މައިގްރެއިންއާއި ނަފްސާނީ ދުޅަހެޔޮކަމާ ހުރީ ކޮން ގުޅުމެއް؟

މައިގްރޭންއަކީ ބޮލުގައި ރިއްސުމެކެވެ. މިއީ ވަރަށް ގިނަ މީހުންނަށް ދިމާވާ ކަމެކެވެ. މައިގްރޭން ހުންނަ މީހަކަށް ދިމާވާ އުނދަގޫތަކުގެ ތެރޭގައި، ވިންދު ޖަހާ ގޮތައް 4 ގަޑިން ތިން ދުވަހަށް ދެމިގެންދާ ރިހުމެއް ބޮލުގައި ހުރުމާއި، ބޮލުގެ އެއް ފަޅީގައި ރިއްސުމާއި، އާދައިގެ ވަރަކަށްވުރެ ބޮޑަށް ބޮލުގައި ރިއްސުމާއި، މަސައްކަތެއްކުރުމުން ރިހުން އިތުރުވުން ފަދަ އަލާމާތްތައް ހިމެނެއެވެ. މީގެއިތުރުން މޭނުބައިކޮށް ހޮޑުލެވުމާއި، އައްޔަށް ނުވަތަ އަޑަށް އުނދަގޫވުމަކީވެސް މައިގްރޭންގެ އަލާމާތްތަކެކެވެ.

މައިގްރޭންއާއި ނަފްސާނީ ދުޅަހެޔޮކަމާއިވެސް ވަނީ ގުޅިފައެވެ. މައިގްރޭން ހުންނަ 6000 މީހުން އެކުލަވާލައިގެން ހެދި ދިރާސާއެއްގައި ދައްކާގޮތުން މައިގްރޭން ހުންނަ މީހުން ނެތް މީހުންނަށްވުރެ ނަފްސާނީ މައްސަލަތައް ދިމާވުން 2 ގުނަ އިތުރެވެ.

advertisement

އެންޒައިޓީ އާއި ޑިޕްރެޝަން

މައިގްރޭން ހުންނަ މީހުންނަށް އެންޒައިޓީ އަދި ޑިޕްރެޝަންގެ މައްސަލަތައް ދިމާވުން ވެސް އެހެން މީހުންނާއި އަޅާބަލާއިރު އިތުރެވެ. އެމެރިކާގެ މައިގްރޭން ފައުންޑޭޝަންއިން ކޮށްފައިވާ ދިރާސާއެއްގައި ބުނެފައިވަނީ މައިގްރޭން ނެތް މީހުންނާއި އަޅާބަލާއިރު މައިގްރޭން ހުންނަ މީހުން ޑިޕްރެޝަންއަށް ދިއުން 5 ގުނަ އިތުރުކަމަށެވެ. އަދި އެންޒައިޓީއަށް ދިއުން 25 ގުނަ އިތުރުކަމަށެވެ.

މާހައުލަށް އަންނަ ބަދަލިުތަކުގެ ސަބަބުންވެސް ބައެއް މީހުންނަށް މައިގްރޭން ތަހައްމަލްކުރަންޖެހެއެވެ. މައިގްރޭން ހުންނަ މީހުން ބައެއް ކާނާ ކެއުމުން ދުރުވުމަށް ޑޮކްޓަރުން ވަނީ އިރުޝާދުދީފައެވެ. އެގޮތުން ޗޮކުލެޓާއި، ކެފެއިންގެ ބާވަތްތަކާއި، ޗީޒް ހިމެނެއެވެ.