“ސުކޫލްތަކުގައި ކުޑަކުދިންނާއިމެދު ހިންގާ ޖިންސީ އަނިޔާ ބަލައެއްނުގަނެވޭނެ”

ސްކޫލްތަކުގައި ޓީޗަރުން ދަރިވަރުންނާއިމެދު ހިންގާ ޖިންސީ ގޯނާގެ މައްސަލަތައް ބަލައިނުގަނެވޭނެކަމަށާއި، އެކަންކަން ބެލުމަށް ރައިޒް އަޕް އެމްވީއިން ގޮވާލައިފިއެވެ. މިގޮތައް ގޮވާލާފައިވަނީ މާލޭގެ މަޝްހޫރު ސްކޫލެއްގެ ޓީޗަރަކު، އޭނާ ކިޔަވައިދޭ ދަރިވަރުންތަކަކަށް ޖިންސީ ގޯނާކުރި މައްސަލައެއް ފެންމަތިވުމާއި ގުޅިގެންނެވެ.

ފުލުހުން ބުނެފައިވަނީ މާލޭގެ ސްކޫލެއްގެ ޓީޗަރަކު، އެ ސްކޫލުގެ ދަރިވަރުންތަކަކަށް ޖިންސީ ގޯނާ ކުރި މައްސަލައެއް މިމަހުގެ 19 ވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ. އަދި އެ މައްސަލަ ތަހުގީގު ކުރަމުންދާ ކަމަށެވެ.

advertisement

ދާދި ފަހުން މާލޭގެ އެހެން ސްކޫލެއްގައި މަސައްކަތް ކުރާ މީހަކު، އެ ސްކޫލުގެ ހަތަރު އަހަރުގެ ޕްރީސްކޫލް ދަރިވަރަކަށް ޖިންސީ ގޯނާ ކޮށްފައިވާ މައްސަލައެއް ވަނީ ފެންމަތިވެފައެވެ.

ރައިޒްއަޕް އެމްވީއިން ބުނީ ޕްރީސްކޫލްގައި އުޅޭ 4 އަހަރުގެ ކުޑަކުއްޖަކަށް އެކުއްޖާގެ ޓީޗަރު ޖިންސީ ގޯނާ ކުރި މައްސަލައެއް ފެންމަތިވެ މާގިނަ ދުވަސްތަކެއް ނުވަނީސް އެހެން ޓީޗަރަކު ގިނަ ދަރިވަރުންތަކަށް ޖިންސީ ގޯނާކޮށްފައިވާ ވާހަކަ ފެންމަތިވެފައިވާކަމަށެވެ. މިއީ އަޅާނުލައި ދޫކޮށްލަންޖެހޭފަދަ މައްސަލަތަކެއް ނޫންކަމަށް ރައިޒްއަޕް އެމްވީއިން ވަނީ ބުނެފައެވެ.

މި 2 މައްސަލައާއި ގުޅޭ މީހުންވެސް މިހާރު ވަނީ ސްކޫލުން ސަސްޕެންޑްކޮށްފައެވެ.