ޤައުމު ކުރިއެރުވުމަށް ތަފާސް ހިސާބުގެ ކަންކަން ހަރުދަނާ ކުރުން މުހިއްމު

ބޯހިމެނުމަކީ ގައުމުގެ ކަންކަން ދެނެގަތުމަށް ކުރާ މުހިންމު މަސައްކަތެކެވެ. ރާއްޖޭގައި އެންމެ ފަހުން ބޯހިމަނާފަވަނީ 2014ވަނަ އަހަރުއެވެ. ބޯހިމެނުމުގެ މަސައްކަތަކީ ރާއްޖޭގެ އާބާދީ ދެނެގަނެ، ކުރިމަގުގައި ކަންކަން ރޭވުމުގައި ބޭނުންވާ މަޢުލޫމާތު އެއްކުރުމަށް ކުރިއަށްގެންދާ މުހިންމު މަސައްކަތެކެވެ. ޤާނޫނުން ލާޒިމުކުރަނީ ކޮންމެ 10އަހަރަކުން 1 އަހަރު މުޅި ރާއްޖެ ހިމެނޭހެން ބޯހިމެނުމުގެ މަސައްކަތް ކުރިއަށްގެންދިއުމަށެވެ.

ޔޫއެން ދުވަހާއި ގުޅުވައިގެން ނޭޝަނަލް ސްޓެޓިސްޓިކް ބިއުރޯއިން ވަނީ ރާއްޖޭގައި ތަފާސްހިސާބު ލިބެންހުރި ގޮތާއި ގުޅޭގޮތުން ސަރވޭއެއްވެސް ކޮށްފައެވެ. މި ސަރވޭގައި ދައްކާގޮތުން ގައުމީ ފެންވަރެއްގައި ރާއްޖޭގައި ތަފާސްހިސާބު ލިބެންހުރި މިންވަރަކީ %34 އެވެ. އަދި އިތުރު މަސައްކަތްތަކާއި އެކު ތަފާސްހިސާބު ލިބޭނެ އިންތިޒާމް ހަމަޖެއްސިދާނެކަމަށް %37 ބުނާއިރު އެއްވެސް ވަރަކަށް މިވަގުތު ތަފާސްހިސާބު ލިބެންނެތް މިންވަރަކީ %28 އެވެ. އަދި ތަފާސްހިސާބު ނުހޯދޭނެކަމަށް ބުނެފައިވަނީ %2 އެވެ.

ނޭޝަނަލް ސްޓެޓިސްޓިކް އޮފް މޯލްޑިވްސްއިން މިހާރު ވަނީ ރާއްޖޭގައި ދެން ކުރިއަށްގެންދާ ބޯހިމެނުމުގެ ސަރވޭ ކުރިއަށްދާނީ އަންނަ އަހަރުގެ ސެޕްޓެމްބަރ 17 ގައި ކަމަށެވެ. އަންނަ އަހަރު ކުރިއަށްގެންދާ ދިވެހިރާއްޖޭގެ ބޯހިމެނުމުގެ މަސައްކަތުގައި ރާއްޖޭގެ އިޤްތިޞާދާ ގުޅުންހުރި މުހިންމު މަޢުލޫމާތުތަކެއް އެއްކުރުމަށް ނިންމާފަވާކަމަށް ނެޝަނަލް ބިއުރޯ އޮފް ސްޓެޓިސްޓިކްސް ބުނެއެވެ.

ރާއްޖޭގެ ތަރައްޤީގެ މުހިންމު ކަންކަން ނިންމުމަށާއި އަދި އެހެނިހެންވެސް އިޤްތިސާދާއި ގުޅުންހުރި ކަންކަމަށް ތަފާސްހިސާބަކީ މުހިންމު އެއްޗެކެވެ. އެހެންކަމުން ހުރިހައި ދާއިރާއަކުންވެސް ތަފާސްހިސާބު ލިބޭނެ މަގުފަހިވެގެންދިއުމަކީ ވަރަށް މުހިންމު ކަމެކެވެ.