ރާއްޖޭގެ ތައުލީމީ ނިޒާމަށް މޮންޓެސޫރީ ކިލާސްތައް އަލުން ތައާރަފް ކުރުން ކިހިނެތްވާނެބާ؟

މޮންޓެސޫރީ ތައުލީމަކީ ދަރިވަރުންގެ ބޭނުންތަކާއި އެއްގޮތަށް އިސްކަންދީގެން ތަޢުލީމް އުނގަންނައި ދިނުމުގެ ވައްޓަފާޅިއެކެވެ. އިޓަލީވިލާތުގެ ފިޒިޝަނެއް ކަމަށްވާ ޑރ. މަރިއާ މޮންޓެސޫރީ ތަޢާރަފްކުރެއްވި އުނގަންނައި ދިނުމުގެ މި ވައްޓަފާޅި ދުނިޔޭގެ އެކި ކަންކޮޅުތަކުގައި ކާމިޔާބު ކަމާއިއެކު ތަޖުރިބާކުރާތާ ގަރުނެއްވެއްޖެއެވެ. މީގެ ތެރޭގައި އެމެރިކާ، އިނގިރޭސިވިލާތް، ތައިލެންޑް، ސްޕެއިން، އިންޑިއާ ފަދަ ބޮޑެތި ގައުމުތައް ހިމެނެއެވެ.  

މޮންޓެސޫރީ މޮޑެލްއަށް ކިޔަވައިދޭ ކުލާސްރޫމު ތަކުގައި ކުދިން ފެންނާނީ ހެދިފައިވާ ގްރޫޕުތަކާއި އެކު މިނިވަންކަމާއި އަދި އެކަމަށް ޙާއްސަކުރެވިފައިވާ އީޖާދީ ތަކެއްޗާއި އެކު އަމިއްލައަށް އުނގެނުމުގައި މަޝްޢޫލުވެފައިވާތަނެވެ. ކުދިން ތިބޭނީ ވަށައިގެންވާ މާހައުލަށާއި އެއްކުއްޖަކު އަނެއް ކުއްޖަކަށް އިޙްތިރާމްދީގެން އެކުދިން އުނގެނެން ކުރާ މަސައްކަތަށް އެކީ ހުސްވެގެންނެވެ. މިސާލަކަށް ހިސާބު ގަޑީގައި ހިސާބު ކިޔަވާ ހިތްނުވާ އެކަމަކު ކުރަހާ ހިތްވާ ކުއްޖާ، ކްރިއޭޓިވް ކޯނާއަށް ގޮސް ކުރެހުމާއިގެން ކުރިއަށް ދާންވީއެވެ. މޮންޓެސޯރީ ނިޒާމުގައި އުނގަންނައި ދެވެނީ އެ ދަރިވަރެއްގެ އުގެނުމުގެ ކުޅަދާނަކަން ހުރި މިންވަރަކަށް ބަލައިގެންނެވެ. މޮންޓެސޫރީ ކްލާސްރޫމް ތަކަކީ މަލްޓި-އޭޖް ކްލާސްރޫމް ތަކެކެވެ. މާނަ އަކީ އެކި އުމުރުފުރައިގެ ކުދިން އެއްކުލާހެއްގައި ކިޔެވުމާއި އުގެނުމުގައި ބައިވެރިވާނެއެވެ.

advertisement

ޒިންމާނަގަން އެނގޭ މިނިވަން ޚިދުމަތްތެރީން އުފެއްދުމަށްޓަކައި ފަރުމާކުރެވި ހިންގޭ މަލްޓި-އޭޖް ކްލާސްރޫމްތަކެއްގެ ތެރޭގައި ބިނާކުރަނިވި ޚިޔާލުތަކާއި ޝައުޤުވެރިކަމާއި އެކު ކަންކަން އުނގެނިގަތުމަށް ކުދިންނަށް ފުރުޞަތުލިބެއެވެ. ވަކިވަކި ދަރިވަރުންނަށް ބެލިކަމުގައިވިޔަސް އެދަރިވަރަކަށް ކަނޑައެޅިފައިވާ ޓާގެޓްތަކަށް ވާޞިލުވުމަށް ކޮންމެ ދަރިވަރަކުވެސް އެދަރިވަރެއްގެ އަމިއްލަ އިޚްތިޔާރުގައި، އަމިއްލަ ޚިޔާލާއި ފިކުރުތަކާއި އެއްގޮތްތަށް އެދަރިވަރުގެ މިންވަރުން އުނގެނެމުންގޮސް ވާޞިލުވާން ބޭނުންވާ ހިސާބަށް އެންމެ ފުރިހަމަ ގޮތުގައި ވާޞިލުވުމަށް މަގުފަހި ކޮށްދެވެއެވެ.

މޮންޓެސޫރީ ކިލާސްރޫމް ތަކުގައި ކިޔެވުމަށް ކުދިންނަށް މަޖުބޫރު ކުރުވުމާއި، ގަދަކަމުން މަސައްކަތް ހެދުން ނޯންނާނެއެވެ. އެ ދަރިވަރެއްގެ ވިސްނުމާއި ހެދިބޮޑުވުމުގެ މިންވަރާއި ގުޅުވައިގެން ކިޔަވައިދިނުން ކުރިއަށް ގެންދާ މިބާވަތުގެ ކްލާސްތަކެއް ރާއްޖޭގައި މީގެ ކުރިން ހިންގާފައިވެއެވެ. އެއް އުމުރެއްގެ ނަމަވެސް ހެދިބޮޑުވުމާއި އުގެނުމުގެ ފެންވަރު ތަފާތު ކުދިންނަށް އެއްފޮތަކުން އެއް ފެންވަރަކަށް ކިޔަވައިދޭ ދިނުމާއި މެދު ބެލެނިވެރިން ކަންބޮޑުވުން ފާޅު ކުރާ މި ޒަމާނުގައި ރާއްޖޭގެ ތައުލީމީ ނިޒާމަށް މޮންޓެސޫރީ ކިލާސްތައް އަލުން ތައާރަފް ކުރުން ކިހިނެތްވާނެބާއެވެ؟