ބޭރުގައި ކުޅެލަން ކުދިންނަށް ފުރުސަތު ދޭން ޖެހޭ

ކުޑަކުދިން ބޮޑެތިވެގެންއަންނައިރު ކުޅެލާ އުޅެލާނެ މާހައުލެއް އޮތުމަކީ އެކުދިންގެ ހެދިބޮޑުވުމަށް ވަރަށް މުހިންމު ކަމެކެވެ. ނަމަވެސް ރާއްޖޭގެ އާބާދީގެ ގިނަ ބަޔަކު ދިރިއުޅެނީ ވެރިރަށް މާލޭގައެވެ. މާލެއަކީ ކުޑަކުދިން ކުޅެލާ އުޅޭނެ މާހައުލެއް ޤާއިމްވެފައި އޮތް ތަނެއްނޫނެވެ. އެހެންކަމުން އަތޮޅުތެރޭގެ އެހެން ސަރަހައްދުތަކުގައި އުޅޭ ކުދިންނަށްވުރެ ނަފްސާނީ ގޮތުންނާއި ސިއްހީ ގޮތުން މައްސަލަތައް ދިމާވެއެވެ.

މާލޭގައި އުޅޭ ބައެއް މީހުން ވަނީ ޓްވިޓަރގައި ކުޑަކުދިން ކުޅޭލާ އުޅޭނެ މާހައުލެއް ނެތުމުގެ ކަންބޮޑުވުން ފާޅުކޮށްފައެވެ. އެގޮތުން މީހަކު ކޮށްފައިވާ ޓްވިޓެއްގައި ބުނެފައިވަނީ އޭނާ ދިރިއުޅެނީ އޭނާގެ ފިރިމީހާއާއިއެކު މާލޭގެ ވަރަށް ތޮއްޖެހިފައިވާ ސަރަހައްދެއްގައިކަމަށެވެ. އެމީހުންގެ އެޕާޓްމަންޓް ތިރީގައި އުޅޭ އާއިލާއަކީ ސަބަބުތަކަކާއިހެދި މާލޭގައި އުޅެން މަޖުބޫރުވެފައިވާ އާއިލާއެއްކަމަށެވެ. އެގޮތުން އެ އާއިލާގައި އުޅޭ ކުދިން ކުޅެލާނެ މާހައުލެއް ނެތުމުގެ ސަބަބުން ކުޅޭއުޅެނީ ސިޑިމަތީގައިކަމަށް ވަނީ ބުނެފައެވެ.

އެހެންމީހަކު ކޮށްފައިވާ ޓްވިޓެއްގައި ބުނެފައިވަނީ އެމީހުން ކުޑައިރު މަގުމަތީގައި ކުޅެއުޅެވޭ ކަމަށާއި ނަމަވެސް މިހާރު މާލޭގައި ބޮޑުވެގެންއަންނަ ކުދިންނަށް މިފަދަ މާހައުލެއް ގާއިމްވެފައި ނުވާކަމަށެވެ. މިހާރު މާލޭގައި ހުރި ހުސްބިންތައް ޕާކިން ޒޯންތަކާއި، ޑްރައިވިން ފަދަ ކަންކަމަށް ނަގާ ފުރިފައިވާކަމަށެވެ.

ކުޑަކުދިން ގޭތެރޭގެ މާހައުލުން ބޭރުގައި ކުޅެއުޅުމަކީ އެކުދިންނަށް އޭގެ ސަބަބުން ގިނަ ފައިދާތަކެއް ލިބޭކަމެއްކަމަށް ދިރާސާތަކުންވެސް ދައްކައެވެ. އެގޮތުން ލިބޭ ފައިދާތަކުގެ ތެރޭގައި:

• ޖިސްމާނީގޮތުން ލިބޭ ފައިދާ

ދުވެ، ފުންމާ، ބޯޅަ އުކުން، އެއްޗެހި އުފުއްލުން ފަދަ ކަންކަން ކުރުމަކީ ކުއްޖާއަށް ޖިސްމާނީ ގޮތުން ގިނަ ފައިދާތަކެއް ލިއްބައިދޭކަމެކެވެ.

• އެހެންމީހުންނާއިއެކު އުޅެން ދަސްވުން

އެހެން ކުދިންނާއިއެކު ބޭރުގައި ކުޅެން އުޅުމުގެ ސަބަބުން މީހުންނާއިއެކު އުޅެން ދަސްވެ، ލީޑަރޝިޕް ސްކިލްތައް ދަސްވެގެންދާނެއެވެ. އަދި ތަފާތު އައު ކަންތައްތައް ދަސްވުމަށް މަގުފަހިވެ ކުއްޖާގެ ސިކުނޑި ތަނަވަސްވުމަށް އެހީތެރިވެދޭނެއެވެ.

• އުފާވެރިކަން ލިބޭނެ

ބޭރުތެރޭގައި ލިބޭ އަތްވަކީ ކުދިންގެ ސިއްހަތައްވެސް އޭގެ ސަބަބުން ފައިދާލިބޭކަމެކެވެ. މިއީ ކުއްޖާއަށް ވިޓަމިން ޑީ ލިބޭނެ ކަމެއްވެސްމެއެވެ. ގޭތެރޭގައި ކުޅުމަށްވުރެ ބޭރުތެރޭގައި ކުދިން ކުޅޭލަން ފުރުސަތު ލިބުމަކީ އެކުދިންނަށް އުފާވެރިކަން ލިއްބައިދޭނެކަމެކެވެ.