އުމުރާ އަޅާ ބަލާއިރު ކޮލެސްޓްރޯލް ހުންނަންވީ ކިހާ ވަރަކު

ކޮލެސްޓްރޯލްއަކީ އިންސާނުންނާއި، ޖަނަވާރު ތަކުގެ ހަށިގަނޑުގައި  އެކުލެވޭ ލޭގެ ފެނުގެ ބައި ނުވަތަ ލޭގެ ޕްލާޒްމާގައި ހުންނަ ތެޔޮ(ސަރުބީއެކުލެވޭ) މާއްދާ އެކެވެ. މިއީ ސްޓީރޮއިޑް އާއިލާއަށް ނިސްބަތްވާ އޯގެނިކް ކަމްޕައުންޑެކެވެ.

ލޭގައި ކޮލެސްޓްރޯލް ގެ މިންވަރު މަތިވުމަކީ ހިތުގެ ބަލިތަކާއި ލޭހޮޅިތައް ހަރުވުން ފަދަ ބަލިތަކަށް ފުރުޞަތު ހުޅުވިގެންދާނެ ކަމެކެވެ. މިދެންނެވި ބަލިތަކުގައި ލޭހޮޅިތަކުގެ ތެރޭގައި ކޮލެސްޓްރޯލް ނުވަތަ ސަރުބީ ޖަމާވެ، ލޭހޮޅިތަކުގައި ލޭދައުރުކުރުމުގައި ހުރަސްތަކާއި ކުރިމަތި ކުރުވައެވެ. ނަތީޖާއެއްގެ ގޮތުން ހަށިގަނޑުގެ އެކި ހިސާބުތަކަށް ލޭފޮނުވާދޭ މިންވަރު ދަށްވެ، ހިތްހުއްޓުން،ހިތުގެ މަސްގަނޑުން ބައެއް މަރުވުން، އަދި ވާގިނެތޭ ބަލި ޖެހުން ފަދަ ކަންތައްތައް ކުރިމަތި ކުރުވައެވެ. ލޭގައި ކޮލެސްޓްރޯލް ހިމެނޭ މިންވަރު ދަށްކުރުމަށްޓަކައި ކެއުމުގައި ތެޔޮ ނުވަތަ ސަރުބީ އެކުލެވޭ ކާނާ ބޭނުންކުރުން މަދުކުރަން ޖެހެއެވެ. 

advertisement

މީހާގެ އުމުރާއި ގުޅޭގޮތުން އެމީހާގެ ހަށިގަނޑުގައި ކޮލެސްޓްރޯލް ހުންނަންޖެހޭ މިންވަރުވެސް ތަފާތެވެ. އުމުރު މަތިވާވަރަކަށް ކޮލެސްޓްރޯލްގެ މިންވަރުވެސް އިތުރުވެއެވެ.

ދިރާސާތަކުން ދައްކާގޮތުގައި 19 އަހަރުން ދަށުގެ ކުދިންގެ ގައިގައި ކޮލެސްޓްރޯލް ހުންނަންޖެހެނީ 170 މިލިގްރާމްއަށްވުރެ ދަށުގައެވެ. އަދި 20 އަހަރުން މަތީގެ މީހުންގެ ކޮލެސްޓްރޯލް ހުންނަންޖެހެނީ 125 އާއި 200 މިލިގްރާމްއާއި ދެމެދުގައެވެ.

ކޮލެސްޓްރޯލް މަތިވުމަށް މަގުފަހި ކުރުވަފާނެ ކަންތައްތައް

ބައެއް ހާލަތްތަކުގައި ބައެއް މީހުންގެ ލޭގައި ކޮލެސްޓްރޯލް މަތި ކޮށް ހުންނަނީ އައިލީ ގޮތުން ވާރުތަކޮށްފައި ވާތީ ނުވަތަ ވިރާސީ ގޮތުން އައިސްފައިވާ ބަދަލުތަކެއްގެ ސަބަބުން ކަމަށް ވެދާނެ އެވެ. ނަމަވެސް ގިނަ ފަހަރު ކޮލެސްޓްރޯލް މަތި ވާން މެދުވެރިވަނީ ދިރިއުޅުމުގައި ގެންގުޅެވޭ ނުރަނގަޅު އާދަތަކުގެ ސަބަބުން ކަން ފާހަގަކޮށްލަން ޖެހެ އެވެ. އެގޮތުން ކޮލެސްޓްރޯލް މަތިވުމަށް މަގުފަހި ކުރުވަފާނެ ކަންތައްތަކަށް ބަލައިލާއިރު:

ކެއުމުގައި ގެންގުޅެވޭ ނުރަގަޅު އާދަތައް

ކެއުމުގައި ސެޗުރޭޓެޑް އަދި ޓަރާންސް ފެޓް ގިނައިން ހިމެނޭ ކެއުންތައް ކަމަށްވާ އެއްގަމު މަހުގެ ބާވަތްތައް، ޗީސް، ބަޓަރު، ތައްޔާރީ ކާނާ ފަދަ ތަކެތި ގިނައިން ހިމެނުމަކީ ކޮލެސްޓްރޯލް މަތި ވުމަށް މެދުވެރި ކުރުވާ ކަމެކެވެ.

• ސިއްހަތަށް ނުރައްކާވާ ވަރަށް ބަރުދަން އިތުރުވުން
• ހެލިފެލިވެ ނޫޅުން ނުވަތަ ކަސްރަތު ކުރުން މަދުވުން
• ދުންފަތުގެ އިސްތިއުމާލު ކުރުން
• އުމުރުން ދުވަސްވުން
• ހަކުރުބަލި ހުރުން

ކޮލެސްޓްރޯލް ދަށް ކުރުމަށް އެހީތެރިވާ ގިނަ ބޭސްތަކެއް ހުރެ އެވެ. ޑޮކްޓަރުގެ ލަފަޔާ އެއް ގޮތަށް ބޭސް ކެއުމާ އެކި އެކީގައި ދިރިއުޅުމަށް ރަގަޅު ބަދަލުތަކެއް ގެނައުމަކީވެސް މުހިންމު ކަމެކެވެ.

ކޮލެސްޓްރޯލް ދަށް ކުރުމަށް ކެއުމަށް އެދެވޭ ބަދަލު ތަކެއް ގެނައުން މުހިންމު ވާނެ އެވެ. އެގޮތުން ކުރިންވެސް ފާހަގަ ކުރެވުނު ފަދައިން ތެލާއި ސަރުބީގެ ބާވަތްތައް ކެއުމުގައި ހިމަނާ މިންވަރު މަދުކުރަންވާނެ އެވެ. އެގޮތުން އެއްގަމު މަހުގެ ބާވަތްތައްކަމަށްވާ ގެރިމަހެގެ ކެއުންތަކާއި ދުރުވެވިދާނެ އެވެ. އަދި ބިހުގެ ރީނދޫ ބައި ނުކެއުމަށް އާދަ ކުރެވިދާނެ އެވެ. ކެއްކުމުގައި ތެޔޮ ބޭނުން ކުރާއިރު ޒައިތޫނި ތެޔޮ ބޭނުން ކުރެވިދާނެ އެވެ. އަދި ސޮސެޖް، އެހެނިހެން ތައްޔާރީ ކާނާ، ކޯކް އަދި ފެންޓާފަދަ ސޮފްޓް ޑްރިންކްސް އާއި ޕިއްޒާ ބާގާ ފަދަ ކެއުންތަކާ ވީހާވެސް ދުރުވުން ބުއްދިވެރި ވާނެއެެވެ.

މި ކެއުންތަކުގެ ބަދަލުގައި ފައިބަރުން މުއްސަނދި ވެފައިވާ ކެއުންތައް ގިނަ ކުރުންވެސް ބުއްދިވެރި ވާނެ އެވެ. އެގޮތުން އޯޓްސް އަކީ ސޮލިއުބަލް ފައިބަރު ފޯރުކޮށްދޭނޭ ކެއުމެކެވެ. ހަމަ އެހެންމެ ދޮންކެޔޮ، ހޯލް ގްރެއިން ކެއުމުގެ ބާވަތްތައް، ތޮޅީގެ ބާވަތްތަކާއި ބަށްޓަކީވެސް ފައިބަރު ލިބުވައިދިނުމަށް އެހީތެރި ވާނެ ކެއުންތަކެވެ.