ޚަބަރު

ރިސޯޓުގައި މަސައްކަތްކުރާ ފިރިން އާއިލީ ދިރިއުޅުމުން މަހުރޫމްވުން: އަންބެއްގެ ދުލުން

11 ޖޫން 2022 - 14:27

ރިޒޯޓު ދިރިއުޅުމަކީ ވަރަށް ވޭން ހުރި ކަމެކެވެ. އެކަން އެންމެ ބޮޑަށް އިހުސާސް ކުރެވޭނީ ތިމާގެ އާއިލާ މީހަކު، ފިރިއަކު، އަންބަކު، ބަފަޔަކު ނުވަތަ ދަރިއަކު ރިޒޯޓުގައި މަސައްކަތްކުރާނަމައެވެ.

އަޅުގަނޑަކީ ފިރިމީހާ ރިޒޯޓުގައި މަސައްކަތް ކުރާތީ އެކަނި ދަރިއަކު ބަލަމުން މާލޭގައި ދިރިއުޅޭ މަންމައަކީމެވެ. މާލޭގައި ހިޖުރަވެރީންގެ ގޮތުގައި ދިރިއުޅޭ އާބާދީގެ އެއްބަޔަކީ ތައުލީމަށާއި ސިއްހީ ބޭނުންތަކަށް އަދި އާއިލާއާއި ކައިރީގައި ދިރިއުޅުމަށްޓަކައި މާލެއަށް ދިރިއުޅުން ބަދަލުކުރާ މީހުންނެވެ. އަޅުގަނޑުގެ ދެ ޒަރޫރަތެއް މާލެއާއި ގުޅެއެވެ. އެއީ ދަރިފުޅަށް ބޭނުންވާ ނަފްސާނީ ތެރަޕީ ރަށުންވެސް ރަށް ކައިރިންވެސް ލިބެން ނެތުމެވެ. ދެވަނަ ކަމަކީ ފިރިމީހާ އާއި ގާތުގައި އުޅުމެވެ. އަރިއަތޮޅު ރިޒޯޓެއް ކަމުން އޭނާ އަށް ލިބޭ ޗުއްޓީތަކުގައި މާލެއަށް އައުން ފަސޭހައެވެ.

advertisement

އާއިލީ ދިރިއުޅުމުން ދުރުގައި، އަނބި މީހާއާއި ކުދިންނަށް ކުރާ އަސަރު

ރިޒޯޓުތަކުގައި މަސައްކަތް ކުރާ ފިރިންނާއި ބައްޕައިންނަށް އާއިލާއާއި އެކު އުޅެން ލިބެނީ އެމީހުން އަރާމުކުރަން ލިބޭ ދެތިން ދުވަސް ކަމުން އާއިލީ ދިރިއުޅުމަކީ ކޮބައިކަން އެމީހުންނަށް ރަނގަޅަށް ނުފެނެއެވެ. އަނބިން އެކަނި ހުރިހާ ކަމެއް ހަމަޖައްސަން މަޖުބޫރުވީމާ ދިރިއުޅުން ހަމަޖެހޭ ކަމަށް ފެނުނަސް ވެސް ނުފެންނަ ވަރުބަލިކަމާއި ހާސްކަމާއި ކަންބޮޑުވުންތައް ހުރެއެވެ.

އެހެން ގޮތެއް ނެތީމާ ދިރިއުޅުމާއިގެން ކުރިއަށް ދަނީއެވެ. ހަޔާތުގެ ކަންކަމުގައި އެކުގައި ގާތު ހުރެ އެހީވާނެ ބައިވެރިޔާ އަށް ގާތުގައި ހުރެވޭނެ ނަމައޭ ލައްކަ ފަހަރު ހިތައް އަރައެވެ. ރާއްޖޭގެ އެހެން އެއްވެސް ސަރަހައްދެއްގައި ދިރިއުޅޭނަމަ މިހާރު މި ފެންނަ މިންވަރަށް ވެސް ދަރިފުޅަށް އޭނާގެ ބައްޕަ ނުފެންނާނެއެވެ.

މިއީ ހިތްދަތި ދިރިއުޅުމެކެވެ. މިއީ އަޅުގަނޑުގެ އެކަނި ވާހަކައެއް ނޫނެވެ. ރިޒޯޓުތަކުގައި މަސައްކަތް ކުރާ ސާޅީސް ހާހަށް ވުރެ ގިނަ މީހުންގެ އާއިލާތަކުގެ ވާހަކައެވެ. މި އާއިލާތައް އުޅެމުން އަންނަނީ އެތަކެއް ކަމަކުން މަހުރޫމު ވެގެންނެވެ. މަންމަ އާއި ބައްޕަ އެކުގައި އުޅޭތަން ނުފެނި ބޮޑެތިވާ ކުދިންތަކެކެވެ.

ދަރިން ލޮލަށް ނުފެނި އުޅޭ މުސްކުޅި މައިންބަފައިންނެވެ. އާއިލީ ޒިންމާ ތައް ދަސްނުވެ އުޅޭ މަސައްކަތްތެރިންތަކެކެވެ. މުޖުތަމައުއިން ފެންނަ އެތައް ގިނަ މައްސަލަތަކެއްގެ އަސްލަކީ އާއިލާތައް ބައިބައި ވުމެވެ. ވަރިވެގެންނާއި މައިންބަފައިން މަރުވުމުގެ ސަބަބުން ނިކަމެތިވާ އާއިލާތަކުގެ ވާހަކަތައް ދެއްކި ނަމަވެސް ރިޒޯޓު މަސައްކަތްތެރިންގެ އާއިލާތަކުގެ ވާހަކަ ދައްކާނެ ބަޔަކު ނުތިބެއެވެ.

ރާއްޖޭގެ އިގްތިސާދު ހިންގުމުގައި ގުދު ބިންދަމުން މަސައްކަތް ކުރާ މީހާގެ އާއިލާ އާއި ކުދިންގެ ހާލުގެ ވާހަކައެއް ނުދައްކައެވެ. ބައިބޯ މާލެތެރޭގައި އެކަނިމާއެކަނި ކުދިންނާއި މަންމައިން އުޅޭ ހާލުގެ ވާހަކަ ނުދައްކައެވެ. މަންމައިން މަސައްކަތައް ދާއިރު ކުދިން އެކަނި ގޭގައި ތިބެން ޖެހޭ ވާހަކައެއް ނުދައްކައެވެ.

މިއީ އެކަމުގެ ސަބަބުން މަންމައަށް ވެސް ދަރިއަށްވެސް އެތަކެއް ނަފްސާނީ މައްސަލަތަކެއް ކުރިމަތިކުރުވާ ކަންކަމެވެ. ރިޒޯޓުތަކުގެ މަސައްކަތްތެރިންނަށް ތާހިރު ދިރިއުޅުމެއް އުޅެވޭނީ މާލެ ނޫން ސަރަހައްދުތަކުގައި ވެސް އާއިލާތަކަށް ދިރިއުޅެވޭ ވަރަށް ހިދުމަތްތައް ގާއިމުވެގެންނެވެ. ނައިޓަށް ގެއަށް ދެވުނަސްވެސް ނައިޓަށް ދާން ހުރި ގެ ހުރީ މާލޭގައި ނަމަ މިކަން ކޮޅެއްގައި ނުޖެހެއެއް ނޫނެތޯއެވެ؟

ރިއެކްޝަންސް
6
3
5
124
1
1
2