ރިސޯޓަށް ދަނީ ޕޭކޮށްފަ، އެކަމަކު ދިވެއްސަކަށް ވީތީ ތަފާތުކުރުން

އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރުފުރޭ ރަންޔޫބީލްއެވެ. ރާއްޖޭގެ ފަތުރުވެރިކަމަށް 50 އަހަރު ވުމާއި ގާތްވެފައިވާއިރު ރާއްޖޭގެ ފަތުރުވެރިކަމަކީ މިއަދު މުޅި ރާއްޖެއަށް މަޝްހޫރު އެހެން ޤައުމުތަކުން މިސާލުނަގާ ފަތުރުވެރިކަމެކެވެ.

ރާއްޖޭގެ ފަތުރުވެރިކަމުގައި މިއަދު ގިނަ ޕްރޮޑަކްޓްތަކެއް އެބަހުއްޓެވެ. ފަތުރުވެރިއަކަށް ތަޖުރިބާކޮށްލަން ބޭނުންވާނެ އެންމެހައި ފެސިލިޓީތައް އެބަހުއްޓެވެ. ރިސޯޓްތަކެވެ. ސަފާރީތައް، ގެސްޓްހައުސްތައް، ހޮޓެލްއެވެ. އަދި އަންނަ މަހުގެ 1 ވަނަ ދުވަހުން ފެށިގެން ހޯމް ސްޓޭ ތައާރަފްކުރުމުގެ މަސައްކަތް ޓޫރިޒަމް މިނިސްޓްރީން ދަނީ ކުރައްވަމުންނެވެ.

advertisement

ރާއްޖެއަންނަ ފަތުރުވެރިންގެ އަދަދު މިއަދު ބޮޑުތަނުން ވަނީ އިތުރުވެފައެވެ.  މިއަހަރުގެ މިހާތަނަށް ރާއްޖެއަށް 1.3 މިލިއަން ފަތުރުވެރިން ވަނީ ޒިޔާރަތްކޮށްފައެވެ. ފަތުރުވެރިން ރާއްޖެ އަންނަ މައިގަނޑު ސަބަބުތަކުގެ ތެރޭގައި ރާއްޖޭގެ ޤުދުރަތީ ރީތިކަމާއި ރާއްޖެއިން ލިބޭ ޚިދުމަތްތަކާއި މެހެމާންދާރީ ހިމެނެއެވެ.

ރާއްޖޭގެ ފަތުރުވެރިކަން މިއަދު މުޅި ދުނިޔެއަށް ފުޅާވެ ބްރޭންޑަކަށް ވެފައިވީނަމަވެސް މި ފަތުރުވެރިކަން ދިވެހިންނަށް ތަޖުރިބާކޮށްލުމުގެ ފުރުސަތު ލިބެނީ ކިހާ މިންވަރަކަށްތޯ މިއީ އުފެދޭ ސުވާލެކެވެ. ރާއްޖޭގައި 140 އަށްވުރެ ގިނަ ރިސޯޓް ހުރިނަމަވެސް މީގެތެރެއިން މަދު ރިސޯޓަކަކަށް ނޫނީ ގެސްޓުންގެ ގޮތުގައި ދިވެހިން އެ ރިސޯޓްތަކަށް ދިއުމުގެ ފުރުސަތެއް ނެތެވެ. އަނެއްބައި ރިސޯޓްތަކުގެ އަގު ބޮޑުކަމުން ދިވެހިންނަށް އެފޯޑެއް ނުކުރެވެއެވެ. ނަމަވެސް މި ދައްކަނީ ރާއްޖޭގެ ފަތުރުވެރިކަމުގެ ވާހަކައެވެ. ދިވެހިންނަށް ތަޖުރިބާކޮށްލަން ނުލިބޭ ދިވެހި ފަތުރުވެރިކަމުގެ ވާހަކައެވެ.

ދިވެހިންގެ މެދުގައިވެސް މިހާރު ރިސޯޓްތަކަށް ޗުއްޓީ ހޭދަކޮށްލުމަށްދާ މީހުންގެ އަދަދު އަންނަނީ އިތުރުވަމުންނެވެ. ބައެއް ރިސޯޓްތަކުގައި ދިވެހިންނަށް ޚާއްސަ ޕެކޭޖްތައްވެސް އެބަހުއްޓެވެ. ނަމަވެސް ހިތާމައަކީ ގެސްޓުންގެ ގޮތުގައި ފައިސާ ދައްކައިގެންދާ ދިވެހި މީހާއާއި ދޭތެރޭގައި ރިސޯޓްތަކުން ތަފާތުކުރުންތައް ގެންގުޅޭތީއެވެ. ޚިދުމަތްދިނުމުގައިވެސް ތަފާތުކުރުންތައް ގެންގުޅެއެވެ. ބައެއްފަހަރު އެމީހުންނަށް އިހްތިރާމް ކުރުން ކުޑަވާ ފަހަރުވެސް އާދެއެވެ. ދިވެހިންނަށް ވީތީ ކަމަށްވެދާނެއެވެ.

ރާއްޖޭގެ ފަތުރުވެރިކަމަށް 50 އަހަރަށް ގާތްވެފައިވާއިރު މިއީ ހަމައެކަނި ފަތުރުވެރިކަމަށް އޮންނަންޖެހޭ ސިނާއަތެއްކަމަށް ޤަބޫލެއްނުކުރެވެއެވެ. އޭގެއިތުރުން ދިވެހިންނަށްވެސް މި ސިނާއަތު ތަޖުރިބާކޮށްލުމުގެ ފުރުސަތު ފަހިކޮށްދޭންޖެހެއެވެ.