އަބަދު ވަރުބަލިވާކަމުގެ އިހްސާސް ކުރެވޭތަ؟

އާންމު ދިރިއުޅުމުގައި ވަރުބަލިކަން އިހްސާސްކުރެވި މީހާގެ ގައިގައި ބުންވަރު ނެތުމަކީ ވަރަށް ގިނަ މީހުންނަށް ދިމާވާ ކަމެކެވެ. ކިތަންމެ ކުޑަ ކަމެއްކޮއްލިއަސް މާއަވަހަށް ވަރުބަލިވުމަކީ މިފަދަ މީހުންނަށް ކުރިމަތިވާ ކަމެކެވެ. މިގޮތައް މިކަން ވާނަމަ އަމިއްލައަށްވެސް ގައިގެ ބުންވަރު އިތުރުކުރުމަށް ކުރެވިދާނެ ކަންކަން އެބަހުއްޓެވެ.

ހަމަނިދި ނިދުން

advertisement

އާންމުކޮށް ދުވާލުގެ ވަގުތުގައި މީހާގެ ހަށިގަނޑުގައި ވަރުދެރަވެ ވަރުބަލިވުން އިހްސާސް ކުރެވެނީ ހަމަނިދި ނުލިބުމުގެ ސަބަބުންނެވެ. އެހެންކަމުން ދުވާލުގެ ވަގުތުގައި އެނަޖައިޒްވުމަށް ރޭގަނޑު ހަމަ ނިދި ހޯދުމަކީ ވަރަށް މުހިންމު ކަމެކެވެ.

ކަންކަމާ މާބޮޑަށް ހާސްނުވުން

އާންމު ދިރިއުޅުމުގައި މާ ބުރަކޮށް އުޅޭނަމަ މީހާ އަވަހަށް ސްޓްރެސްވެ ކަންކަމާއި ހާސްވެއެވެ. ނަމަވެސް މިގޮތައް ކަންކަމާއި ހާސްވާނަމަ މީހާގެ ބުންވަރަށް އަސަރުކޮށް އަވަހަށް ވަރުބަލިވުމުގެ އިހްސާސްކުރެވެއެވެ. އެހެންކަމުން ކަންކަމާއި މާބޮޑަށް ހާސްވާނަމަ އެކަމުން ދުރުވުމަށް އަމިއްލައަށްވެސް ކުރެވިދާނެ ކަންކަން ހުރެއެވެ. އެގޮތުން ހިނގާލަން ދިއުން، ފޮތެއް ކިޔާލުން، އަމިއްލައަށް މީހާ ހަމަޖެހިލުން ފަދަ ކަންކަން ކުރެވިދާނެއެވެ.

ކަސްރަތު ކުރުން

ކަސްރަތު ކުރުމަކީ މީހާ ބައެއް ބަލިތަކުންވެސް ދުރުވުމަށް އެހީތެރިވެދޭ ކަމެކެވެ. އޭގެތެރޭގައި ހިތުގެ ބަލިތަކާއި، ހަކުރު ބަލި ހިމެނެއެވެ. ދިރާސާތަކުން ދައްކާގޮތުގައި ކަސްރަތުކުރުމަކީ މީހާގެ ބުންވަރު އިތުރުކޮށްދޭވެސް ކަމެކެވެ.

ދުންފަތުގެ އިސްތިއުމާލު ނުކުރުން

ދުންފަތުގެ އިސްތިއުމާލު ކުރުމަކީ އޭގެ ސަބަބުން މީހާގެ ސިއްހަތައް ގިނަ ގެއްލުންތަކެއް ލިބޭ ކަމެކެވެ. އަދި ހޯދުންތަކުން ދައްކާގޮތުގައި ދުންފަތުގެ އިސްތިއުމާލު ކުރާނަމަ އަވަހަށް މީހާ ވަރުބަލިކޮށްލައެވެ. މީގެ ސަބަބަކީ ދުންފަތުގެ އިސްތިއުމާލު ކުރުމުގެ ސަބަބުން މީހާގެ ހަށިގަނޑަށް ދައުރުވާ އޮކްސިޖަންގެ އަދަދު ދަށްވުމެވެ. މިއީ މީހާ އަވަހަށް ވަރުބަލިކޮށްލާ ކަމެކެވެ.

ހަށިގަނޑަށް ފައިދާހުރި ކާނާ ކެއުން

އަބަދު މީހާ ވަރުބަލިވެފައި ހުންނަ ނަމަ ކެއުމުގެ ވައްޓަފާޅި ބަދަލުކޮށްލެވިދާނެއެވެ. ބައެއްފަހަރު ކެވޭ އެއްޗެއްގެ ސަބަބުންވެސް ވަރުބަލިވެދާނެއެވެ. އެހެންކަމުން ބުންވަރު އިތުރުކުރުމަށް ހަށިގަނޑަށް ފައިދާހުރި ކާނާ ކެއުމަކީ ވަރަށް މުހިންމު ކަމެކެވެ.

ހަކުރު ގިނައިން އެކުލެވޭ ބުއިންތައް ބޭނުން ނުކުރުން އަދި ގިނައިން ފެން ބުއިން

ބައެއް މީހުން ވަރުބަލިވުމުން ފޮނި އެއްޗެއް ކާލައެވެ. ނަމަވެސް މިއީ ވަގުތީގޮތުން މީހާއަށް ބުންވަރު ލިބޭ ކަމެކެވެ. ނަމަވެސް ފޮނި އެއްޗެހި މާގިނައިން ބޭނުންކުރުމަކީ ފަހުން މީހާ ވަރުބަލިވާނެކަމެކެވެ.