ޗުއްޓީ އަށް ރާއްޖެތެރެއަށް ދާ ކުޑަކުދިން އެނބުރި މާލެ އަންނަން ބޭނުން ނުވޭ!

ސްކޫލުތަކުގެ ބޮޑު ބަންދަކީ އެންމެންވެސް ޗުއްޓީ ހޭދަކުރުމަށްޓަކައި ގައުމުން ބޭރަށް ނުވަތަ ރާއްޖޭގެ އެކި ރަށްތަކަށް ދަތުރުކުރާ ދުވަސްވަރެކެވެ. ހާއްސަކޮށް ރަށްރަށުގައި ލޯކަލް ޓޫރިޒަމް ފެށިގެން އައިފަހުން އެކި ރަށްރަށަށް ޒިޔާރަތްކުރާ މީހުން ވަރަށް ގިނަކަން ފާހަނގަ ކުރެވެއެވެ. މަގުމަތީގައި ދުއްވާ އުޅަނދުފަހަރުތަކާއި ތޮއްޖެހިފައިވާ އާބާދީގެ ތެރޭގައި ހާސްކަމުގައި ދިރިއުޅެމުން އަންނަ ތުއްތު ކުދިންނަށާއި ބޮޑެތި މީހުންނަށް މާލެއިން ބޭރުވެ، ކުޑަ ހަރަދެއް ކޮށްގެން ރާއްޖެތެރޭގެ ނަލަނަލަ ރަށްރަށުގެ ހިތްގައިމު މާހައުލު ތަޖުރިބާކޮށްލަން ލިބޭ ކަމީ ނަސީބެކެވެ. ކޮންމެ އަހަރެއްގެ ވެސް ބޮޑު އީދާއި، ކުޑަ އީދު އަދި ސްކޫލު ބަންދުތަކުގައި މާލެ އަށް ނޭވައެއް ލެވި، މާލޭގައި ދިރިއުޅޭ މީހުންނަށް ވެސް ނޭވައެއް ލެވެނީ މި ބަންދުތަކުގައި ރަށުން ބޭރުވެގެންނެވެ.

މި ބޮޑު އީދާއި އަދި ސްކޫލު ބަންދާއި ދިމާކޮށް ރަށްރަށަށް ގޮސް ތިބި އާއިލާތަކުން އެ އާއިލާތަކުގެ ތުއްތު ކުދިންނާއި ފުރާވަރުގެ ކުދިން އަދި ޒުވާނުން އުފަލާއި ހިތްހަމަ ޖެހުމުގައި ހާސްކަން ކުޑަ ދުވަސްތަކެއް ރަށްރަށުގެ އަތިރިމަތީގަ އާއި ޕާކުތަކުގައި ހޭދަ ކުރާތަން ފެނެއެވެ. ފަރުތައް ބަލަން ދިޔުމާއި، ޑައިވް ކުރުމާއި، ކުޅި ތަކަށް ދިޔުމާއި، ތަނަވަސް ބޮޑެތި މަގުތަކުގައި ހިނގުމާއި ދުއްވުމާއި، ޕިކްނިކު ދިޔުމާއި ގޯތި ތެރޭގައި ނުވަތަ މަގުމަތީގައި ބާބަކިއު ހެދުން ފަދަ ކަންކަމުގައި ޝާމިލުވެ އުޅޭ ކުދިންނާއި މީހުންގެ މޫނުމަތިން ފެންނަނީ އުޖާލާކަމެވެ. އާއްމުގޮތެއްގައި މާލޭގެ މަގުމަތިން ފެންނަ މާޔޫސީ މޫނުތަކާއި ހިލާފު ކުލަވަރުތަކެކެވެ.

advertisement

ގުދުރަތީ ނިޒާމުތެރޭގައި ފެހިކަމާ ހާމަކަމާއި މޫދާއި، ނޫވިލުތަކާއި، ސާފު ވައިގެ ތެރޭގައި ދިރިއުޅުމަކީ އިންސާނުންގެ ނަފްސާނީ ދުޅަހެޔޮކަމަށް ކޮންމެހެން މުހިންމު ކަންތައްތަކެއް ކަން ދިރާސާތަކުން ވެސް ދައްކައެވެ. ބަލިވެގެން ޑޮކްޓަރަށް ދެއްކުމުންވެސް ބޭހުގެ ބަދަލުގައި، ފެތުމާއި، ވެލީގައި ހިނގުން ފަދަ ކަންކަން ކުރުމަށް ޑޮކްޓަރުން ލަފާދެއެވެ. އެހެން ކަމުން، ޗުއްޓީ ހޭދަކުރަން ރާއްޖެތެރެއަށް ދާ މީހުން އެނބުރި މާލެ އަށް ދާން ޖެހުމުން ރޮވޭ ކަމީ ހައިރާންވާންވީ ކަމެއް ނޫނެވެ.

މިކަމާއި މެދު ވާހަކަ ދައްކާލުމުން، ރަށުތެރެއިން ދިމާވި ބައެއް މީހުން ބުނީ ޗުއްޓީ ނިމި، މާލެ ދާން ޖެހުމުން އެމީހުން އެންމެ ހިތްދަތިވަނީ ދަރިންތައް މާލެ ނުދިޔުމަށް ރޮއި ހަދާތީއެވެ. އެކަކު ބުނެފައިވަނީ އޭނާގެ ކުދިން މާލެ ދާން ބޭނުން ނުވާތީވެ ފިލި ކަމަށާއި، ކުދިން ފެނުނީ ފްލައިޓް ފުރި ފަހުން ކަމަށެވެ. މާލެ އަކީ އިންސާނުންނަށް ފުރިހަމަ ސިއްހަތެއްގައި ދިރިއުޅެވޭނެ މާހައުލެއް އޮތް ރަށެއް ނޫނެވެ. ތުއްތު ކުދިން ހެދިބޮޑުވުމަށް ނުރައްކާތެރި މާހައުލެއް ކަމަށް ނަފްސާނީ އިލްމުވެރިންވެސް އިއްތިފާގުވެއެވެ. ސިޔާސަތުތައް ހަދައި ތަންފީޒުކުރާ ފަރާތްތަކަށް މިތަން ނުފެންނަނީ ކީއްވެބާއެވެ؟ މާލެ ނޫން ސަރަހައްދެއްގައި ވަޒީފާ އުފެދޭނެ އިގްތިސާދެއް އޮތްނަމަ މާލޭގައި މިއަދު މީހުން ތޮއްޖެހި ފިތި ހާސްކަމުގައި ދިރިއުޅެން ޖެހޭނެތޯއެވެ؟