އެކަށީގެންވާ ވަރަށް ފެން ބުއިން: ގިނަ މީހުންނަށް އުނދަގޫ ކަމެއް

ފެނަކީ އިންސާނާގެ ހަށިގަނޑަށް ވަރަށް މުހިއްމު އެއްޗެކެވެ. އިންސާނާ ދުޅަހެޔޮ ސިއްހަތެއްގައިވުމަށް އެދޭނަމަ ދުވާލަކު 2 ނުވަތަ 3 ލީޓަރުގެ ފެން ބޯންޖެހެއެވެ. ނަމަވެސް މިއީ ވަރަށް ގިނަ މީހުންނަށް ކުރަން އުނދަގޫކަމެކެވެ. އެކަށީގެންވާ މިންވަރަށް ހަށިގަނޑަށް ފެން ނުލިބޭނަމަ ސިއްހީ ގިނަ މައްސަލަތަކާއި ކުރިމަތިވެއެވެ.

ރަނގަޅަށް ފެން ނުބޯނަމަ ކާތަކެތި ހަޖަމުކުރުމުގެ މައްސަލަ ވަރަށް އަވަހަށް ދިމާވެއެވެ. މިކަން ކުރިމަތިވެއްޖެނަމަ ބަނޑުހިކުމުގެ މައްސަލަ ދިމާވެ ބޮޑުކަމުދިއުމަށް ދަތިތައް ކުރިމަތިވެއެވެ. އެހެންކަމުން ކާތަކެތި ފަސޭހައިން ހަޖަމުކޮށް ބަނޑުހިކުުމުން ރައްކާތެރިވުމަށްޓަކައި ގިނައިން ފެންބުއިން ވަރަށް މުހިންމެވެ.

advertisement

ގިނައިން ފެން ބުއިމަކީ ހަންގަނޑުވެސް ރީތިކޮށްދޭ ކަމެކެވެ. ހަންގަނޑު އޮމާންވެ ހަންގަނޑުގައި ތެތްކަން ބެހެއްޓުމަށްޓަކައި ފެންބޯ މިންވަރު އިތުރުކުރަންޖެހެއެެވެ. ގިނައިން ފެން ބޯނަމަ ހަންގަނޑުގައި ހުންނަ ބިހިތަކާއި ލަކުނުތައްވެސް ފިލުވައިލުމަށްވެސް އެހީތެރިވެދެއެވެ.

ކިޑްނީގެ މައްސަލަތަކާވެސް ގިނަ މީހުންނަށް ކުރިމަތިލާން ޖެހެނީ އެކަށީގެންވާ މިންވަރަށް ފެން ނުބޮވޭތީއެވެ. ގިނައިން ފެން ބުއިމަކީ ހަށިގަނޑުގައިވާ ބެކްޓީރިއާ ނައްތާލުމަށް އެންމެ ފަސޭހަ ގޮތެވެ. ހަށިގަނޑުން ބެކްޓީރިއާ ނައްތާލެވޭނަމަ ތަފާތު ބަލިމަޑުކަމުން އިންސާނާ ރައްކާތެރިކޮށްދޭނެއެވެ.

އަވަހަށް ވަރުބަލިވެ ބޯ އެނބުރުމަކީ ބައެއް މީހުންނަށް ވަރަށް އާންމުކޮށް ދިމާވާ މައްސަލައެކެވެ. މިއީ އެކަށީގެންވާ މިންވަރަށް ފެން ނުބޮވޭތީ ދިމާވާ މައްސަލައެކެވެ.

ގަދަ އަވީގައި މަސައްކަތުގައި އުޅޭމީހުން ފެން ބޯންޖެހޭ މިންވަރު އިތުރުވާނެއެވެ. އެއީ އަވީގައި އުޅުމުގެ ސަބަބުން ހަށިގަނޑުން ފެންދާ މިންވަރު އިތުރުވާތީއެވެ.