އާމްދަނީގެ ގޮތުގައި ދިވެހި ރުކުން ކޮންމެ އަހަރަކަށް ލައްކައިން ފައިސާ!

ރުއް ދަނޑުތަކުގެ ވެރިންރަކީ ޒަމާނުއްސުރެންވެސް ރުކުން އާމްދަނީ ހޯދާ ބަޔެކެވެ. މިހާރުވެސް ބައެއް ރަށްރަށުގެ އޮޑިދޯނި ފަހަރާއި ފިހާރަ ވެރިންނަކީ އެ އާއިލާތަކުގެ ކާބަފައިންގެ ރުއް ދަނޑުތަކުން ފެށިގެން އައި ތަނަވަސްކަމުގެ ސަބަބުން ވިޔަފާރި ކުރަމުން އަންނަ އާއިލާތަކެވެ. އަދި މިހާރުވެސް ރުއް ދަނޑެއް ނުވަތަ ގިނަ އަދަދަކަށް ރުއް ތިބޭ އާއިލާތަކުން ކާށި، ކުރުނބާ، ގަބުޅި، ރުކުރާ ވިއްކައިގެން ރަނގަޅު އާމްދަނީއެއް ހޯދާއިރު، ރުކުގެ ފަނުން ފަންގިވިޔެގެން އަދި ރޯނު ހަދައިގެން ވިއްކައިގެން ވެސް ރަނގަޅު އާމްދަނީ ހޯދައެވެ.

advertisement

ކުޅުދުއްފުށީގައި އެއާޕޯޓު އަޅަން ކަނޑޫފާ ހިއްކުމުގެ ކުރީގައި ކާށި ބޮނބިން ރޯނު ހަދާ މީހުން އަހަރަކަށް ތިން ލައްކަ ރުފިޔާގެ އާމްދަނީ ހޯދާކަމަށް އެރަށުގެ ކައުންސިލުން މައުލޫމާތު ދެއެވެ.

ފަންގިވިޔުމުގެ މަސައްކަތް ކުރާ މީހުން މިހާރުވެސް އަހަރެއްގެ މައްޗަށް 60,000 ރުފިޔާ އާމްދަނީގެ ގޮތުގައި އެ މަސައްކަތުން ހޯދައެވެ. ކާށްޓާއި ގަބުޅި އަދި ކުރުނބާ ވިއްކާ މީހުންވެސް ރަނގަޅު އާމްދަނީއެއް އަހަރެއްގެ މައްޗަށް ހޯދާއިރު، ރުކުރާ ވިއްކައިގެން ވެސް ދިރިއުޅުމުގެ ކަންކަން ހަމަޖައްސާ އާއިލާތައް ރާއްޖޭގެ އެކި ރަށްރަށުގައި ދިރިއުޅެއެވެ. ރަށްރަށުން ރުއް މަދުވުމަކީ މިފަދަ މަސައްކަތް ކުރާ މީހުން މިހާރުވެސް ކުރާ ޝަކުވާއެކެވެ. ރައްޔިތުންގެ އާމްދަނީގެ މަގު ބަންދުވުމުގެ ފުރުސަތު ބޮޑު ނަމަވެސް ބައެއް ރަށްރަށުގެ ކައުންސިލުތަކުން ވެސް ރަށްރަށުގެ ރުއްތައް ވިއްކާފައިވާކަން ފާހަނގަކުރެވެއެވެ. 100 ރުއް ވިއްކައިގެން ކައުންސިލަށް ލިބޭ އާމްދަނީ އަށް ވުރެ މުހިންމީ އެ 100 ރުއް ރަށުގައި ހުރެ، އޭގެއިން ގިނަ ބަޔަކަށް ގިނަ އާމްދަނީ ލިބި ބާރުވެރި ރައްޔިތުންތަކެއް ރަށުގައި ދިރިއުޅުން ނޫންތޯއެވެ؟

އައްޑޫ ބޮނޑި ހަދާ ފަރާތަކުން މައުލޫމާތު ހިއްސާކުރަމުން ބުނެފައިވަނީ ބޮނޑި ހަދަން ބޭނުންވާ ވަރަށް ޅަ ގަބުޅި އާއި ރުކުރާ ލިބުން މިހާރު ވަރަށް ދަތިކަމަށެވެ. އައްޑޫ ބޮނޑި އަކީ ގިނަ ބަޔަކަށް ވަރަށް މީރު ފޮނި ކާ އެއްޗެކެވެ. މިއީ ފުޅާ ދާއިރާއެއްގައި ރާއްޖެ އަދި ރާއްޖެއިން ބޭރަށްވެސް ވިއްކިދާނެ އެއްޗެއް ކަން ފާހަނގަ ކުރަމުން އައިމިނައިދީ ބުނީ މިހާރުވެސް ލިބޭ ހުރިހާ އޯޑަރަކަށް ބޮނޑި ނުހެދޭ ކަމަށެވެ.

އަރިއަތޮޅު ރިޒޯޓުތަކަށް ފަންގި ވިއްކާ، މަރީނާ މި ރިޕޯޓަށް މައުލޫމާތު ދެމުން ބުނީ ފަން ވިޔުމަށް ބޭނުންވާ ވަރަށް ފަން ހޯދުން ދަތިވެފައިވާ ކަމަށެވެ. އެއީ ރަށުތެރެއިން ގިނަ އަދަދެއްގެ ރުއް ބޭރުކުރުމާއި ގުޅިގެން ކަންވެސް އޭނާ ފާހަނގަ ކުރިއެވެ.

ރުކަކީ އޭގެއިން ލިބޭ މާލީ ފައިދާގެ ބޭރުން، ސާފު ވަޔާއި އޮކްސިޖަން ވެސް އުފައްދައިދޭ ގަހެކެވެ. ފަޅުރަށްތަކާއި މީހުން ދިރިއުޅޭ ރަށްރަށުގައި ރުއް އިންދިއްޖެ ނަމަ މިއީ ރަނގަޅު އާމްދަނީ އެއް ހޯދޭނެ ދެމެހެއްޓެނިވި މަގަކަށް ވެގެންދާނެ އެވެ. ހަމަ އެއާއި އެކޔ ރަށުގެ ފިނި ކަމާއި، ހިތްގައިމުކަން ވެސް އެތައް ގުނައަކަށް އިތުރުވެގެންދާނެ އެވެ.