ނިދާ ގަޑީގައި ދަރިފުޅަށް ފޮތް ކިޔައިދެނީ ކޮން ބެލެނިވެރިންނެއް؟

ނިދާ ގަޑީގައި ދަރިފުޅަށް ފޮތް ކިޔައިދެނީ ތިޔާގެތެރެއިން ކިތަށް ބެލެނިވެރިން ހެއްޔެވެ؟ މިއީ ކުއްޖާއަށް އޭގެ ސަބަބުން ވަރަށް ގިނަ ފައިދާތަކެއް ލިއްބައިދޭ ކަމެކެވެ.

ފަހުގެ ދިރާސާތައް ދައްކާގޮތުން ކުޑަކުދިންނަށް ވާހަކަ ކިޔައިދިނުމަކީ އެކުދިންގެ ސިކުނޑީގެ މެންޓަލް އިމޭޖަރީ އާއި ނެރޭޓިވް ކޮމްޕްރިހެންޝަން ރަނގަޅުވުމަށް މަގުފަހިކޮށްދޭ ކަމެކެވެ. އެހެންކަމުން ނިދާ ގަޑީގައި ކިޔައިދޭ އެކި ވާހަކަތަކުން ދަރިންނަށް އަމިއްލައަށް އެކި ކަންކަން ތަސައްވަރުކުރަން ދަސްވެ ދޭހަވާ މިންވަރުވެސް އިތުރުވަމުންދާނެ އެވެ.

advertisement

ވާހަކަ ކިޔުމަކީ ކުޑަކުދިންގެ ސްޓްރެސް ވެސް ދަށްކޮށްދޭ ކަމެކެވެ. ވާހަކަ ކިޔުމުން ބޮޑެތި މީހުންގެ ވެސް ނުތަނަވަސްކަމާއި ހާސްކަން ފިލައި ގޮސް، ހަށިގަނޑުގެ މަސްތައް ރިލެކްސް ކުރުވަ އެވެ. ހަމަ މިފަދައިން ކުޑަކުދިންނަށްވެސް ވާހަކަކިޔާދޭނަމަ ސްޓެރެސް ފިލާނެއެވެ.

އަލަށް ވާހަކަދައްކާ ކަންކަން ދަސްކުރާ އުމުރުފުރައިގެ ކުދިންނަށް ވާހަކަ ކިޔައިދިނުމަކީ، ގިނަގިނައިން ވާހަކަ ދައްކަން ހިތްވަރުލިބި، މުވާސަލާތުކުރަން ދަސްވާނެ ކަމެކެވެ. އާންމުކޮށް ކުދިންނަށް ވާހަކަ ކިޔައިދޭ މީހެއްނަމަ ފާހަގަ ވާނެ އެއްކަމަކީ ކުދިންނަކީ އެއް ވާހަކައެއް ތަކުރާރުކޮށް ކިޔުމަށް ލޯބިކުރާ ބައެއްކަމެވެ. ބައެއް ފަހަރު ހަފްތާއެއް ވަންދެން ވެސް އެއް ފޮތެއް ނޫނީ އެއް ވާހަކައެއް އެއްގޮތަކަށް ކިޔައިދޭން ޖެހިދާނެ އެވެ. އަދި މިހެން ކިޔައިދޭނަމަ ފާހަގަވާނެ އެއްކަމަކީ ކުދިންނަށް އެ ފޮތުގައި ވާގޮތް ނިކަން ފުރިހަމަ އަށް ލަފްޒުން ލަފްޒަށް ދަސްވެފައިވާ ކަމެވެ.