އަމިއްލަ ނަފްސަށް އަޅާލުން: ގިނަ ގިނައިން މަންމަމެން ކުރަން ޖެހޭ ކަމެއް

މަންމައަކަށް ވުމަކީ އުފާވެރި އަދި ހާސްކަން ބޮޑު މަސައްކަތްވެސްމެއެވެ. ތިމާއަކީ އެހެންމީހެއްގެ މުޅި ދިރިއުޅުމުގެ ޒިންމާ ގަންހުރި މީހާއެވެ. ތިމާ އެ ދަރިފުޅުދެކެ ލޯބިވެއެވެ. އަދި ދުނިޔެމަތީގައި އެ ދަރިފުޅަށް ހުރިހައި އުފަލެއް ހޯދައިދޭން ތިމާ ބޭނުންވެއެވެ. މިހެންވުމުގެ ސަބަބުން ތިމާގެ އަމިއްލަ ނަފްސަށް ވިސްނާލުން ކުޑަވެ އަޅާލުން ކުޑަކޮށްލެވެއެވެ. ނަމަވެސް ތިމާގެ އަމިއްލަ ނަފްސަށް ވަގުތު ދިނުމާއި އަޅާކުމަކީވެސް ވަރަށް މުހިންމު ކަމެކެވެ.

މަންމައަކަށް ވުމަށްފަހު ގިނަ ކަންކަމަށް މައިން ކުރިމަތިލާންޖެހެއެވެ. ދިރިއުޅުމުގައި ކުރިމަތިވާ މުޅިން އައު ކަމެއްގެ ސަބަބުން ބައެއް މަންމައިންނަށް “ފޯސްޓްފާޓަމް އެންޒައިޓީ” ދިމާވެއެވެ. މިއީ ވިހެއުމަށްފަހު މަންމައިންނަށް ކުރިމަތިވާ ޑިޕްރެޝަނެކެވެ. މީގެ އަލާމާތްތަކުގެ ތެރޭގައި:

advertisement

• އަވަސްއަވަހަށް މޫޑު ބަދަލުވުން
• ދަރިފުޅާއި ގުޅުން ބަދަހިކުރުމަށް އުނދަގޫވުން
• ނިދިމަދުވުން ނުވަތަ މާގިނައިން ނިދުން
• އަމިއްލައަށް މަރުވުމުގެ ވިސްނުން އައުން
• ކުރިން ގަޔާވާ ކަންކަން ކުރުމަށް ޝައުގުވެރިކަން ނެތުން
• ތިމާއަކީ ރަނގަޅު މަންމައެއް ނޫންކަމުގެ އިހްސާސްކުރެވުން
• އަމިއްލަ ނަފްސަށް ނުވަތަ ދަރިފުޅަށް ގެއްލުންދެވެން އުޅުން

މިފަދަ ކަންކަން ދިމާވާނަމަ ޑޮކްޓަރަކަށް ދައްކައި އެކަމުގެ އެހީތެރިކަން ހޯދުމަކީ ވަރަށް މުހިންމު ކަމެކެވެ. އަދި މިއީ ކުރެވިދާނެ ބައެއް ކަންކަމެވެ.

އަމިއްލަ ނަފްސަށް އަޅާލުން

ތިމާގެ އަމިއްލަ ނަފްސަށް އަޅާލުމަކީ ތިމާގެ ދަރިންނަށް ކޮށްދެވޭ ވަރަށް މުހިންމު ކަމެކެވެ. އެހެންކަމުން ދަރިން ލިބުމަށް ފަހުގައިވެސް އަމިއްލަ ނަފްސަށް އަޅާލާންޖެހެއެވެ. މިއީ ތިމާގެ ދަރިންނަށް އަޅާނުލުމެއް ނޫނެޗެ. ނުވަތަ އަމިއްލަ އެދުން ބޮޑުވުމެއްވެސް ނޫނެވެ. އެއްފަހަރުވެސް އަމިއްލަ ނަފްސަށް އަޅާލާނާމަ ދެވަނަ ފަހަރު މިކަން ކުރަން ފަސޭހަވާނެއެވެ.

މަންމައަކަށް ވުމަކީ އަބަދު ސެކްރިފައިޒް ވުމެއް ނޫން

ދަރިއަކު ލިބުމަށްފަހު ގިނަމީހުންނަށް އެމީހުންގެ ދިރުއުޅުމުގެ ހުރިހައިވެސް އުފަލަކީ ދަރިންނަށް ވެގެންދެއެވެ. އަދި ކުރިން ތިމާ ލޯބިކުރި ކަންކަން ކުރުން ހުއްޓާލައެވެ. ނަމަވެސް ދަރިއަކު ލިބުމަށްފަހުގައިވެސް އަބަދު ދަރިންނަށް ގުރުބާންވުމުގެ ބަދަލުގައި އަމިއްލަ ނަފްސާއިމެދުވެސް ވިސްނާލާށެވެ. މިސާލަކަށް ޝޮޕިންއަކަށް ދިއުމާއި ނުވަތަ ސެލޫންއަކަށް ދިއުންފަދަ ކަންކަން ކުރިން ކުރަމުން އައިނަމަވެސް ފަހުން މިކަންކަން ހުއްޓިގެން އާދެއެވެ. ނަމަވެސް ދަރިން ލިބުމަށް ފަހުގައިވެސް ތިމާ ގަޔާވާ ކަންކަން ހުއްޓާލާކަށް ނުޖެހެއެވެ.

އަމިއްލަ ނަފްސަށް އަޅާލާނަމަ އެދެއްކެނީ ކުދިންނަށް ރަނގަޅު ނަމޫނާއެއް

މަންމައިންގެ ކިބައިން ދަރިން ވަރަށް ގިނަ ކަންކަން ދަސްކުރެއެވެ. އެހެންކަމުން މަންމައިން އަމިއްލަ ނަފްސަށް އަޅާލާނަމަ އެއީ ދަރިން އެކަން ދަސްކުރާނެކަމެކެވެ. މިސާލަށް އަމިއްލަ ނަފްސަށް އަޅާލުމުގެ ގޮތުން ހުސްވަގުތު ނެގުން، ހިނގާލަން ދިއުން، ރަހުމަތްތެރިންނާއި ބައްދަލުކުރުން، ފެންވެރުން، ތެރަޕީނެގުން ފަދަ ކަންކަން ކުރާނަމަ އެ ދަސްކޮށްދެވެނީ ދަރިފުޅަށްވެސް އަމިއްލަ ނަފްސުދެކެ ލޯބިވުމަށެވެ.