ދަރިން މަސްތުވާތަކެއްޗާ ދުރުކުރުމަށް މައިންބަފައިންނާއެކު ކޮލިޓީ ޓައިމް ބޭނުން

ތިބާގެ ދަރިފުޅާއިއެކު ވަގުތު ހޭދަކުރަނީ ކިހާ މިންވަރަކަށްހެއްޔެވެ؟ ދުވާލުގެ 24 ގަޑިއިރުގެ ތެރެއިން ދަރިފުޅަށް ކިތައް ގަޑިއިރު ދެވޭހެއްޔެވެ؟ އާންމުގޮތެއްގައި އަހަރެމެންގެ ދިރިއުޅުން މިހާރު ބައްޓަންވެފައިވާގޮތުން ގިނަ މީހުންނަކީ އޮފީހުގައި ނުވަތަ ކޮންމެވެސް އެހެން ކަމެއްގައި ވަރަށް ބުރަކޮށް އުޅޭ މީހެކެވެ. މީގެ ސަބަބުން ދަރިންނާއިއެކު ހޭދަކުރެވޭ ވަގުތު އޮންނަނީ ވަރަށްބޮޑަށްވެސް މަދުވެފައެވެ. މީގެ ސަބަބުން ދަރިން ބެލުމަށް މީހަކު ހޯދައެވެ. ނުވަތަ ކޮންމެވެސް އެހެން މީހަކަށް ހަވާލުކުރެވެއެވެ. ނަމަވެސް ހޯދުންތަކުން ދައްކާގޮތުން ތިމާގެ ދަރިފުޅާއެކު ގިނަ ވަގުތު ހޭދަކޮށް ކުއްޖާގެ ކަންކަމުގައި ބެލެނިވެރިޔާ ޝާމިލްވާނަމަ މީގެ ސަބަބުން ދަރިންނަށް ގިނަގުނަ ފައިދާތަކެއް ކުރެއެވެ.

ދަރިފުޅުގެ ދިރިއުޅުމުގައި ބެލެނިވެރިޔާގެ ދައުރު ބޮޑުވެ، ސްކޫލް މަސައްކަތްތަކުގައާއި ގޭތެރޭގެ މަސައްކަތްތަކުގައި ބެލެނިވެރިޔާގެ ބައިވެރިވުން ދަރިފުޅުގެ ކަންކަމުގައި ބޮޑުނަމަ ކިޔެވުމުގައާއި ދިރިއުޅުމުގައިވެސް ކުއްޖާއަކީ ކާމިޔާބު ކުއްޖަކަށް ވުމުގެ ފުރުސަތު ބޮޑުކަމަށް ދިރާސާއިން ދައްކައެވެ.

ކުއްޖާގެ ދިރިއުޅުމުގައި ބެލެނިވެރިޔާގެ ދައުރު ބޮޑުނަމަ ކުއްޖާގެ “ވެލްބީން” އަށް ރަނގަޅު އަސަރުތަކެއް ކުރެއެވެ. އަދި ކަންކަމުގައި ކުއްޖާގެ އިލްމު އިތުރުވެ ކަންކަމަށް ލޯހުޅުވި ގޯސްކަންތައްތައް މިސާލަކަށް މަސްތުވާތަކެއްޗަށް ކުއްޖާ ހުށައެޅުން ފަދަ ކަންކަމުން ދުރުވެގެންދެއެވެ.

މިއަދު އަހަރެމެންގެ މުޖްތަމައުގައި މަސްތުވާތަކެތީގެ ވަބާގައި ޖެހިފައިވާ ޒުވާނުންގެ އަދަދު އިންތިހާއަށް އިތުރެވެ. މީގެ ސަބަބުތަކުގެ ތެރޭގައި އާއިލާގެ ތެރެއިން ލިބެންވާ އަޅާލުމާއި ލޯބި ނުލިބުން ހިމެނެއެވެ. ނަމަވެސް ކުއްޖާއާއި ބެލެނިވެރިޔާއާއިމެދު ރަނގަޅު ގުޅުމެއް އުފެދި، ކުއްޖާގެ ކަންކަމުގައި ބެލެނިވެރިޔާގެ އެހީތެރިކަން ލިބޭނަމަ މަސްތުވާތަކެއްޗަށް ދަރިފުޅު ހުށައެޅުން ހުއްޓުވެއެވެ.

މީގެއިތުރުންވެސް ބެލެނިވެރިންގެ އެހީތެރިކަން ލިބޭ ކުދިން މެންޓަލް ހެލްތުގެ މައްސަލަތަކާއި ޑިޕްރެޝަންއަށް ދިއުން މަދެވެ. މީގެއިތުރުންވެސް ބެލެނިވެރިންގެ ފުރިހަމަ ސަޕޯޓާއި އަޅާލުން ލިބިގެން ބޮޑުވާ ކުދިން  ކާމިޔާބުވެ މީގެ ސަބަބުން ގައުމުގެ އިޤްތިޞާދަށްވެސް ރަނގަޅު އަސަރުކުރާކަމަށް ދިރާސާއިން ދައްކައެވެ.