ޓެކާސް މައިލޯ ޗެންޕިއަންޝިޕް ގދ. ވާދޫ ޓީމުން ކާމިޔާބުކޮށްފި

ޓެކާސް މައިލޯ ޗެންޕިއަންޝިޕް މޯލްޑިވްސް ކަޕްގެ ޗެންޕިއަންކަން ގދ. ވާދޫ ޓީމުން ހޯދައިފިއެވެ. ވާދޫއިން މި މުބާރާތުގެ ޗެންޕިއަންކަން ހޯދާފައިވަނީ 4-0 އިން ހދ. ކުޅުދުއްފުށީ ޓީމު ބަލިކުރުމަށްފަހުގައެވެ. މި މުބާރާތުގެ ފައިނަލް ބާއްވާފައިވަނީ މިމަހުގެ 10 ވަނަ ދުވަހުއެވެ.

މުބާރާތުގެ ފައިނަލްގައި 2 ޓީމުންވެސް ވަނީ ވަރަށް މޮޅަށް ކުޅެފައެވެ. އެހެންނަމަވެސް ގދ. ވާދޫ ޓީމުން މުޅި މެޗުގައިވެސް ރަނގަޅު ކުޅުމެއް ވަނީ ދައްކާފައެވެ. ވާދޫ ޓީމުން މެޗުގައި ކުޅެފައިވަނީ ވަރަށް ރަނގަޅު ޓީމްވޯކަކާއިއެކުގައެވެ.

މެޗުގައި ވާދޫ ޓީމުގެ ފުރަތަމަ ލަނޑު އެ ޓީމަށް ކާމިޔާބުކޮށްދިނީ ޖަރޒީ ނަންބަރު 21 އިޔާދުއެވެ. މި ގޯލު އިޔާދު ކާމިޔާބުކުރީ ޖަރޒީ ނަންބަރު 10 އަޔާޒް އަޙްމަދު ހުރަސްކޮށްދިން ބޯޅައަކުންނެވެ. މެޗުގައި ވާދޫ ޓީމުގެ 2 ވަނަ އަދި 3 ވަނަ ލަނޑު ކާމިޔާބުކޮށްދިނީ އެ ޓީމުގެ ޖަރޒީ ނަންބަރު 9 އެއް ނަޝާހުއެވެ.

މެޗުގެ އެންމެ ފަހު ލަނޑު ވާދޫ ޓީމަށް ކާމިޔާބުކޮށްދިނީ ޖަރޒީ ނަންބަރު 7 މުޙައްމަދި ނާއިލްއެވެ. މި ގޯލު ޖަހަން އޭނާއަށް މަގުފަހިކޮށްދިނީ އަޔާޒް އަހްމަދެވެ.