އެއްވެސް ކަމަކާ ނުލާ ދަރިފުޅު ރޮނީ، ކިހިނެއް ހަދާނީ؟

ދަރިފުޅު އެއްވެސް ކަމަކާއި ނުލާ ރޯނަމަ އޭގައި ފޮރުވިފައި ކޮންމެވެސް ކަމެއް ވާނެއެވެ. އާންމުގޮތެއްގައި ކުޑަކުދިން ކަމަކާއި ނުލައި މާގިނައިން ރޯނީ އަހަރެމެންނަށް ނޭންގުނު ނަމަވެސް ކުއްޖާއަށް ކޮންމެވެސް ކަހަލަ އުނދަގުލެއް ވާތީއެވެ. އޭގެތެރޭގައި އޮށޯވެ އޮންނަ ގޮތުގެ ސަބަބުންވެސް ކުއްޖާއަށް އުނދަގޫތަކެއް ވެދާނެއެވެ.

ކުއްޖާ މާގިނައިން ރޯނަމަ އަތްދަނޑިމަތީގައި ކުއްޖާ ބަންޑުން ބޭއްވުމަށްފަހު ކުއްޖާގެ ބަނޑުގައި އަނެއް އަތް ބާއްވާށެވެ. މިގޮތަށް ބޭއްވުމުން ކުއްޖާގެ ބަނޑަށް ވާންވެ، ބަނޑުގައިހުރި ގޭހުގެ ސަބަބުން ކުއްޖާއަށް އުނދަގޫވާނަމަ އެ އުނދަގޫ ފިލައިދާނެއެވެ.

advertisement

ކުއްޖާ ރޯނަމަ މަޑު އަޑެއް ކުއްޖާއަށް އިއްވާލުމަކީވެސް ކުރެވިދާނެކަމެކެވެ. އެގޮތުން ރޭޑިއޯ ޖަހާލުން ނުވަތަ ފަންކާ ޖައްސާލުން ފަދަ ކަންކަން ކުރެވިދާނެއެވެ. ނަމަވެސް މާބާރު އަޑެއް އިވިއްޖެނަމަ ކުއްޖާ ބިރުގަނެ ސިހިދާނެއެވެ.

ކުއްޖާގެ އަތާއި ފައިގެ އިތުރުން ބުރަކަށީގައި މަސާޖްކޮށްލުމަކީ ކުއްޖާ މާގިނައިން ރޯނަމަ ކުރެވިދާނެ ކަމެކެވެ. މަސާޖް ކުރުމުން ކުއްޖާއަށް ހަމަޖެހުން ގެނެސްދީ އަރާމު ނިންޖަކުން ނިދުމަށް އެހީތެރިވެދޭނެއެވެ.

ދިރާސާއަކުން ދެއްކި ގޮތުގައި ކުއްޖާ މީހެއްގެ އުރުގައި ބެއިންދުމުން ހަމަޖެހުން ލިބި، ބިރުގަތުން ފަދަ ކަންކަމުން ކުއްޖާ ދުރުހެލިކޮށްދެއެވެ. އެހެންކަމުން ކުއްޖާ މާގިނައިން ރޯނަމަ އުރުގައި ކުއްޖާ ބައިންދާށެވެ. ނުވަތަ މޭގައި ޖައްސާ ކުއްޖާ ގަޔާލާ ކައިރިކޮށްލާށެވެ.