ސޯޝަލް މީޑިއާގައި ދައުރުވަމުންދާ ސްކޭމް ޕޯސްޓްތަކުގެ ސަބަބުން މޯމްސް ޖަމިއްޔާގެ ކަންބޮޑުވުން

ސޯސަލް މީޑިއާގައި އެހީއަށްއެދި ހަޤީގަތާއި ހިލާފު ޕޯސްޓްތައް ދައުރުވާތީ މަމްސް އެންޖީއޯއިން ކަންބޮޑުވުން ފާޅުކޮށްފިއެވެ.

މަމްސް އެންޖީއޯއިން ކަންބޮޑުވުން ފާޅުކޮށްފައިވަނީ އެ ޖަމިއްޔާއިން އެންމެ ފަހުން ކުރިއަށްގެންދިޔަ ނާޒިމާގެ އާއިލާއަށް އެހީތެރިކަން ފޯރުކޮށްދިނުމަށް ހިންގި ކެންޕެއިންގެ ފޮޓޯތައް ބޭނުންކޮށްގެން އެކައުންޓް ނަންބަރު ބަދަލުކުރުމަށްފަހު ފައިސާ ހޯދުމަށް ކޮށްފައިވާ ޕޯސްޓްތައް ސޯސަލް މީޑިއާގައި ދައުރުވުމާއި ގުޅިގެންނެވެ.

advertisement

މަމްސް އެންޖީއޯއިން ބުނީ މިފަހަކަށް އައިސް ވަރަށް ގިނައިން ސޯސަލް މީޑިއާގައި އެހީއަށް ބޭނުންކުރެވިފައި ހުންނަ ޕޯސްޓްތައް ނަގައިގެން އެކައުންޓް ނަންބަރު ބަދަލުކޮށް މީހުންނަށް އޮޅުވާލައިގެން ނުހައްޤުން ފައިސާ ހޯދަމުންދިއުން އިތުރުވެފައިވާކަމަށެވެ. އަދި މިފަދަ އަމަލުތައް އެ ޖަމިއްޔާއިން ވަރަށް ހަރުކަށި އިބާރާތުން ކުއްވެރިކުރާކަމަށެވެ. އަދި އެމީހުންނަށް ހައްޤު އަދަބު ލިބެންޖެހޭކަމަށެވެ.

މަމްސް އެންޖީއޯއިން ބުނީ އެ އެންޖީއޯގެ ހުރިހައި ކެންޕެއިނެއްގައިވެސް ބޭނުންކުރަމުންދަނީ މަމްސް އެންޖީއޯގެ ނަމުގައި ހުޅުވާފައިވާ އެކައުންޓްތައްކަމަށެވެ. އެހެންކަމުން ފައިސާގެ އެހީތެރިކަން ފޯރުކޮށްދިނުމުގެ ކުރިން އެކައުންޓް ނަންބަރު ޖެހުމަށްފަހު އެކައުންޓްގެ ނަން ރަނގަޅަށް ޔަޤީންކުރުމަށް އެ ޖަމިއްޔާއިން ވަނީ އެދިފައެވެ.

މަމްސްގެ ހުރިހައި ކެންޕެއިނަކާއި ގުޅޭ މައުލޫމާތުތައް މަމްސްގެ ސޯސަލް މީޑިއާ ޕްލެޓްފޯމްތަކުގެ އިތުރުން އިތުބާރުހުރި ޚަބަރު ފަތުރާ ނޫސްތަކުގައި ހިމަނާނެކަމަށް އެ ޖަމިއްޔާއިން ބުނެއެވެ.