މަސައްކަތުގެ ސްޓްރެސް އަމިއްލަ ދިރިއުޅުމާއި ދުރުކުރާނީ ކިހިނެތް؟

މަސައްކަތުގެ މާހައުލުގައި ވަރަށް ގިނަ މީހުން މަސައްކަތްކުރަނީ ސްޓްރެސްގައެވެ. ކޮންމެވެސް ކަމެއް އަބަދުވެސް އޮންނަނީ ވަގުތައް ނިންމަންޖެހި ނުނިންމިފައެވެ. ނުވަތަ ސްޓްރެސްވާ ކޮންމެވެސް ކަމެއް ކޮންމެ ދުވަހެއްގެ އޮފީސް މާހައުލުގައިވެސް ދިމާވެއެވެ. މިއީ ގިނަ މީހުންގެ މަސައްކަތުގެ މާހައުލުގެ ކަންކަން ކުރިއަށްދާގޮތެވެ.

ނަމަވެސް މަސައްކަތުގެ މާހައުލުގެ ސްޓްރެސް ހިފައިގެން ގެއަށްދާނަމަ އެއީ މައްސަލައެކެވެ. ނުވަތަ ގޭގައި އުޅޭ ވަގުތުގައިވެސް އަބަދު އޮފީހަށް ވިސްނަންޖެހި ދިރިއުޅުމުގެ އެހެން ކަންކަމަށް މީގެ އަސަރު ކުރާނަމަ އެކަން ބަދަލުކުރަން އެބަޖެހެއެވެ. އެހެންކަމުން އޮފީހުގެ މާހައުލުގައި ދިމާވާ ސްޓްރެސް ކުޑަކުރުމަށް ކުރެވިދާނެ ކަންކަން އެބަހުއްޓެވެ. އޭގެތެރޭގައި:

advertisement

ތިމާއަށް އޭގެ އަސަރުކުރާގޮތް ދެނެގަނޭ

މިއީ ވަރަށް އާދައިގެ ކަމެއްގެ ގޮތުގައި ގިނަ މީހުން ދެކިދާނެއެވެ. ނަމަވެސް މިއީ ވަރަށް މުހިންމު ކަމެކެވެ. ދުވަސް ނިމިގެންދާއިރު މަސައްކަތުގެ މާހައުލުގައި ދިމާވާ ކަންކަމުގެ ސަބަބުން އަންނަ ސްޓްރެސްއިން މީހާއަށް ކުރާ އަސަރު ދެނެގަންނާށެވެ.

މާގިނަދުވަހު މަސައްކަތުގެ މާހައުލުގައި ދިމާވާ ކަންކަމަށްވާ ސްޓްރެސް މެނޭޖްނުކުރާނަމަ މުސްތަޤްބަލުގައި ސިއްހީ މައްސަލަތައް ދިމާވުން އެކަށީގެންވެއެވެ. އޭގެތެރޭގައި ބާންއައުޓްވުމާއި، ޑިޕްރެޝަން އަދި އެންޒައިޓީ ފަދަ ކަންތައްތައް ދިމާވުމަށް މެދުވެރިވެއެވެ.

ސްޓްރެސްވާން ދިމާވާ ކަންކަން ހަނދާންކުރޭ

މަސައްކަތުގެ މާހައުލުގައި ސްޓްރެސްވާން ދިމާވަނީ ކޮންކޮން ކަންތައްތަކެއްތޯ ބަލައި އެކަންތައްތައް ޖާނަލްއެއްގައި ނަމަވެސް ލިޔެލެވިދާނެއެވެ. 1 ހަފްތާ ވަންދެން މިގޮތައް ޖާނަލްެއެއް ލިޔެލެވިދާނެއެވެ. އޭގައި ސްޓްރެސްވާން ދިމާވި ކަންކަމާއި ތަންތަން އަދި މީހުންވެސް ހިމެނިދާނެއެވެ. އަދި އެކަންކަން ހައްލުކުރުމަށް ކުރި ކަންކަންވެސް ނޯޓު ކުރެވިދާނެއެވެ.

އަމިއްލަ ނަފްސަށް ވަގުތު ހުސްކުރޭ

އޮފީހުގެ ބިޒީ ޝެޑިއުލުން ކޮންމެވެސް ވަގުތެއް އަމިއްލަ ނަފްސަށް ހުސްކުރާށެވެ. އެއިރުން މަސައްކަތުގެ މާހައުލުގައި ބާންއައުޓް ވުމުން ސަލާމަތްވާނެއެވެ. މި ހުސްކުރާ ވަގުތަކީ ތިމާގެ މޫޑް ރަނގަޅުވެ ކުރާހިތްވާ ކަމެއްކޮށްލާ ވަގުތަކަށް ހަދާށެވެ. އޭގެތެރޭގައި ވީޑިއޯއެއް ބަލާލުން، ލަވައެއް އަޑުއަހާލުން، ކާހިތްވާ ކަހަލަ އެއްޗެއް ކާލުން ނުވަތަ ވާހަކަދައްކާލާ ހިތްވާ މީހަކާއި ވާހަކަދައްކާލުން ފަދަ ކަމެއްވެސް ކުރެވިދާނެއެވެ.

މަސައްކަތްތައް ބަހާލާ ވަގުތު މެނޭޖްކުރުން

މަސައްކަތުގެ މާހައުލުގައި ބައެއްފަހަރު މާބޮޑަށް ސްޓްރެސްވާން ދިމާވާ ސަބަބަކީ ކުރަންޖެހޭ މަސައްކަތްތައް ގިނަވުމެވެ. އެހެންކަމުން މަސައްކަތްތައް މުހިންމު ތަރުތީބުން ބަހާލެވިދާނެއެވެ. އެއިރުން މުހިންމު ތަރުތީބުން ކަންކަން ކުރެވި ވަގުތު ސަލާމަތްވާނެއެވެ.

އޮފީހާއި އަމިއްލަ ދިރިއުޅުން ބެލެންސްކުރޭ

ދިރިއުޅުމުގެ ހުރިހައި ވަގުތެއް މަސައްކަތުގެ މާހައުލަށް ހުސްވާނަމަ މީހާ ސްޓްރެސްވެ ބާންއައުޓް ވާނެއެވެ. އޭގެބަދަލުގައި އޮފީސް ވަގުތުގައި އޮފީހުގެ މަސައްކަތްކޮށް ގެއަށް ދިއުމަށްފަހު އަމިއްލަ ދިރިއުޅުމަށް ވަގުތު ހުސްކުރާށެވެ. ގޭގައި އުޅޭ ވަގުތުތަކުގައި އޮފީހުގެ މަސައްކަތުގައި ނޫޅޭށެވެ.

ވަށައިގެންވާ މީހުންނަކީ ސަޕޯޓްކުރާ ބަޔަކަށް ހަދާ

ތިމާގެ ވަށައިގެންވާ މީހުންނަކީ ތިމާއަށް ސަޕޯޓްކުރާ ރަނގަޅު ބައެއްނަމަ ސްޓެރެސްވުމުން ދުރުކޮށްދޭނެއެވެ. އެހެންކަމުން އާއިލާއާއި ގާތް ރަހުމަތްތެރިންނަކީ ތިމާއަށް ސަޕޯޓްކުރާ ސްޓްރެސްއިން ދުރުކޮށްދޭ ބަޔަކަށް ހަދާށެވެ. އޮފީހުގައި ބިޒީކޮށް އުޅޭ ދުވަސްކޮޅެއްނަމަ އާއިލާ ނުވަތަ ރަހުމަތްތެރިންނަށް ތިމާގެ އަމިއްލަ ކަންކަން ބެލެހެއްޓުމަށް އެހީތެރިކަން ފޯރުކޮށްދެވިދާނެއެވެ. މިސާލަކަށް ތިމާގެ ދަރިންގެ ކަންކަން ބެލެހެއްޓުން ފަދަ ކަންކަމެވެ. އެއިރުންވެސް ސްޓްރެސް ކޮންމެވެސް ވަރަކަށް ކުޑަވާނެއެވެ.

އަމިއްލަ ނަފްސަށް އަޅާލާ

ކިތަންމެ ބިޒީކޮށް އުޅުނު ނަމަވެސް އަމިއްލަ ނަފްސަށް އަޅާލުމަށް ހަނދާންކުރަންޖެހެއެވެ. އެގޮތުން ނިދުމާއި، ކެއުން ފަދަ ކަންކަން ހިމެނެއެވެ.

އޮފީހުގެ ގޮސިޕްތަކުން ދުރުވޭ

މަސައްކަތުގެ މާހައުލަކީ އެހެންމީހުންގެ ވާހަކަދައްކާ ގޮސިޕްގެ ކަންތައް ބޮޑު ތަނެކެވެ. އެހެންކަމުން ސްޓްރެސްއާއި އަދި އަމިއްލަ މީހާގެ ނަފްސާނީ ފުޅަހެޔޮކަމަށް މިފަދަ ކަންކަމުން ދުރުވުމަކީ ވަރަށް މުހިންމު ކަމެކެވެ. އޮފީހުގެ މީހަކު ގޮސިޕް ކުރަން އުޅޭނަމަވެސް އޭނާއާއި ދުރުވެ ވަގުތު ހޭދަކުރުން މަދުކުރެވިދާނެއެވެ.

ޗުއްޓީއެއް ހަދާލުން

އޮފީހުގެ މާހައުލުން ކުޑަކޮށް ދުރުވެ ޗުއްޓީއެއް ހަދާލުމަކީ ސްޓްރެސްއިން ދުރުވުމަށް ވަރަށް މުހިންމު ކަމެކެވެ. ކޮންމެހެން މާދުރު ޤައުމަކަށް ދާކަށް ނުޖެހެއެވެ. ސްޓޭކޭޝަންއެއް ނުވަތަ ކައިރި ރަށަކަށް ވެސް ދެވިދާނެއެވެ. ބޭނުންވަނީ އޮފީސް މާހައުލުން ދުރުވެލާ މީހާގެ ސިކުނޑި ތާޒާކޮށްލުމެވެ.