ސިންގަލް ޔޫސް ޕްލާސްޓިކް ފޭސްއައުޓް ޕްލޭން މާ ލަސްތަ؟

ތިމާވެއްޓައް ކުރާ ނޭދެވޭ އަސަރު އެންމެ ބޮޑަށް ކުރާނެ ގައުމުތަކުގެ ތެރޭގައި ރާއްޖެ ހިމެނެއެވެ. ސަބަބަކީ ރާއްޖެއަކީ ވަށައިގެން ކަނޑު އޮންނަ ކުދި ޖަޒީރާ ތަކެއްގެ މައްޗަށް އެކުލެވޭ ގޮތަށް އޮތް ގައުމަކަށް ވުމެވެ. ތިމާވެއްޓަށް ކުރާ ނޭދެވޭ އަސަރުގެ ސަބަބުން ރާއްޖެ ސަލާމަތް ކުރުމަށް ދުނިޔޭގެ ފެންވަރުގައި ރާއްޖެއިން އަންނަނީ ގިނަ މަސައްކަތް ކުރަމުންނެވެ.

އެގޮތުން 2023 ވަނަ އަހަރު އަންނައިރު، އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރުން އެއްކޮށް ހުއްޓާލާ ގައުމަކަށް ވުމުގެ އަޒުމް ރާއްޖެއިން ކަނޑައަޅާފައިވާއިރު، މި ލަނޑު ދަނޑި ހާސިލް ކުރެވިދާނެ ކަމާއި މެދު ބައެއް ފަރާތްތަކުން އަންނަނީ ސުވާލު އުފައްދަމުންނެވެ.މި އަމާޒަށް ވާސިލްވުމަށް ސަރުކާރުން ކުރަން ކަނޑައަޅާފައިވާ ކަންތައްތަކުގެ ތެރެއިން ބައެއް ކަންތައްތަކުގެ އަމަލީ މަސައްކަތް މިހާރުވެސް ވަނީ ފަށާފައެވެ. އެ ގޮތުން އެއްފަހަރު ބޭނުންކޮށްފައި އުކާލާ ޕްލާސްޓިކް ކޮތަޅު އެތެރެކުރުން ހުއްޓާލުމާއި، 500 އެމްއެލްގެ ޕްލާސްޓިކް ފުޅި އެތެރެކުރުން ހުއްޓާލުން ފަދަ ކަންތައް ސަރުކާރުން ވަނީ ފަށާފައެވެ. ނަމަވެސް މިފަދަ ކަންތައްތަކަކީ ހާސިލްކުރަން ކަނޑައަޅާފައިވާ ލަނޑުދަނޑި ހާސިލްކުރަން މާ ބޮޑު ކަންތައްތަކެއް ނޫން ކަމަށް ތަޖްރިބާކާރުން އަންނަނީ ވިދާޅުވަމުންނެވެ. އަދިވެސް ކުރަންޖެހޭ ގިނަ ކަންތައްތަކެއް އެބަހުއްޓެވެ.

advertisement

2018 ގައި އުފެދުނު ތިމާވެށީގެ ޖަމްއިއްޔާ އެއްކަމަށްވާ ”ޒީރޯ ވޭސްޓް މޯލްޑިވްސް” ގެ ކޯ ފައުންޑަރ އަހްމަދު އަފްރާހް އިސްމާއިލް ވިދާޅުވީ 2023 ގެ ޓާރގެޓަށް ދެވިދާނެ ކަމާއި މެދު ޝައްކު ކަމަށެވެ.ސަބަބެއް ކަމަށް އޭނާ ފާހަގަކުރެއްވީ ޕްލޭން އިމްޕްލިމެންޓް ކުރުމުގައި ދިމާވާ ލަސްތަކެއެވެ. އޭނާ ވިދާޅުވީ ސިންގަލް ޔޫސްޑް ޕްލާސްޓިކް ފޭސްއައުޓް ޕްލޭން އަކީ ޕްލޭނެއްގެ ގޮތުގައި ރަނގަޅު ޕްލޭނެއް ކަމަށެވެ. ނަމަވެސް ޒީރޯ ވޭސްޓްގެ ވިސްނުމުގައި ފޭސްޓް އައުޓް ކުރަން ނިންމާފައި ހުރި އެއްޗެހި މަދުކަން އޭނާ ވަނީ ފާހަގަކުރައްވާފައެވެ.

“އަދިވެސް ސިންގަލް ޕްލާސްޓިކް އައިޓަމްސް ގައި އީޒީ ވިންސް އެއްޗެހި އެބަހުރި.މިސާލަކަށް ކޮސްމެޓިކްސްގައި މި ހުންނަ މައިކްރޯ ބީޑްސް. މައިކްރޯ ޕްލާސްޓިކްގެ ވާހަކަ ދައްކާއިރު މި ފޭސްގައި އެއް ނެތް މައިކްރޯ ބީޑްސް ބޭން ކުރުމުގެ ވާހަކައެއް. ކުދި ފުޅީގައި ހުންނަ ކުދި ކޮސްމެޓިކްސް އެބަ ބޭންވޭ .އީޒީ ވިންސް ވީ ކުޑް ވިން” އިސްމާއިލް ވިދާޅުވިއެވެ.

ތަޖްރިބާކާރުން ފާހަގަކުރައްވާ ގޮތުގައި ފޭސް އައުޓް ޕްލޭންގެ އެންމެ ބޮޑު ގޮންޖެހުމަކަށް ދިމާވާނީ އިމްޕްލިމެންޓް ކުރުމުގައި ދިމާވާ ދަތިތަކެއެވެ.ޕްލޭންގެ ލަނޑު ދަނޑި އަށް އަމާޒުވާން ދާން ޖެހޭ ސްޕީޑަށް ބަލާއިރު، ވަރަށް އަވަސް ސްޕީޑްގައި ކުރިއަށް ދާން ޖެހެއެވެ. ސަބަބަކީ ވަގުތު ކުޑަތަންވާތީއެވެ. ކަމާއި ގުޅޭ މުހިއްމު ގާނޫނުތައް ޑްރާފްޓްކޮށް މަޖިލީހަށް ވައްދައިގެން ވަރަށް  ހަލުވި ކަމާއެކު މަސައްކަތް ނުކުރެވިއްޖެ ކަމަށް ވާނަމަ 2023 ގެ ލަނޑު ދަނޑި ހާސިލް ވެދާނެ ކަމާއި މެދު ޝައްކު ކަމަށް ތަޖްރިބާ ކާރުން ގެންދަވަނީ ވިދާޅުވަމުންނެވެ.

 މި ކަމުގައި ދިމާވެދާނެ ގޮންޖެހުންތަކަށް ޗެލެންޖްކޮށް އެކަމަށް ރިއެކްޓް ކުރެވޭނެ ޓީމަކާއި އެކު، ވަރަށް ހަލުވި ކަމާއި މަސައްކަތް ކޮށްފިނަމަ މި ވެސް ހަމަ ހާސިލް ކުރެވިދާނެ ކަމެކެއެވެ. ބޭނުންވަނީ ހިތްމަތާއި މިއްނަތާއި އެކު މަސައްކަތް ކުރާނެ ޓީމެކެއެވެ.