އޮފީސް މާހައުލުގެ ސްޓްރެސް ކުޑަކުރުމަށް ހަދާނީ ކިހިނެތް؟

އޮފީހުގައި ވަރަށް ގިނަ މީހުން ވަރަށް ބުރަކޮށް މަސައްކަތްކުރެއެވެ. އެމީހުންގެ ކެރިއަރު ކުރިއެރުވުމަށް ގިނަ މަސައްކަތްތަކެއް ކުރެއެވެ. މިއީ މައްސަލައެއް ނޫނެވެ. އެކަމަކު މައްސަލަ އުފެދޭ ހިސާބަކީ މަސައްކަތުގެ މާހައުލުގެ ސްޓްރެސް ބޮޑުވެ އޭގެ ނޭދެވޭ އަސަރު މީހާއަށް ކުރާ ހިސާބުންނެވެ.

ވަރަށް ގިނަ ބާވަތްތަކެއްގެ ސްޓްރެސް ހުރެއެވެ. މިހުރިހައި ވައްތަރުތަކާއި އެއްވަރަށް މަސައްކަތުގެ މާހައުލުގައި ދިމާވާ ސްޓްރެސްއަކީވެސް މީހާއަށް ނުރައްކާ ހުރި ކަމެކެވެ. ސައިކޮލޮޖީ ޓުޑޭއިން އާންމުކޮށްފައިވާ ރިޕޯޓެއްގައި ބުނެފައިވަނީ މަސައްކަތުގެ މާހައުލުގައި ސްޓްރެސްވާ މީހުންގެ އަދަދު އިތުރުވަމުން އަންނަކަމަށެވެ.

advertisement

މަސައްކަތުގެ މާހައުލުގެ ސްޓްރެސް މީހާއަށް ނުރައްކަލީ ކީތްވެ؟

މަސައްކަތުގެ މާހައުލުގައި ދިމާވާ ސްޓްރެސް މެނޭޖްކުރަން ޙާއްސަ އުކުޅުތަކެއް ބޭނުންވެއެވެ. ނަމަވެސް މަސައްކަތުގެ މާހައުލުގައި ދިމާވާ ސްޓްރެސް މެނޭޖްކޮށް މީހާގެ ދިރިއުޅުމަށް އޭގެ އަސަރު ނުކުރާނެފަދަ ގޮތައް އަމަލުކުރަން އިނގެނީ ވަރަށް މަދު ބަޔަކަށެވެ.

މަސައްކަތުގެ މާހައުލުގައި ދިމާވާ ސްޓްރެސްއަކީ ބައެއް ފަހަރު އެހެން ސްޓްރެސްތަކަށްވުރެ ނުރައްކާ ކަމެއްކަމަށްވެސް ތަޖުރިބާކާރުން ބުނެއެވެ. މީގެ ސަބަބަކީ މީހާއަށް ހަދާނެގޮތެއް ނޭންގި “ޕަވަރލެސް” ވެގެންދާތީއެވެ. ޕަވަރލެސްކަމުގެ އިހްސާސް މީހާއަށް ކުރުމަކީ އޭނާ ސިއްހީ އެހެން ކަންކަމަށްވެސް ހުށައެޅިގެންދާ ކަމެކެވެ. އޭގެތެރޭގައި ޑިޕްރެޝަން، އެންޒައިޓީ، ފަދަ ކަންކަން ހިމެނެއެވެ.

ޖިސްމާނީގޮތުންވެސް މީހާއަށް އަސަރުކުރުވާ

އޮފީހުގެ މާހައުލުގައި ސްޓްރެސް ވުމުގެ ސަބަބުން ނަފްސާނީ ގޮތުގެ އިތުރުން ޖިސްމާނީ ގޮތުންވެސް މީހާއަށް ނުހަނު ގިނަ ކަންތައްތަކަކާއި ކުރިމަތިކުރުވައެވެ. އޭގެތެރޭގައި ބޮލުގައި ރިއްސުމާއި، ނިދަން އުނދަގޫވުމާއި، ޖިސްމާނީގޮތުން މީހާ ބަލިކަށިވުމަކީ މިގޮތައް ދިމާވެދާނެ ބައެއް ކަންކަމެވެ. ޖިސްމާނީގޮތުން ބަލިތައް ތަހައްމަލްކުރަމުންދާ މީހުންނަށް މަސައްކަތުގެ މާހައުލުގައި ސްޓެރެސް އިތުރުވުމަކީ އެމީހުންގެ އެ ހާލަތު އިތުރަށް ގޯސްވާނެކަމެކެވެ.

މަސައްކަތުގެ ފެންވަރު ދަށްވާނެ

މަސައްކަތުގެ މާހައުލުގެ ސްޓްރެސްގެ ސަބަބުން މީހާއަށް ދިމާވާ ކަންކަންކަމަށްވާ ނަފްސާނީ، ޖިސްމާނީ، އަދި އެމޯޝަނަލީ އެކިއެކި ކަންކަމުގެ ސަބަބުން މަސައްކަތުގެ ކޮލެޓީ ދަށްވެގެންދެއެވެ. ކުރިން ކިތަންމެ ރަނގަޅަކަށް މަސައްކަތް ކުރި މީހެއްނަމަވެސް މަސައްކަތުގެ މާހައުލުގެ ސްޓްރެސް އިތުރުވާނަމަ މަސައްކަތުގެ ފެންވަރު ދަށްވެގެންދާނެއެވެ.

މަސައްކަތުގެ މާހައުލުގެ ސްޓްރެސް މެނޭޖްކުރާނީ ކިހިނެތް؟

މަސައްކަތުގެ މާހައުލުގައި ގިނަފަހަރު ސްޓްރެސްވާން ދިމާވާ އެންމެ ބޮޑު އެއް ސަބަބަކީ އެއްފަހަރާ މާގިނަ މަސައްކަތް ކުރަން އުޅުމެވެ. އަދި އޮފީހުގެ މަސައްކަތް ހުރިހައި ވަގުތަކު ކުރުމެވެ. އެހެންކަމުން އޮފީހުގެ މަސައްކަތް ކުރުމަށް ވަކި ވަގުތެއް ކަނޑައަޅާށެވެ. އެވަގުތައްފަހު އޮފީހުގެ މެއިލްތައް ބެލުން ފަދަ ކަންކަން މެދުކަނޑާލެވިދާނެއެވެ.

މަސައްކަތްކުރާ މާހައުލުގެ މީހުންނާއި ގާތް އެކުވެރި ގުޅުމެއް ބޭއްވުމަކީ މަސައްކަތުގެ މާހައުލުގެ ސްޓްރެސް ކުޑަކުރުމަށް ކުރެވިދާނެކަމެކެވެ. އޮފީސް މީހުންނާއި އަދި ކަސްޓަމަރުންނާއިވެސް ގާތް ގުޅުމެއް ބާއްވާށެވެ.

މަސައްކަތުގެ މާހައުލުގައި މައްސަލައެއް ދިމާވެ ސްޓްރެސްވާނަމަ އެކަމެއް ސިއްރުކޮށްފައި އަމިއްލައަށް ނުބާއްވައި އެކަން ހިއްސާކުރާށެވެ. މިއީ މިކަން ހައްލުވާނެކަމެއްނޫނެވެ. ނަމަވެސް މަސައްކަތުގެ މާހައުލުގައި ސްޓްރެސްވާނަމަ އެކަން އޮފީހުގައި އިނގެންޖެހޭ ފަރާތްތަކަށް އަންގާލުމަކީ ބުއްދިވެރިގޮތެކެވެ.

ސްޓްރެސް ފިލުވުމަށް އެންމެ މުހިންމު ކަމެއްގެ ގޮތުގައި ކުރެވޭނެ ކަމަކީ ބްރޭކެއް ނަގާލުމެވެ. މިއީ ސްޓެރެސް މެނޭޖްކުރުމަށް ކުރެވޭ އެންމެ މުހިންމު ކަންތައްވެސް މެއެވެ.      

ބައެއް ފަހަރު މަސައްކަތުގެ މާހައުލުގައި މާބޮޑަށް ސްޓްރެސްވާނަމަ މިއީ އެންމެ ރަނގަޅު ވަޒީފާތޯ އަމިއްލަ ނަފްސާ ސުވާލުކޮށްލާށެވެ. އެހެންކަމުން މަސައްކަތްކުރާ މާހައުލު ބަދަލުކޮށްލުމުންވެސް މީހާއަށް ލުއިކަމުގެ އިހްސާސް ކުރެވޭނެއެވެ.