ސިޔާސީ ދާއިރާއަށް ޝައުޤުވެރިވާ އަންހެން ބޭފުޅުންނަށް ހާއްސަ “ޕްރެކްޓިސް ޕާލެމެންޓް”

ސިޔާސީ ދާއިރާއަށް ޝައުގުވެރިވާ އަންހެނުންނަށް ޙާއްސަ ތަމްރީން ޕްރޮގްރާމްތަކެއް ފެށުމަށް ނިންމައިފިއެވެ. މިއީ ޔޫއެންޑީޕީ މޯލްޑިވްސްއިން އިންތިޒާމްކޮށްގެން ބާއްވާ ހަރަކާތެކެވެ. ޔޫއެންޑީޕީ މޯލްޑިވްސްއިން ބުނީ މިއީ ސިޔާސީ މައިދާނުގައި ހަރަކާތްތެރިވާން ބޭނުންވާ އަންހެނުންނަށް އޮތް ޙާއްސަ ފުރުސަތެއްކަމަށެވެ.

“ޕްރެކްޓިސް ޕާލަމަންޓް” ގެ ނަމުގައި ކުރިއަށްގެންދާ މި ޕްރޮގްރާމްގައި 25 އަހަރުން މަތީގެ އަންހެނުންނަށް ބައިވެރިވެވޭނެއެވެ. މިމަހުގެ 29 ވަނަ ދުވަހުގެ ކުރިން ބައިވެރިވާން ބޭނުންވާ ފަރާތްތަކުން 9886929 މި ނަންބަރަށް ފުރިހަމަ ނަމާއި، އުޅޭ ރަށާއި އަދި އައިޑީކާޑު ނަންބަރު މެސެޖް ކުރަންޖެހެއެވެ. މި ތަމްރީން ޕްރޮގްރާމް ކުރިއަށްދާނީ ޑިސެމްބަރ މަހުގެ 12 އިން 15 އަށެވެ.

ސިޔާސީ މައިދާނުގައި އަންހެނުންގެ ބައިވެރިވުން މިހާރު މަދެވެ. އަދި މި ދާއިރާއަށް އަންހެނުން ނިކުތުމަށްވެސް ގޮންޖެހުންތަކެއް ހުންނަކަމަށް ބައެއް ފަރާތްތަކުން ބުނެއެވެ. ނަމަވެސް މި ދާއިރާއަށް ނިކުންނަން ބޭނުންވެ ނުނިކުމެވި ތިބި ފަރާތްތަކަށް ޔޫއެންޑީޕީގެ މި ތަމްރީން ޕްރޮގްރާމްއަކީ މުހިންމު ތަމްރީން ޕްރޮގްރާމަކަށް ވެގެންދާނެއެވެ.

ސިޔާސީ މައިދާނުގައި އަންހެނުންގެ ބާރުވެރިކަން އިތުރުކުރުމަށް މި ސަރުކާރުން ވަނީ ކައުންސިލްތަކުގެ ވަކި އިންސައްތައެއް އަންހެނުންނަށް ޙާއްސަކޮށްފައެވެ.