ވިލިނގިލި މޫދު ސަރަހައްދު އަންނަ މަހުގެ ކުރިން ހުސްކުރަން އަންގައިފި

މާލޭގައި ބްރިޖް އެޅުމުގެ މަސައްކަތް ކުރާތީ ވިލިނގިލީ މޫދަށް އެރޭ ސަރަހައްދު ދޯނި އެހެލާ ދޯނިފަހަރު މަރާމާތުކުރުމުގެ މަސައްކަތް ކުރާތީ ބައެއް ޖަމާއަތްތަކާއި އާންމުންގެ ކަންބޮޑުވުން ވަނީ ބޮޑުވެފައެވެ. މިކަން ސިޓީ ކައުންސިލްގެ ބެލުމުގެ ދަށައް ގެނެސް މިކަމާއިއެކު ގިނަބަޔަކު ދަނީ ޝުއޫރު ފާޅުކޮށް އަޑުއުފުލަމުންނެވެ.

މިކަމުގައި އެންމެ އިސްކޮށް މަސައްކަތްކުރާ ޖަމިއްޔާއަކީ “ސޭވް ދަ ބީޗް” އެވެ. އެ ޖަމިއްޔާއިން ކޮށްފައިވާ ޓުވިޓެއްގައި ބުނެފައިވަނީ ވިލިނގިލި މޫދަށްއެރޭ ސަރަހައްދު ހިމާޔަތްކުރުމަށް އަޑުއުފުލި އެންމެހައި ފަރާތްތަކަށް މިއަދަކީ ވަރަށް އުފާވެރި ދުވަހެއްކަމަށެވެ. ސިޓީ ކައުންސިލުން ވިލިނގިލީ މޫދު ސަރަހައްދުގައި ފައިބަރ މަސައްކަތްކުރި ހުރިހައި ފަރާތްތަކަށް ޖުލައި މަސް ނިމުމުގެ ކުރިން އެތަން ހުސްކުރަން އަންގާފައިވާކަމަށް ސޭވް ދަ ބީޗްއިން ވަނީ ބުނެފައެވެ.

advertisement

ސޭވް ދަ ބީޗްއިން ބުނީ މިއީ ސަރުކާރުން މަސައްކަތް ފަށާފައިވާ ފައިބަރްގްލާސް ބޯޓްޔާޑުގެ މައްސަލައަށް ހައްލެއް ހޯދުމަށްޓަކައި އެ ޖަމިއްޔާއިން 2022 ގެ ފިތުރު އީދު ދުވަހުން ފެށިގެން ބާއްވަމުން ދިޔަ ‘ޕިކްނިކް’ ޕްރޮޓެސްޓްތައް ކުރިޔަށް ގެންދިޔުމުގެ ގޮތުން ބޭއްވި އެއްވުމެއްކަމަށެވެ.

ސޭވް ދަ ބީޗްއިން ބުނީ މި އަޑުއުފުލުމާއި ގުޅިގެން ފައިބަރ މަސައްކަތްތައް ކުރުމަށް ގުޅީފަޅު އަދި ތިލަފުށިން ވަގުތީ ބިމެއް ހަމަޖައްސައިދެއްވާނެކަމަށް ސިޓީ ކައުންސިލުން ބުނެފައިވާކަމަށެވެ.

 ސޭވް ދަ ބީޗްއިން މިކަން ކުރަނީ އެންމެންގެ ސިއްޙީ ރައްކަލަކަށް!

މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗަރުގެ ‘ލޭންޑް ޔޫޒް ޕްލޭން’ ރެގިޔުލޭޝަންގައިވާ ގޮތުގެ މަތިން ފައިބަރްގްލާސް މަސައްކަތް ކުރުމުގެ ހުއްދަ ދެވޭނީ ބަންދުކުރެވިފާ ހުރި، ރަނގަޅަށް ވެންޓިލޭޓް ކުރެވިފައިވާ އަދި މީހުންދިރިއުޅޭ ނުވަތަ އެއްވެ އުޅޭ ސަރަހައްދުތަކާއި މަދުވެގެން 350 ފޫޓު ދުރުގައިވާ ތަންތަނުގައެވެ. ނަމަވެސް އެއާ ޚިލާފަށް މިބޯޓްޔާޑުގައި މަސައްކަތްކޮށްފައިވަނީ ބޭރުތެރެއަށް ފައިބަރު ދައުރުކުރާނެ ފަދަ ހުޅުވިފާ ހުންނަ ގޮތަކަށެވެ. އަދި ރަނގަޅުގޮތުގައި ކުނި މެނޭޖުކުރުމާއި ނުރައްކާތެރި މެޓީރިއަލްތައް ނައްތާލުމުގެ އެއްވެސް އުސޫލެއް ނެތިއެވެ.

ފައިބަރު މަސައްކަތުގެ ސަބަބުން ނޭވާލުމުގެ ނިޒާމަށް ނޭދެވޭ އަސަރުތަކެއް ކޮށް، ނޭވާލުމުގެ ނިޒާމުގައި މައްސަލަ ހުންނަ މީހުންނަށް ސީރިޔަސް އަދި ފުރާނައަށް ނުރައްކާވާފަދަ ހާލަތްތައް ކުރިމަތިވެދާނެއެވެ. ބޯޓުޔާޑުތަކުގައި ބޭނުންކުރެވޭ ރެޒިންގެ ވިހަގަދަ އާވިތައް ހަށިގަނޑަށް އެތެރެވެއްޖެނަމަ ނޭވާލުމުގެ ނިޒާމަށް އަދި ހަޖަމްކުރުމުގެ ނިޒާމަށް އަސަރުކޮށް، މޭނުބައިކޮށް، ހޮޑުލަވާ، ވަރުބަލިވުންފަދަ ކަންކަން ދިމާވެ، އަޑުއިވުމާއި ނާރުތަަކުގެ ބަލިތަށް ހުންނަ މީހުންގެ ހާލަތު އިތުރަށް ގޯސްވުމަށް މަގުފަހިވެއެވެ.

ނޭވާލުމުގެ ނިޒާމަށް ބޮޑެތި އަސަރުތަކެއް ކުރާ ކޮވިޑްގެ ބަލިމަޑުކަމުން މުޅި ދުނިޔެ ކިރިޔާ އަރައިގަނެވިގެން އުޅޭ ދަނޑިވަޅެއްގައި އާންމު ރައްޔިތުން މިފަދަ ގެއްލުންތަކަށް ހުށަހެޅޭގޮތަށް ބޯޓްޔާޑު އަޅަން ނިންމުމަކީ ބަލައިގަނެވޭނެ ކަމެއް ނޫންކަމަށް އެ ޖަމިއްޔާއިން މީގެކުރން ވަނީ ބުނެފައެވެ.​​​​​​​​