ކުއްޖަކު ހޯދުމުން ކައިވެނީގައި ޖެހޭ މައްސަލަތައް ހައްލުވޭތަ؟

ދެމަފިރިއެއްގެ މެދުގައި ގިނަ މައްސަލަތަކެއްޖެހި އެކަން ހައްލުކުރުމަށް ގިނަ ކަންތައްތަކެއް ކޮށްފާނެއެވެ. ނަމަވެސް އެއިން އެއްވެސް ކަމެއްގެ ނަތީޖާ ނުފެނި އެ ގުޅުން ރަނގަޅުވާތަން ނުފެނިދާނެއެވެ. އެހެންކަމުން ބައެއް މީހުން އަމިއްލަނަފްސަށް ހިތައް އަރާފައެވެ. ކުއްޖަކު ހޯދަންވީއެވެ. އެއިރުން އަހަރެމެން 2 މީހުންގެ ދިރިއުޅުމުގައި މިޖެހޭ މައްސަލަތައް ހައްލުވެ 2 މީހުންގެ ގުޅުން ރަނގަޅުވެދާނެއެވެ.

މިއީ ހަމަގައިމުވެސް މީހަކު ހިތައް އަރާފާނެ އެއްޗެއްކަމާއިމެދު ސުވާލެއް ނުއުފެދެއެވެ. ނަމަވެސް މައްސަލަޖެހޭ ދިރިއުޅުމެއް ރަނގަޅުވާނެކަމަށް މުޅި ދިރިއުޅުން ބަދަލުކޮށްލާފަދަ ނިންމުމެއްކަމަށްވާ ދަރިއަކު ހޯދާލުމުގެ ކުރިން ވިސްނާލަންޖެހޭ ބައެއް ކަންތައްތައް އެބަހުއްޓެވެ.

advertisement

ކުއްޖަކު ހޯދުމަކީ ހާސްކަން ބޮޑު ކަމެއް

މާބަނޑު ދުވަސްވަރުގައި އަންހެންމީހާ އުފުލާ ތަކުލީފުން ފަށަމާ ހެއްޔެވެ. މާބަނޑުވުމާއި ގުޅޭގޮތުން ލިޔެފައިހުންނަ އެންމެ އާދައިގެ ފޮތްތަކުގައިވެސް މާބަނޑު ދުވަސްވަރަކީ އަންހެންމީހާއަށް ގިނަ އުނދަގޫތަކަކާއި ތަކުލީފުތަކެއް އުފުލަންޖެހޭ ކަމެއްކަން އިނގެއެވެ. އޭގެތެރޭގައި ދުވާލު ދިމާވާ “މޯނިން ސިކްނެސް” އެވެ. ބައެއް ފަހަރު ކޮންމެ ދުވަހަކުވެސް މިކަމާއި ކުރިމަތިލާންޖެހެއެވެ. ހޮޑުލެވުމެވެ. ފައިގައި ރިއްސުމާއި އައްސިވުމެވެ. މިހެންގޮސް މާބަނޑު ދުވަސްވަރުގައި އެތަކެއް ކަންތައްތަކަކާއި އަންހެންމީހާ ކުރިމަތިލާންޖެހެއެވެ. އަދި ޑޮކްޓަރުންގެ އެޕޮއިންޓްމަންޓްތަކާއި ޗެކައަޕްތައް ހީކުރާ ވަރަށްވުރެވެސް ގިނައެވެ.

ވިހާނެ ދުވަހަކަށް އިންތިޒާރުކުރުމަކީވެސް ސްޓްރެސް އިތުރުވާ ކަމެކެވެ. ވިހާނެ ވަކި ދުވަހެއް ނޭންގި އެތަކެެއް ދުވަހެއް މަޑުކުރަންވެސް ޖެހެއެވެ. އަދި މިކަމަށް މަޑުކުރާއިރު ކުއްޖާ ދުނިޔެއަށް އުފަންވުމުގެ ކުރިން އެތައްކަމެއް ތައްޔާރުކުރަންޖެހެއެވެ. ގޭތެރޭގައި ކުއްޖާ ނިދާ ކޮޓަރި ތައްޔާރުކުރުމާއި ވިހެއުމަށް ހޮސްޕިޓަލަށް ދިއުމުގެ ކުރިންވެސް ކަންކަން ތައްޔާރުކުރަން ޖެހެއެވެ.

ތިމާއަށް އަޅާލާ އޯގާތެރި ފިރިޔަކު ހުރިނަމަވެސް މިކަންތައްތަކަކީ އުނދަގޫ ކަންތައްތަކެކެވެ. ނަމަވެސް ދެމަފިރިންގެ މެދުގައި ހަމަނުޖެހުންތައް އުފެދިފައިވާނަަމަ ޕްރެގްނެންސީއަކީ އަންހެންމީހާއަށް އެކަނިވެރިކަން ވަރަށް ބޮޑަށްވެސް އިހްސާސްކުރެވޭ ދުވަސްތަކަށް ވެގެންދާނެއެވެ. އަދި ހަނދާނުގައި ބަހައްޓަންވީ ކަމަކީ ކުއްޖާ ދުނިޔެއަށް އުފަންވުމަށްފަހުގައި ދިރިއުޅުން ކުރިން އޮތްގޮތައް ނުދާނެކަމެވެ. އޭގެތެރޭގައި ދަންވަރުގެ ވަގުތުތަކުގައި ކުއްޖާއަށް ފީޑްކުރަން ހޭލަންޖެހުމާއި، ކުއްޖާގެ އެހެނިހެންވެސް ކަންކަން ބެލުމާއި، ނެޕީ ބަދަލުކުރުން ފަދަ ކަންތައްތަކަކީ ކުއްޖާ ބޮޑުވަންދެން ކުރަންޖެހޭ ކަންތައްތަކެވެ.

އެމެރިކާގެ ސައިކޮލޮޖިކަލް އެސޯސިއޭޝަނުން ވަނީ މިކަމާއި ގުޅޭގޮތުން ދިރާސާއެއް ކޮށްފައެވެ. މި ދިރާސާގައި ބުނެފައިވަނީ ކުއްޖަކު ލިބުމަކީ ދެމަފިރިންގެ ގުޅުން ރަނގަޅު ނަމަވެސް ކައިވެންޏަށް އިތުރު ސްޓްރެސްތަކެއް އަންނަ ކަމެެއްކަމަށެވެ. އަދި މިކަމުގެ ސަބަބުން މިހާރުވެސް ސްޓްރެސް އޮތް ދިރިއުޅުމަކަށް އިތުރު ސްޓްރެސްތަކެއް އަންނާނެއެވެ. ދަރިއަކު ލިބުމަކީ ކުރިން 2 މީހުން އެކަކު އަނެކަކަށް ދޭ ވަގުތު މަދުވެގެންދާނެކަމެއްވެސް މެއެވެ.

ސަޕްރައިޒް ބެކްފަޔަރ ކޮށްފާނެ

ބަނޑުބޮޑުކަން އިނގި ފިރިމީހާ “ސަޕްރައިޒް” ކޮށްލުމަށް ހިތައް އަރާފާނެއެވެ. އަދި ބަނޑުބޮޑުކަން އިނގި ފިރިމީހާ އުފަލުން އައިސް ތިބާ އުރާލާ ކޮލަށް ދޮނެއްދީ ޝުކުރިއްޔާއޭ ތިޔައީ އަހަރެން އެންމެ ބޭނުންވި ކަންތަކޭ ބުނާނެކަމަށް ހިތައް އަރާފާނެއެވެ. ނަމަވެސް ތިޔަ ގުޅުމުގައި މައްސަލަތަކެއްޖެހި އެކަން ހައްލުކުރުމަށް ދަރިއަކު ހޯދުމުގެ ކުރިން މިއީ ވެދާނެ ކަމެއްކަން ދަންނާށެވެ. ފަހަރުގައި ފިރިމީހާއަށް ވުރެ ބޮޑަށް ސަޕްރައިޒްވާނެ މީހަކީ އަނބިމީހާ ކަމުގައިވެސް ވެދާނެއެވެ. ކައިވެނީގެ ހާލަތު އޮތްގޮތުން ފިރިމީހާ ދަރިއަކު ބޭނުންނުވެ އެބޯޝަންއަކަށް ދިއުމަށް ނުވަތަަ އެޑޮޕްޝަންއަކަށް ދަރިފުޅު ދިނުމަށް ބުނެފާނެއެވެ. ނޫންނަމަ ފިރެހެންމީހާއަށް ދަރިއަކު ލިބޭ ހިސާބުން އޭނާ ބަނދެވި، އެއްވެސް މިނިވަންކަމެއް ނުލިބި، ނުވަތަ އަންހެންމީހާ ބޭވަފާތެރިވެދާނެއޭ ހިތައް އަރާފާނެއެވެ.

މިއީ ކުއްޖާއަށް ދެވޭ ބޮޑު ޒިންމާއެއް

ފުރަތަމަވެސް ދަރިފުޅު ހޯދަނީ “ކައިވެނި ސަލާމަތްކުރަން” ކަމުގައިވާނަމަ އެ ތުއްތު ކުއްޖާގެ ކޮނޑުގައި ތިޔަ އެޅުވެނީ ވަރަށް ބޮޑު ޒިންމާއެކެވެ. ދަރިފުޅު އުފަންވަނީ އެއްވެސް ކަމެއްނުކުރެވޭ ކުއްޖެއްގެ ގޮތުގައިކަމުގައިވީނަމަވެސް މައިމީހާގެ ބަނޑުގައި ދަރިފުޅު އޮންނަ ހިސާބުން ފެށިގެން އެ ތުއްތު ދަރިފުޅަށް ކަންކަން އިނގެން ފަށާނެއެވެ. ދިރާސާތަކުންނާއި ހޯދުންތަކުން ދައްކާގޮތުން މައިމީހާގެ ބަނޑުގައި ކުއްޖާ އޮންނައިރު ކުއްޖާއަށް މައިމީހާގެ އަޑު ވަކިކުރަން އިނގި މައިމީހާގެ އެމޯޝަންސްތައް އިނގޭނެއެވެ. ދަރިފުޅަށް ވަރަށް އަވަހަށް ހާސްވެ ކަންބޮޑުވުމެއް އުޅޭކަން ދެނެގަނެވޭނެއެވެ. އެއްޗެއް ނުބުނެވުނުނަމަވެސް ކުއްޖާއަށް އޭނާގެ ކޮނޑުގައި މިއެޅޭ ބޮޑު ޒިންމާގެ އިހްސާސް ކުރެވޭނެއެވެ. ތިޔަ އަޅުވަނީ މަންމައާއި ބައްޕަގެ ކައިވެނި ސަލާމަތް ކުރުމުގެ ބޮޑު ޒިންމާ އެ ކުއްޖާގެ ކޮނޑުގައިކަން އެނގޭނެއެވެ.

އެހެންކަމުން ކުއްޖަކު ހޯދުމަށް އެންމެ ރަނގަޅު ވަގުތަކީ 2 މީހުންވެސް އެކަކު އަނެކަކު ދެކެ ލޯބިވެ ދެމީހުންގެ ގުޅުން ވަރުގަދަނަމައެވެ. އެއިރުން ކުއްޖާ ބޮޑުވުމަށްވެސް ރަނގަޅު މާހައުލެއް ކުއްޖާއަށް ލިބިގެންދާނެއެވެ. ނަމަވެސް 2 މީހުންގެ ގުޅުން ހީނަރުވެ ލިބޭ ދަރިފުޅު އެ 2 މީހުންގެ ގުޅުން ރަނގަޅުކޮށްދޭނެކަމަށް ދެކޭނަމަ އެއީ ވަރަށް ބޮޑު މައްސަލައެކެވެ.

ބައެއްފަހަރު މިއާއި ހިލާފު

ބައެއްފަހަރު މިއާއި ހިލާފަށްވެސް ކަންކަން ވެފައި އެބަހުއްޓެވެ. އެގޮތުން ބައެއްފަހަރު ކުއްޖަކު ލިބުމަކީ ދެމަފިރިންގެ ދިރިއުޅުން އުޖާލާވާ ފަހަރުތައް ކަމުގައިވެސް ވެފައި އެބަހުއްޓެވެ. ނަަމަވެސް މިއީ ވަރަށް މަދު ފަހަރެކެވެ. ހިތްހަމަނުޖެހުން އުޅޭ ދެމަފިރިއެއްގެ ދިރިއުޅުމަށް ކުއްޖަކު ލިބޭ ފަހުން އުފާވެރިވުމަށް ގިނަ ކަންތައްތަކެއް ހުރެއެވެ. އޭގެތެރޭގައި ބަނޑުބޮޑުވާ ހިސާބުން މިއީ ދެމީހުންގެ ދިރިއުޅުމުގެ ކަންކަން ރަނގަޅުކުރަންޖެހޭ “ވޭކްއަޕް ކޯލް” އެއްކަން ދެމީހުންވެސް ބަލައިގެން ކަންކަން ރަނގަޅު ކުރުން ހިމެނެއެވެ. ކުއްޖަކު ލިބޭ ހިސާބުން ދެމީހުންގެ ދިރިއުޅުން ވަރަށް ބޮޑަށްވެސް ބަދަލުވާނެކަން ދަނެ އެކަނު އަނެކަމަށް އެހީތެރިވެދިނުމަކީ ކުއްޖަކު ލިބުމަށް ފަހުގައި އުފާވެރި އާއިލާތަކަށް ވެފައިވާ އާއިލާތަކުން ކަންކަން ކޮށްފައިވާ ގޮތެވެ. އަދި 2 މީހުންނަށްވެސް ގޯސްކޮށް ކަންތައްތަކެއް ކުރެވިފައިވާކަން ދަނެ އެކަކު އަނެކަކަށް މައާފަށްއެދި 2 މީހުން ދިރިއުޅުން ރަނގަޅު ކުރުމަށް މަސައްކަތް ކުރުން ހިމެނެއެވެ. އެއިރުން ދަރިއަކު ލިބުމަށްފަހު އެފަދަ އާއިލާތައް އުޖާލާއެެވެ.

ބޮޑު ހަރަދެއް

ކުއްޖަކު ލިބުމަކީ ދިރިއުޅުން ވަރަށް  ބޮޑަށްވެސް ހަރަދުބޮޑުވެގެންދާނެ ކަމެކެވެ. ޙާއްސަކޮށް މިހާރު ތަކެތީގެ އަގުތައް ހުންންގޮތުން މިއީ ވަރަށް ބޮޑު ހަރަދެއް ހިނގާ ކަމެކެވެ. އެގޮތުން ދަރިފުޅުގެ ކެއުމާއި، އަންނައުނާއި، ގެދޮރާއި، ތައުލީމަކީ ބޮޑު ހޭދައެއް މިހާރު ކުރަންޖެހޭ ކަންކަމެވެ. އެހެންކަމުން މިއީ ރިސްކެއް ނެގުން އެންމެ ރަނގަޅު ކަންތައްތޯ އަމިއްލައަށް ސުވާލުކޮށްލާށެވެ. ހަރަދުގެ އިތުރުން ދަރިއަކު ބަލާބޮޑުކުރުމަކީ ނަފްސާނީ ގޮތުންނާއި އަދި ވަގުތުގެ ގޮތުންވެސް މީހާ ގިނަ ކަންކަމެއް ތަހައްމަލް ކުރަންޖެހޭ ކަމެކެވެ.

ދަރިއަކު ލިބުމަށްފަހުގައި އެއީ މުޅި ދިރިއުޅުމުގައި ތިމާއަށް ހަވާލުވެފައިވާ ޒިންމާއެކެވެ. އެންމެ އުނދަގުވާނީ ދަރިފުޅު އުފަންވާ ދުވަސްވަރުގައިކަމަށް ގިނަ ބެލެނިވެރިންނަށް އިހްސާސްކުރެވިދާނެއެވެ. ނަމަވެސް ކުއްޖާ ވާހަކަދައްކާ، ދުވެ، ތަންތަނަށް އަރާ އުޅޭ އުމުަރަށް ދިއުމަކީ އަދި މާއުނދަގޫ އުމުރެކެވެ. ހަޤީގަތުގައި ދަރިއަކު ލިބުމަކީ ވަރަށް އުފާލިބޭ މަތިވެރި ނިއުމަތެކެވެ. ނަމަވެސް މިތަނުގައި މި ވާހަކަދައްކަނީ ދެމަފިރިއެއްގެ ގުޅުން ހީނަރުވެ އެމީހުންގެ ގުޅުން ވަރުގަދަވާންއޮތީ ދަރިއަކު ހޯދައިގެންކަމަށް ގަބޫލުކޮށް ދަރިން ހޯދާ މީހުންގެ ވާހަކައެވެ.

އެހެންކަމުން މައްސަލަ އުފެދިފައިވާ ކައިވެންޏެއްގެ ހައްލަކީ ކުއްޖަކު ހޯދުމެއް ނޫނެވެ. ފަހަރުގައި ރާއްޖޭގައި ކުދިން ލިބުމަށްފަހު ކައިވެނިތައް ރޫޅެން މެދުވެރިވާ ސަބަބަކީ މިއީކަމަށްވެސް ވެދާނެއެވެ. ކައިވެނީގައި މައްސަލަތައް ޖެހޭ ހިސާބުން އެކަމަށް އޮތް ހަމައެކަނި ހައްލަކީ ކުއްޖަކު ހޯދުންކަމަށް ގަބޫލުކުރެވި ގިނަ މީހުން ކުދިން ހޯދުމެވެ. ކުދިން ލިބުމަށްފަހުގައިވެސް އެ ގުޅުން ރަނގަޅުނުވެ އިތުރު މައްސަލަތައް ޖެހި ވަރިވާ ހިސާބަށް ދިއުމެވެ. އެހެންކަމުން ކައިވެނީގައި މައްސަލަތައް ޖެހޭނަމަ އެކަމަށް އޮތް ހައްލެއްގެ ގޮތުގައި ދެކެގެން ކުދިން ނުހޯދާށެވެ. ކުދިން ހޯދުމަކީ 2 މީހުން ވަރަށް ރަނގަޅަށް ތައްޔާރުވެގެން އެކަމަށް ބޭނުންވެގެން ކުރާ ކަމަކަށް ހަދާށެވެ. އެހެން ނޫންނަމަ ކުއްޖާއަށްވެސް ތި ދެވެނީ ބޮޑު ގެއްލުމެކެވެ.