ގަދަ ހުމާއި ރޯގާ އެއް ފެތުރެނީ

މާލެ އާއި ރާއްޖޭގެ އެކި ސަރަހައްދުތަކުގައި ގަދަ ހުމަކާއި ރޯނގާއެއް ފެތުރެމުން އަންނަ ކަމަށް ޑރ. އަހުމަދު ފައިސަލް ވިދާޅުވެއްޖެއެވެ. ޑރ. ފައިސަލް މިހެން ވިދާޅުވެފައިވަނީ އެބޭފުޅާ ކުރެއްވި ޓުވީޓެއްގައެވެ. މި ހުމާއި ރޯނގާ ޖެހުމުން ގައިގައި، ހާއްސަކޮށް ބޮލާއި އުނަގަނޑުގައި ވަރަށް ބޮޑަށް ރިއްސާ ކަމަށް މައުލޫމާތުލިބެއެވެ. އަދި މިބަލީގެ އަލާމާތްތައް ލުއިވާން ހަފްތާއެއް ވަރު ނަގައެވެ.

މިރޯނގާގެ އިތުރުން ޑެންގީ ހުންވެސް ބާރަށް ފެތުރެމުން އަންނަކަމަށް ޑޮކްޓަރު މައުލޫމާތު ދެއްވައެވެ. ރޯނގާ އިން ސަލާމަތް ވުމަށް ފްލޫ ވެކްސިން ޖެހުމަށާއި، ބަލި މީހުންނާއި އެކު ނޫޅުން، އަތް ދޮވުން، ލޮލާއި ނޭފަތާއި އަނގައިގައި އަތްނުލުން، ވައިރަސް ހަރުލާފައި ހުރެދާނެ ފަދަ ތަންތަން ސާފުކޮށް ޑިސް އިންފެކްޓް ކުރުމަށް ޑޮކްޓަރު އިރުޝާދު ދެއްވައެވެ. އަދި ބަލި ވެއްޖެ ނަމަ ގޭގައި މަޑޫ ކުރުމަށާއި، ކެއްސާ ކިބިހި އަޅާ އިރު އަނގަމަތި ނިވައި ކުރުމަށް ވެސް ނަސޭހަތްތެރިވެއެވެ.

ކުރިއަށް މިއޮތީ ސްކޫލް ބޮޑު ބަންދެވެ. އެހެން ކަމުން، ރައްކާތެރި ގޮތަކީ ބަލިން ސަލާމަތްވެ ތިބެވޭނެ ހުރިހާ ފިޔަވަޅޭއް މިހާރުއްސުރެން އެޅުމެވެ.