ބޯހިމެނުމުގެ “ޕައިލެޓް ސެންސަސް” މިއަދުން ފެށިގެން މިމަހުގެ 26 އާ ހަމައަށް ކުރިއަށްދާނެ

ބޯހިމެނުމަކީ ޤައުމީ ފެންވަރެއްގައި ކުރިއަށްދާ ވަރަށް މުހިއްމު ބޮޑު ހަރަކާތެއްކަމަށް ވުމާއިއެކެ، މިފަދަ ހަރަކާތެއް ކުރިއަށްގެންދިއުމަށްޓަކައި ވާންޖެހޭ ފުރިހަމަ ތައްޔާރީތައް ވުމުގެ ގޮތުން ބާއްވާ ޕައިލެޓް ސެންސަސް 14 އިން 26 ޖޫން 2022 އަށް ކުރިއަށް ގެންދިއުމަށްވަނީ ހަމަޖެހިފައެވެ. “ޕައިލެޓް ސެންސަސް” އަކީ ބޯހިމެނުމުގެ އަސްލު ހަރަކާތުގެ ކުރިން ބޯހިމެނުމުގެ ހުރިހާ މަރުޙަލާތަކެއް ކުރިޔަށްދާނެ ގޮތް ދެނެގަތުމަށް ހިންގާ ހަރަކާތެކެވެ.

މިހަރަކާތް ކުރިއަށްގެންދިއުމަށް ހަމަޖެހިފައިވަނީ މާލެ، ހުޅުމާލެ، ކުޅުދުއްފުށި ސިޓީ އަދި ހދ. ނޮޅިވަރަމް އިން ހޮވާލެވިފައިވާ ސަރަހައްދު ތަކެއްގައެވެ. އަދި މީގެއިތުރުން މާލޭގެ ހާބަރު ސަރަހައްދު، ތިލަފުށި، އަދި ޕެރަޑައިސް އައިލެންޑް ރިސޯޓްގައި މިހަރަކާތް ކުރިއަށްގެންދިއުމަށް ވަނީ ހަމަޖެހިފައެވެ.

advertisement

މިގޮތުން ހޮވާލެވިފައިވާ ސަރަހައްދުތަކުގެ ގޭބިސީތަކާއި މަސައްކަތްހިންގާ ތަންތަނަށް 14 ޖޫން އިން ފެށިގެން 26 ޖޫން 2022 ގެ ނިޔަލަށް ކޮންމެ ދުވަހަކުވެސް ހެނދުނު 00:9 އިން 00:18 އާއި ދެމެދު މައުލޫމާތު ނެގުމަށްޓަކައި މިބިއުރޯގެ ޓީމްތަކުން ޒިޔާރަތްކުރަމުން ގެންދާނެއެވެ. މައުލޫމާތު އެއްކުރުމުގައި ހަރަކާތްތެރިވާ ފަރާތްތަކަށް، މޯލްޑިވްސް ބިއުރޯ އޮފް ސްޓެޓިސްޓިކްސްގެ ހުއްދަ ދެވިފައިވާ މީހެއްކަން އަންގައިދޭ ފާހެއް ދޫކުރެވިފައިވާނެއެވެ. މަޢުލޫމާތު ދިނުމުގެކުރިން އެއީ މިފާސް އޮތްމީހެއްތޯ ބެލުމަކީ އާންމު ރައްޔިތުންގެ ޒިންމާއެއްކަމުގައިވެސް ބިއުރޯއިން ދެންނެވިއެވެ.

ޤާނޫނު ނަންބަރ 2021/16) ދިވެހިރާއްޖޭގެ ތަފާސްހިސާބުގެ) ޤާނޫނުގެ 41 ވަނަ މާއްދާގެ ދަށުން ދިވެހިރާއްޖޭގެ އާބާދީއާއި ދިރިއުޅޭ ތަންތަނުގެ ބޯހިމެނުމެއް މަދުވެގެން ކޮންމެ 10) ދިހައެއް) އަހަރަކުން 1) އެކެއް) ފަހަރު ބާއްވަންވާނެއެވެ. މިގޮތުން ދެން ބޯހިމެނުން ބޭއްވުމަށް ކަނޑައެޅިފައިވަނީ 13 އިން 25 ސެޕްޓެމްބަރ 2022 އަށެވެ. މިމުއްދަތުގައި “އާބާދީ އާއި ދިރިއުޅޭތަންތަނުގެ ބޯހިމެނުން” އަދި “އިޤްތިސާދީ މަސައްކަތްތަކުގެ ބޯހިމެނުން” ބޭއްވުމަށްވަނީ ހަމަޖެހިފައެވެ.

ބޯހިމެނުމުގައި ގޭބިސީތަކުން އަދި އާންމު ފަރުދުންގެ ކިބައިން ނެގިގެންދާނެ ބައެއް މައުލޫމާތުގެ ތެރޭގައި ދިރިއުޅޭތަނާއި ބެހޭ މައުލޫމާތު، ގޭބިސީ ދިރިއުޅޭ ތަނުގެ ބޮޑުމިން، މީހުންގެ އުފަން ތާރީޚް، ހާސިލްކޮށްފައިވާ އެންމެމަތީ ތައުލީމު، އާމްދަނީ ހޯދުމަށް ކުރާ މަސައްކަތް، ފުރަތަމަ ކައިވެނި ކުރި ޢުމުރު، އަންހެނުންނަށް: ދަރިންގެ އަދަދު ، ފުރަތަމަ ދަރިފުޅު ލިބުނު ޢުމުރު ފަދަ މައުލޫމާތު ހިމެނެއެވެ.

އަދި މަސައްކަތް ހިންގާ ތަންތަނުން ނެގިގެންދާނެ މައުލޫމާތުގެ ތެރޭގައި ތަނުގެ ރަޖިސްޓްރޭޝަން ނަންބަރުގެ މައުލޫމާތު، ތަނުގައި ހިންގާ މައިގަނޑު މަސައްކަތުގެ ތަފްސީލު، ވަޒީފާގައި ގެންގުޅޭ މުއައްޒަފުންގެ އަދަދު، ތަނުގެ އާމްދަނީ އާއި ޙަރަދު (މުސާރައާއި އުޖޫރަ، ކުލި، ފެން ކަރަންޓް، ފޯނާއި އިންޓަރނެޓް، ތެލުގެ ބާވަތްތައް އަދި ތަކެއްޗަށް ހިނގި ޚަރަދު) ގެ މައުލޫމާތު ހިމެނެއެވެ.