ފަރުތަކުގެ މުހިންމުކަމާއި އެތަންތަން ހިމާޔަތްކުރާނެ ގޮތް ބުނެދޭ ކޯހެއްގައި ބައިވެރިވުމުގެ ފުރުސަތު ހުޅުވާލައިފި
27 އޮކްޓޯބަރ 2021 - 12:19
ފަރުތަކުގެ މުހިންމުކަމާއި އެތަންތަން ހިމާޔަތްކުރާނެ ގޮތް ބުނެދޭ ކޯހެއްގައި ބައިވެރިވުމުގެ ފުރުސަތު ހުޅުވާލައިފިއެވެ. މިއީ ދިވެހި ބަހުން ކުރިއަށްގެންދާ މުޅިން ހިލޭ އޮންނަ ކޯހެކެވެ. މި ކޯހުގައި ފަރުތަކާއި އޭގެ މުހިންމުކަމާއި ފަރުތައް ހިމާޔަތްކުރާނެގޮތްތައް ކިޔާދޭނެއެވެ.
މި ކޯހަކީ އައިއޯއައި އޯޝަން އެކަޑަމީ މޯލްޑިވްސްގެ އޮންލައިން ކޯހެކެވެ. ކޯހުގެ ދިގުމިނަކީ 20 ގަޑިއިރެވެ. މި ކޯސް ފަށާނީ އަންނަ މަހުގެ 14 ގައެވެ. އަދި ކޯސް ނިމޭނީ އަންނަ މަހުގެ 25 ގައެވެ. ކޯސް އޮންނާނީ ހުކުރު ހޮނިހިރު ފިޔަވައި ކޮންމެ ދުވަހެއްގެ ރޭގަނޑު08:30 އިން 10:30 އަށެވެ.
ބައިވެރިވުމުގެ ޝަރުތުތަކުގެ ތެރޭގައި ތައުލީމީ އެއްވެސް ޝަރުތެއް ނުހިމެނެއެވެ. ޝަރުތުތަކުގެ ތެރޭގައި ހިމެނެނީ ހަމައެކަނި އިންޓަނެޓް ބޭނުންކުރެވޭ ކޮންޕިއުޓަރެއް ނުވަތަ ފޯނެއް އޮތުމާއި، ކޯހުގެ ދާއިރާއަށް ޝައުގުވެރިކަން ހުރުމާއި، ކޯސް ނިމެންދެން ބައިވެރިވާން ވަގުތު ދެވުމެވެ. އެހެންކަމުން ޝައުގުވެރިކަން ހުރި ކޮންމެ މީހަކަށްވެސް މި ކޯހުގައި ބައިވެރިވެވޭނެއެވެ.
ރާއްޖޭގެ ފަރުތަކަށް ދިމާވާ މައްސަލަތަކާއި ފަރުތައް ހިމާޔަތްކުރުމުގެ މަސައްކަތް އެކިއެކި އެންޖީއޯތަކާއި އަދި އަމިއްލަ ފަރާތްތަކުންވެސް ދަނީ ކުރަމުންނެވެ. ރާއްޖެފަދަ ޒަރީރާ ގައުމަކަށް އަހަރެމެންގެ ރަށްރަށުގެ ވަށައިގެންވާ ފަރުތައް ހިމާޔަތްކުރުމަކީ ވަރަށް މުހިންމު ކަމެކެވެ.