގޮތައް ރަހުމަތްތެރިން މަދުވެ ނުވަތަ އެއްވެސް ރަހުމަތްތެރިއަކު ނެތްނަމަ މީހާގެ އުމުރަށް އަސަރުކުރެއެވެ. އެގޮތުން މިއީ ދުވާލެއްގެ މައްޗަށް 15 ސިނގިރޭޓު ބޯމީހަކަށްވުރެވެސް ނުރައްކާ ކަމެކެވެ.

ތިމާ ޝައުގުވެރިވާ ކަންކަމަށް ތިމާގެ ބައިވެރިޔާ ޝައުގުވެރި ނުވެދާނެ

މި ދިރާސާގައި ބުނެފައިވަނީ އާއިލާއިން ބޭރުގައި ރަހުމަތްތެރިން ގެންގުޅުމުގެ މުހިންމު ކަމެކެވެ. މީގެ މާނައަކީ އާއިލާއާއި ރަނގަޅު ގުޅުމެއް ނުބާއްވާށެކޭ ނޫނެވެ. މީގެ މާނައަކީ އާއިލާއިން ބޭރުން ރަނގަޅު ރަހުމަތްތެރިން ހުރުމުގެ މުހިންމު ކަމެވެ.

ބައެއް ފަހަރު ތިމާ ޝައުގުވެރިވާ ކަންކަމަށް ތިމާގެ ބައިވެރިޔާ ޝައުގުވެރި ނުވެދާނެއެވެ. ނަމަވެސް މިފަދަ ކަންކަމަށް ޝައުގުވެރިވާ ރަހުމަތްތެރިއަކު ހުރުމަކީ ލިބޭނެ ވަރަށް ބޮޑު އުފަލެކެވެ. މިއީ ތިމާއަށްވެސް އައު ކަންކަން ތަޖުރިބާކޮށް، ކުރިއަށްދިއުމަށް މަގުފަހިވެގެންދާނެކަމެކެވެ.

ބައިވެރިޔާއާ ހިއްސާކުރަން ފަސޭހަ ނޫން ވާހަކަތައް ހުންނާނެ

ބައެއް ފަހަރު ބައެއް ވާހަކަތަކަކީ އާއިލާގެ މެންބަރުން ނުވަތަ ބައިވެރިޔާއާއި ހިއްސާކުރަން އެހާ ފަސޭހަ ވާހަކަތަކަކަށް ނުވެދާނެއެވެ. ނަމަވެސް މިފަދަ ވާހަކަތަކަކީ ގާތް ރަހުމްތެރިއަކާއި ހިއްސާކޮށްލަން ފަސޭހަ ވާހަކަތަކެކެވެ.

ބައިވެރިއާއާއި އޮންނަ ގުޅުން ވަރުގަދަ ކުރުމަށްވެސް ރަހުމަތްތެރިންގެ ރޯލު މުހިންމު ދައުރެއް އަދާކުރެއެވެ. ސަބަބަކީ ދިރިއުޅުމުގައި ދިމާވާ ކަންތައްތަކެއްގެ ސަބަބުން 2 މީހުން ދުރުވާން ބޭނުންވި ނަމަވެސް ރަހުމަތްތެރިއަކާއި މި ވާހަކަތައް ހިއްސާކުރުމުގެ ސަބަބުން ދިރިއުޅުން ނުރޫޅި ކުރިއަށްގޮސްފައި އެބަހުރެއެވެ.

އެހެންކަމުން ކައިވެނީގެ ފަހުންވެސް ތިމާގެ ގާތް ރަހުމަތްތެރިންނާއި ގުޅުން ބަދަހިކޮށް ގުޅުން ދެމެހެއްޓުމަކީ ކައިވެންޓަށްވެސް އަދި ތިމާގެ އަމިއްލަ ނަފްސަށްވެސް އޭގެ ސަބަބުން ގިނަ ފައިދާތަކެއް ލިބިގެންދާނެކަމެކެވެ.