ރޭގަނޑު ނުނިދޭ މައްސަލަ ހައްލުކުރާނީ ކިހިނެތް؟

ރޭގަނޑު ނިދަން އޮށޯއޮވެ ނުނިދުމަކީ ވަރަށް ގިނަ މީހުންނަށް ދިމާވާ މައްސަލައެކެވެ. ނިދަން އުޅެއުޅެ ވަރުބަލިވާއިރުވެސް ނުނިދެއެވެ. އަދި މިކަމާއި ރުޅިގަދަވެސް ވެއެވެ. ރޭގަނޑު ނުނިދުމުގެ މައްސަލަތައް ދިމާވެދާނެ ސަބަބުތައް ވަރަށް ގިނައެވެ.

އާއްމު ގޮތެއްގައި ނިދަން އޮށޯއޮވެ ނުނިދުމުގެ މައްސަލަ ދިމާވަނީ ދިރިއުޅުމުގެ އެކި ކަންކަން ހުންނަ ގޮތުން، އެކަމާ ވިސްނާ ފިކުރުކުރާތީއެވެ. ކަންބޮޑުވެ ހާސްވުމަކީ މީހާ ނިދިން ދުރުކުރާ ކަމެކެވެ. މިގޮތައް ނިދަން އުނދަގޫވާނަމަ ނިދަން އޮށޯތުމުގެ ކުރިން ދެރަކުއަތުގެ ނަމާދެއް ކުރެވިދާނެއެވެ. އެއީ މީހާއަށް ހިތްހަމަޖެހުން ލިބޭނެކަމެކެވެ.

advertisement

ހަޔާތުގައި ދިމާވާ ކަންކަމާމެދު ނިދަން އޮށޯންނައިރު ވިސްނޭނަމަ، އެކިއެކި ޢިލްމީ ފޮތްތައް ކިޔުން މުހިންމެވެ. މިއީ މީހާގެ އިލްމު އިތުރުވެ ކަންކަމާއި މެދުޕޮޒިޓިވްކޮށް ވިސްނުމަށް މަގު ފަހިވެގެންދާނެކަމެކެވެ.

ނިދާ ކޮޓަރީގެ ފިނިހޫނުމިނަކީ ވެސް ނިންޖަށް އޭގެން ނުފޫޒު ފޯރުވާނެ ކަމެކެވެ. ފިނިހޫނުމިން ހުންނަން ވާނީ އާއްމު ގޮތެއްގައި 19 ޑިގްރީ ސެލްސިއަސް އާއި 25 ޑިގްރީ ސެލްސިއަސްއާ ދެމެދުގައެވެ. އެހެންނަމަވެސް ބައެއް މީހުންނަށް މިޑިގްރީ މާބޮޑަށް ފިނިވެދާނެއެވެ.

ނިދަން އޮށޯތުމުގެ ކުރިން އެނާޖީ ޑުރިންކް ބުއިމަކީވެސް ނިދި ނާންނާނެ ސަބަބެކެވެ. އެހެންކަމުން ރޭގަނޑު އެނަރޖީ ޑްރިންކް ބުއިމުން ދުރުވުމަކީވެސް ނިދަން ފަސޭހަވާނެކަމެކެވެ.

ނިންޖަކީ މީހާގެ ހަށިގަނޑު ހަމަޖެއްސުމާއި އަދި އަނެއް ދުވަހުގެ މަސައްކަތައް ތައްޔާރުވުމަށް ކޮންމެހެން ބޭނުންއެއްޗެކެވެ. އެހެންކަމުން އަރާމު ނިންޖެއް ބޭނުންނަމަ މިކަންކަމުން ދުރުވާންޖެހެއެވެ. އަދި ނިދި ނައިސް ގިނައިރުވާނަމަ މިކަންކަން ކޮށްލުމަކީވެސް ނިދަން ފަސޭހަވެގެންދާނެކަމެކެވެ.