ޚަބަރު

މޯލްޑިވްސް ވަރޗުއަލް ޓުއަރ އެކްސްޕޯގައި ބައިވެރިވެގެން ސީޕްލޭންގައި ރާއްޖެ ބަލާލުމުގެ ފުރުސަތު

12 ޖޫން 2022 - 12:11

މޯލްޑިވްސް ވަރޗުއަލް ޓުއަރ އެކްސްޕޯ 2022 ގައި ބައިވެރިވާ ފަރާތްތަކުގެ ތެރެއިން ނަސީބުވެރިއަކަށް ޓީއެމްއޭގެ ސީޕްލޭންގައި ރާއްޖެ ދަތުރުކޮށްލުމުގެ ފުރުސަތުދޭން ނިންމައިފިއެވެ.

ޓީއެމްއޭއިން ބުނީ މި ދަތުރުގައި 12 ގަޑިއިރު ރާއްޖެ ވަށައި ދަތުރުކުރާނެކަމަށެވެ. އެގޮތުން ރާއްޖޭގެ 13 އަތޮޅެއްގެ 700 އަށްވުރެ ގިނަ ރަށައް މި ދަތުރުގެ ތެރެއިން އެ ބައިވެރިއަކަށް ދެވޭނެއެވެ.

advertisement

އެކްސްޕޯގައި ބައިވެރިވާ ކޮންމެ މީހަކަށްވެސް މި ފުރުސަތު ލިބިދާނެއެވެ. ނަސީބުވެރިއަކު ހޮވަނީ ގުރުއަތު ނަގައިގެންނެވެ. މީގެއިތުރުން ވަރޗުއަލް ޓުއަރ އެކްސްޕޯގައި ބައިވެރިވާ ފަރާތްތަކުގެ ތެރެއިން ފަރާތަކަށް ރާއްޖޭގައި 50 ދުވަހުގެ ޗުއްޓީއެއް ހޭދަކޮށްލުމުގެ ފުރުސަތުވެސް ލިބޭނެއެވެ.

މޯލްޑިވްސް ވަރޗުއަލް ޓުއަރ އެކްސްޕޯއަކީ ފަތުރުވެރިންނަށް އަމާޒުކޮށްގެން ވާޗުއަލްކޮށް ބާއްވާ ފެއަރއެކެވެ. މި ފެއަރ މެދުވެރިކޮށް ދުނިޔޭގެ އެކި ހިސާބުތަކުން 100 މިލިއަން ފަތުރުވެރިންނަށް ރާއްޖެ އިޝްތިހާރުކުރުމަކީ އަމާޒެކެވެ.


ވާޗުއަލްކޮށް ރާއްޖެ އިޝްތިހާރުކުރާއިރު ބޭނުންކުރާ ފޮޓޯއާއި ވީޑީއޯތައް ނަގާފައިވާގޮތުން، ދުނިޔޭގެ ކޮންމެ ތަނެއްގައި ހުރިނަމަވެސް އެ ރިސޯޓެއް ނުވަތަ ގެސްޓްހައުސްއެއްގެ މަންޒަރުތައް ބަލާލުމުގެ ފުރުޞަތު ލިބިގެންދާނެއެވެ.

މޯލްޑިވްސް ވަރޗުއަލް ޓުއަރ އެކްސްޕޯ ބާއްވަނީ ފަތުރުވެރިން ރާއްޖެ އައުމުގެ ކުރިން އެމީހުންނަށް ރާއްޖޭގެ ރީތި މަންޒަރުތައް ދައްކާލުމުގެ ބޭނުމުގައެވެ. މި ފެއަރ މެދުވެރިކޮށް ރާއްޖެއާބެހޭ ގިނަ މަޢުލޫމާތުތަކެއް އެއް ޕްލެޓްފޯމަކުން ބަލާލުމުގެ ފުރުސަތު ފަތުރުވެރިންނަށް ލިބިގެންދާނެކަމަށް އިވެންޓް އިންތިޒާމްކުރާ ފަރާތުން ބުނެއެވެ.

ރިއެކްޝަންސް
0
0
0
0
0
0
0